“Төлөөлөгч ярьж байна” булангийнхаа энэ удаагийн дугаарт Сонгинохайрхан дүүргийн Иргэдийн Төлөөлөгчдийн Хурлын Төлөөлөгч, 31 дүгээр хорооны Засаг дарга Г.Бадамцэцэгийг урьж ярилцлаа.

-Танд энэ өдрийн мэндийг дэвшүүлье. Ярилцлагаа иргэдийнхээ итгэлийг хүлээж сонгогдсон төлөөлөгчийнхөө хувьд ямар ажлыг санаачилж хийв гэсэн асуултаар эхлье?

-Миний хувьд УИХ-ын гишүүн, Нийслэл дүүргийн Төлөөлөгчид, дүүргийн удирдлагуудтайгаа хамтарч ажиллах хамтын ажиллагааг чухалд тавьж ажилладаг. Дан ганц би гүйгээд амжилтанд хүрнэ гэж байхгүй. Мэдээж манай хороон тулгамдсан асуудал маш олон байгаа. 2011 онд хороо анх байгуулагдахад би Засаг даргаар ирж байлаа. Анх байгуулагдахад манай хороо зам ч үгүй, гэрэлтүүлэггүй, худаг усны хүртээмж муу, сургууль, цэцэрлэггүй, хог ихтэй гээд хүндрэлтэй олон асуудлууд байлаа. Бид ямар ч гэсэн хамтарч ажиллаад иргэдийн өмнө нэн тэргүүнд тулгамдаад байгаа асуудлаа шийдээд явж байна.

-Тухайлбал?

-Бидний 2016 онд тавьсан хамгийн чухал асуудал бол цэцэрлэг, сургууль, замын асуудлаа шийдье. Хороогоо гэрэлтүүлье, гэмт хэргээс урьдчилан сэргийлэх чиглэлээр камержуулалтын асуудлаа шийдвэрлье. Дээрээс нь айл өрхүүдээ орлоготой болгоё гэж ажлаа эхлүүлж байлаа. 2016 оноос хойш манай хороон дээр нэлээд олон ажил хийгдлээ. Зөвхөн 2017 онд гэхэд 3 тэрбум орчим төгрөгийн хөрөнгө оруулалтыг ажил хийгдсэн байна. Тэгэхээр УИХ-д сонгогдсон гишүүн Ц.Гарамжав, нийслэлийн ИТХ-д сонгогдсон Төлөөлөгч С.Мөнхчулуун, дүүргийн ИТХ-ын Төлөөлөгч Д.Идэрзаяа, ИТХ-ын дарга Б.Мөнхцэцэг, дүүргийн Засаг дарга Ж.Сандагсүрэн гээд маш олон хүнтэй гар нийлж ажилласны үр дүн гарч байна. Манай хороо 2000 орчим хүүхэд багачуудтай хэрнээ 50 хүүхдийн хүчин чадалтай 1 цэцэрлэгтэй байсан. Ингээд бид УИХ-ын гишүүн Ц.Гарамжавын дэмжлэгээр хуучин ашиглагдахгүй байсан ахуйн үйлчилгээний барилгын зориулалтыг өөрчилж, 120 хүүхдийн цэцэрлэг болгож, одоо хэвийн ажиллаж байна. Үүнээс гадна 176 дугаар цэцэрлэгийн өргөтгөлийн асуудлыг шийдвэрлэхээр 2019 оны төсөвт суулгаад байна. Гэхдээ бид ирэх оныг хүлээлгүйгээр “Сайхан бүсгүй” группын хандиваар 50 хүүхдийн өргөтгөлийг барьж ашиглалтанд орууллаа. Мөн замын асуудлыг тодорхой хэмжээгээр шийдвэрлэхийн зэрэгцээ цахилгааны хүчдэл сайжруулах ажлын хүрээнд 20.000 айлыг цахилгаанаар хангах хүчин чадалтай дэд өртөө 1-ийг, дэд станц 10-ыг, 100 гаруй тулгуурыг босгоод байна.

-Дахиад нэг сургууль баригдахаар яригдаж байгаа юм билээ?

-Тиймээ. Өмнө нь газар байхгүй шалтгаанаар сургууль цэцэрлэг баригддаггүй байсан учраас ямартаа ч газраа бэлдэх нь чухал юм байна гэж үзэж 2013 оноос хойш хөөцөлдөж, 2018 оны 8-р сард НИТХ-ын төлөөлөгч С.Мөнхчулууны дэмжлэгээр 6 айлын газрыг нөхөн олговортойгоор чөлөөлүүлж, 2019 онд 320 хүүхдийн бага сургууль бариулахаар улсын төсөвт суулгуулсан байгаа.

-Танай хорооны нутаг дэвсгэрээр дайрсан засмал зам тавигдсан нь нэлээд ач холбогдолтой ажил болсон байх?

-Манай хороонд авто замын асуудал их хүндрэлтэй асуудлын нэг. Гэмтлийн эмнэлгийг Толгойттой холбох Ард Аюушийн зам тавих асуудал 10 гаруй жил яриагдаж байсан ч 2 гудамжны айлыг нүүлгэн шилжүүлэх, 35 тэрбум төгрөгийн төсөвт өртөгийн асуудлаас болоод шийдэгдээгүй байсан. Намайг 13 дугаар хорооны нийгмийн ажилтан байхад л яригдаж байсан асуудал. Үүнийг Нийслэлийн ИТХ-ын төлөөлөгч С.Мөнхчулууны дэмжлэгээр одооны маршрутаар шийдвэрлэж, гэмтлийн замыг 30, 31-р хороо улмаар Толгойтын замтай холбосон 1,3 км замыг тавьж, ашиглалтанд оруулаад байна. Энэ хамгийн хэрэгтэй, нийтийн зам болоод байгаа. Жаахан хүндрэлтэй асуудал нь энэ зам маань эргэлт ихтэй, нарийхан гэдэгт л байгаа юм. Гэхдээ л жаахан нарийн болохоос олон хүний цаг зав, авто замын түгжрэлийг тодорхой хэмжээгээр бууруулж байгаа хэрэгтэй л ажил болсон. Нөгөөтэйгүүр манай хорооны гудамж хоорондын шороон замууд маш их асуудалтай. Нэг бороо ороод л эвдэрчихнэ. Энэ замыг бид жил бүр засварлаж, түрж, тэгшлэх ажлыг хийдэг. Энэ жил бид 4 км орчим замыг засварлаж янзлаад байна.

-Танай хороо хойшоо уул руугаа нэлээд их тэлсэн. Тэр айл өрхүүдийн хувьд нийтийн тээвэр, замын асуудал хүнд байдаг байх?

-Бид маш их хөөцөлдөж, УИХ-ын гишүүн, НИТХ-ын төлөөлөгч нартайгаа хамтарч ирэх жил 3 чиглэлийн босоо авто замыг хатуу хучилттай болгохоор болсон. Энэ 3 гол замаар л манай хорооны иргэд зорчдог. Нийтийн тээвэр байхгүй учраас энэ замуудаар иргэд маань хувийн таксигаар үйлчлүүлдэг. Тэгэхээр энэ 3 чиглэлийн 4.6 км авто зам хатуу хучилттай болоод ирэхээр манай хороонд замын асуудал тодорхой хэмжээгээр шийдэгдэж, яваандаа нийтийн тээврийн асуудлаа ч шийдвэрлэхээр төлөвлөн ажиллаж байна.

-Гэрэлтүүлэг муутай байх?

-Гэрэлтүүлгийн асуудал манай хороон дээр үнэхээр хүнд байсан. 2011 онд хороо анх байгуулагдахад бид нэг тооцоо гаргаж байсан. Хорооны нутаг дэвсгэрт нийт 868 гэрэлтүүлэг хийж байж бүтэн гэрэлтэх юм байна гэж. Түүнээс хойш хорооны нутаг дэвсгэр нэлээд тэлсэн. Өмнө нь 200 орчим гэрэлтүүлэг тавигдсан ч асдаггүй байсан. “Их хотын гэрэлтүүлэг” ХХК-тай хамтраад бид хуучин гэрэлтүүлгүүдээ асаагаад явж байна. Мөн 2017 оны 11 сард нийслэлийн хөрөнгө оруулалтаар 206 гэрэлтүүлэг, Орон нутгийн хөгжлийн сангийн хөрөнгөөр 180 орчим гэрэлтүүлгийг шинээр сууриулуулаад байна.

Анх манай хорооны харанхуй байдлыг тухайн үед дүүргийн ИТХ-ын дарга байсан, одоогийн УИХ-ын гишүүн Х.Нямбаатар гишүүн дүүргийн ИТХ-ын дарга байхдаа “Бид гудамжуудаа гэрэлтэй болгож, иргэддээ тайван, ая тухтай амьдрах нөхцөл боломжийг бүрдүүлэх ёстой. Тухайлбал манай 31-р хороо Баянгол дүүрэгтэй хиллэдэг. Гэтэл Баянгол дүүрэг гэрэлтэй, 31-р хороо маань харанхуй байна. Үүнийг заавал шийдэх ёстой” гэж хүмүүст маш сайн ойлгуулж байлаа. Тэр үед надад үнэхээр энэ харанхуйг гэрэлтүүлэх л ёстой гэсэн бодол төрж байсан юм. Ингээд 2013 онд орон нутгийн хөгжлийн сангийн 101 сая төгрөгөө тэр чигээр нь гэрэлтүүлэг хийхэд зарцуулсан юм. Нийт 74 гэрэлтүүлгийг тавьж байсан. Үүнээс хойш дахиад Орон нутгийн хөгжлийн сангийн хөрөнгөөр 100 орчим гэрэлтүүлэг нэмлээ, 2017 онд нийслэлийн хөрөнгө оруулалтаар 206 гэрэлтүүлгийг шинээр тавьсан. Одоо Австри Улсын хөрөнгө оруулалтаар 350 ширхэг гэрэлтүүлгийг тавихаар төлөвлөгдөөд, бид судалгаа, гэрэлтүүлэг тавиулах байршил зэргээ тодорхой гаргаад өгчихсөн байгаа. Энэ бүгд тавигдлаа ч манай хороо бүрэн гэрэлтэхэд 300 гаруй гэрэлтүүлэг шаардлагатай гэсэн судалгааг гаргачихаад сууж байна. Бас яаж зүгээр байх вэ энэ 300 гаруй гэрэлтүүлгийн төслийн саналаа нийслэл дээр хэрэгжиж байгаа“Гэрэлтэй Улаанбаатар” төсөлд өгчихөөд байна. УИХ-ын гишүүн Ц.Гарамжав, НИТХ-ын төлөөлөгч С.Мөнхчулуун нар маань ч ирэх жил гэрэлтүүлгийн асуудалд анхаарч, төсөвт тодорхой хэмжээний хөрөнгийг суулгуулж, дэмжиж ажиллаж байна. Ингээд ямар ч гэсэн ирэх жил мөрөөдөөд гаргаж байсан 800 гаруй гэрэлтүүлгийн маань асуудал шийдэгдэнэ гэдэгт итгэлтэй байна.

-Тэгэхээр таны хувьд сонгуулийн үеийн амлалтуудаа нэлээд биелүүлсэн байх нь?

-Манай хорооноос надтай хамт дүүргийн ИТХ-д сонгогдсон Төлөөлөгч Д.Идэрзаяа бид хоёр угаасаа л энэ асуудлуудыг хэлж, амлаж, айлын хаалга тогшиж явсан. Гэрэлтэй хороог бий болгож чадна, сургууль цэцэрлэг, зам, гэрэлтүүлгийн ажлуудыг шийдвэрлэнэ, хоггүй хороо болгоно гэж. Үүнд мэдээж хамтын ажиллагаа, хороон дээр ажиллаж байгаа бидний хөөцөлдөлгөө, санаачилга чухал. Төсөв тооцоогоо анхан шатан дээрээс л сайн өгч байж, ажил болж, асуудал шийдэгдэнэ шүү дээ.

-Иргэдийнхээ амьжиргааг дээшлүүлэх тал дээр хэрхэн ажиллав?

-Тэгэлгүй яах вэ. Бид ажилгүй иргэдээ ажилтай, орлоготой болгох тал дээр маш их анхаарч ажиллаж байна. Зөвхөн энэ онд л гэхэд 39 иргэнийг бид хөөцөлдөж, ажилтай, орлоготой болгосон. Сургууль цэцэрлэгүүдтэйгээ, аж ахуй нэгж байгууллагуудтайгаа холбоотой ажиллаад, нэг нэгнээ дэмжээд ирэхээр тэд маань ч манайд ийм ажил байна, энэ ажилд орох хүн байна уу гээд хандах жишээний. Бид ч нүүр улайлгахааргүй, сэтгэлтэй, хөдөлмөрч ажил хийх сонирхолтой, чадвартай хэрнээ ажлын байргүй байгаа хүмүүсээ ажилд оруулаад л явдаг. НАМЗХ-ын залуучуудаа ажил орлоготой, сургуульд суралцах боломжтой болгоно гэж мөн амлаж байлаа. Үүний хүрээнд 10 гаруй залууг ажилд зуучилж, 1 залуугийн суралцах тал дээр нь дэмжлэг үзүүлж, дүүргийн ИТХ-ын Төлөөлөгч, Тэргүүлэгч М.Даваадоржидоо уламжилж, төлбөрийн хөнгөлөлт үзүүлээд, энэ өвөл төгсөх гэж байна. Энэ мэтчилэн залуучуудаа дэмжих, ажилтай болгох, сурах боломжоор хангах, ар гэрийг нь дэмжих асуудлуудыг орхилгүй хийж байна.

-Аливаа ажилд санаачилгатай, үр өгөөжтэй байх талаас нь хандаж байж л энэ хорооны ажил урагшилна байх л даа. Төсөл хөтөлбөрүүдэд хэрхэн хамрагдаж байна вэ?

-Бид нийтийг хамарсан төслүүдийг авч иргэдээ ажлын байраар хангах тал дээр маш их анхаарч ажилладаг. Нөгөөтэйгүүр нэгэнт л төсөл хөтөлбөр хэрэгжүүлж байгаа юм чинь үр дүнтэй, өгөөжтэй ажлуудыг хийх ёстой гэсэн зарчмаар ажиллаж байгаа. Тухайлах юм бол, манай хороон дээр “Хотын засаглал” төсөл хэрэгжсэн. Энэ төсөл нь төрийн албан хаагчид, хэсгийн ахлагч нарыг чадваржуулж, компьютер техник хэрэгслэлээр хангах төсөл л дөө. Миний зүгээс ямар асуудлыг тавьсан бэ гэхээр нэгэнт л тодорхой төсөв гаргаж ажил хийж байгаа юм бол иргэдэд өгөөжтэй, үр дүнтэй, үлдэх юмтай зүйл хийе ээ. Манай хорооны зарим айл өрхүүдийг тогтой болгоод өг өө гэсэн. Гэтэл төслийнхөн эхлээд “..үгүй ээ, тийм зүйл байхгүй, бид чадваржуулах чиглэлийн сургалт явуулдаг болохоос биш ийм ажил бол хийхгүй ээ” гэсэн. Тэгэхээр нь би “хэрэв ийм ажил хийхгүй юм бол төсөв мөнгө гаргаад явах хэрэг юу байна аа” гээд нэг муудаж, нэг сайдсаар эцэст нь тэр ажлыг хийж, 40-өөд айл тогтой болчихоод байж байна. Одоо төсөл хэрэгжүүлэгчдийн маань жишиг ажил болчихсон, гадна дотноос ирсэн хүмүүстээ үзүүлдэг, бүтээлч ажил нь болчихсон байна. Гадынхан болоод төслийнхөн ч уулын орой дээрх айлуудыг тогтой болгочихсон, нөгөө айлууд нь ч баярлаж талархсанаа хэлээд байхаар урамшиж байх жишээний. Дэлхийн зөн манай хороон дээр мөн төсөл хэрэгжүүлдэг. Мөн л ялгаагүй тусламж дэмжлэг гэхээсээ илүү чадваржуулах сургалт зохион байгуулах, гэрээр юм хийдэг бол тоног төхөөрөмж өгөх зэргээр ажилладаг л даа. Тэднийг ч бас зүгээр байлгахгүй байсаар хүнд нөхцөлд амьдардаг 13 айлыг гэртэй болгочихсон /инээв/. Мөн иргэд, хүүхэд багачууд явахад хүндрэлтэй замыг засварлах, хүүхдийн тоглоомын талбай сэргээн засварлах зэргээр олон бүтээлч ажлуудыг хийгээд байна. Дээр нь иргэдээ зохион байгуулалтанд оруулан гудамж талбайгаа тохижуулах, хүнд нөхцөлд амьдарч буй айл өрхүүдэд халуун гараа сунгаж, гэрийг нь дуулаалах, тусламж дэмжлэг үзүүлэх гэх мэтээр иргэдийн оролцоог ханган амжилттай ажиллаж байна.

-Үнэхээр болж байна шүү?

-“Манай хороо миний гудамж” аяны хүрээнд шинэ зам дагуух айл өрхүүдийн хашаа, гудамжны өнгө үзэмжийг сайжруулах зорилгор төсөл бичиж, дүүргийн Засаг даргын Тамгын газрын даргатай уулзлаа. Гэтэл “5 сая 300 мянган төгрөгийн төслийг зөвхөн танай хороон дээр хэрэгжүүлчихвэл мөнгө дуусчихна” гэдэг юм байна. Тэгэхээр нь “Та бүхнийг төслөө бичээд ир гэсэн болохоор оруулаад ирлээ. Дэмжээд өгвөл их хэрэгтэй ажил болох гээд байна. Гэхдээ та бүхнийг дэмжихгүй байсан ч энэ ажлыг бид ямар ч байсан хийнэ” гэж хэллээ. Дэмжлэг олдоогүй л дээ, дүүргээс. Дахин төсөл бичээд Дэлхийн зөн Монгол Олон улсын байгууллагын Сонгинохайрхан Орон нутгийн хөгжлийн хөтөлбөрт хандлаа, дэмжигдсэнгүй. Тэгэхээр “Улаанбаатар шинэчлэл” гээд хог тээвэрлэлтийн компанидаа хандав аа. Гэтэл н.Түвдэндорж захирал “Өө тэгэлгүй яах вэ, энэ мөнгийг чинь би өгье” гэдэг юм байна. Тэгэхээр нь “бид бэлэн мөнгө авахгүй ээ. Би ажиллах хүч, хүнээ гаргая. Танайх шаардлагатай бараа материалыг нийлүүлээд өгөөч” гэлээ. Ингээд маргааш нь хэрэгтэй бүх зүйлсийг маань авч өгөөд, миний зүгээс 6 хүн түр ажлын бараар хангаад, дээр нь хорооныхоо хэсгийн ахлагч нар, ойр хавийн иргэдтэйгээ хамтарч ажиллаад, ямартай ч зам дагуух 174 өрхийн хашааны өнгө үзэмжийг сайжруулаад авсан. Нийслэл дээр “Ногоон технологитой хороо” төсөл хэрэгжсэн.

Тэгэхээр нь НИТХ-ын төлөөлөгч С.Мөнхчулуун дарга руу яриад, ямар ч гэсэн энэ төсөлд хамрагдъя гээд хороонд ойрхон иргэдтэйгээ ярилцаж “Хайрхан баг” нэрээр төсөл явуулсаны дүнд 10 айлыг гал түлэхгүйгээр халаалтаа шийдвэрлэх индукцэн билетиктэй, нано технологийн халаалтаар хангасан байгаа. Үүнийг авахын тулд бас л төсөл бичээд л, нийслэл рүү очоод, нийслэлийн Гэр хорооллын дэд бүтцийн гаар руу очиж, хурлаар орж төслөө хамгаалаад баахан гүйлээ. Нийслэлийн дүүргүүдийн маш олон хороо төсөл өгсөн байсан учраас дэмжигдэх болов уу, яах бол гэж санаа зовж байлаа. Гэтэл маргааш өглөө нь танай төсөл дэмжигдлээ гэдэг юм байна. Бөөн баяр, гэхдээ энэ ажилд нийслэлийн төлөөлөгчийн маань дэмжлэг их байсан л даа. Ингээд л төслөө авч хэрэгжүүлсэн. Мөн дүүргийн Улаан загалмайн хороотой хамтарч ажиллаад 1 худаг бариулж, 20 өрхөд стандартын 00 шийдүүлж байлаа. Энэ мэтээр бид хороогоо хөгжүүлэхийн тулд хаана ямар төсөл, ямар боломж байна түүний араас хөөцөлдөж, гүйж олон ажлуудыг татан авч амжилттай ажиллаж байна.

-Халаалт гэснээс танайх харьцангуй төвийн шугамд ойрхон хороо шүү дээ. Дэд бүтцэд холбогдох асуудал дээр хийсэн, төлөвлөсөн зүйл байна уу?

-Манай хороон дээр мөн бие даасан инженерийн шугам сүлжээнд холбогдох төсөл хэрэгжиж байгаа. Энэ төсөл манай иргэдийн санаачилгаар хэрэгжсэн юм. Төсөлд хамрагдсан 6, 7 дугаар гудамжны 14 айл нь байшингийнхаа дулаалгыг хийчихсэн явж байна. Мөн Дэд бүтцийн төв буюу Центр сервис төсөлд хамрагдахаар иргэддээ 3 удаагийн сургалт авч, байрлалаа сонгож, иргэдийн 10 бүлгийг дотор нь байгуулж, айл өрхүүдээр явуулж, хүсэлтийг нь гарын үсгээр баталгаажуулан авч, материалаа хүргүлэн ажиллаж байна. Ер нь бол иргэдийн зүгээс энэ асуудлыг их тавьдаг.

Энэ бүхнийг яагаад яриад байгаа вэ гэхээр санаачилгатай байж, энд тэндээс төсөл олж ирэх, өөрөө төсөл бичиж дэмжүүлсэнээр бидний ажил амжилттай өрнөөд байгаа юм. Ер нь бол дээрээс өгсөн үүрэг даалгаварыг биелүүлээд, иргэдийн тавьсан асуудлыг уламжлаад тодорхойлолт бичээд, гарын үсэг зураад сууж бас болно. Гэхдээ миний нэг боддог зүйл бол иргэд надад итгэж сонгосон. Нөгөө талаар нэгэнт л би энэ цаг хугацаандаа цаг зав, сэтгэл зүрхээ зориулан ажиллаж байгаа юм чинь үр дүнтэй ажиллаж, хийсэн ажилтай, үлдэх юмтай л байх ёстой гэж боддог. Магадгүй тодорхой хугацааны дараа өөрчлөгдөөд явж болно. Тэгэхэд Төлөөлөгч, засаг дарга байхдаа би ийм зүйл хийсэн, энэ маань ийм хэрэгтэй ажил байжээ гэж хүн харахад сайхан шүү дээ. Тийм учраас санаачлагатай, сэтгэлтэй, ажил хэрэгч л байх ёстой. Манай хороо 6 төрийн албан хаагч, 15 хэсгийн ахлагч, цагдаагийн ажилтан болон бусад нийлээд 30 хүнтэй. Хамт олондоо миний байнга хэлдэг зүйл бол нэгэнт л энэ хороон дээр ажиллаж байгаа бол санаачлагатай, сэтгэлтэй байж, иргэддээ хүрч ажиллаж, тулгамдаж буй асуудлыг шийдвэрлэхэд гар бие оролцож, нүүр бардам ажиллах ёстой шүү гэж захидаг.

-2019 онд хийхээр төлөвлөсөн ажил юу байна?

-Мэдээж олон ажил байгаа. УИХ, нийслэл, дүүргийн хөрөнгөөр хийгдэх хөрөнгө оруулалт бүтээн байгуулалтын ажлууддаа байнга л анхаарал хандуулж, санал хүсэлтээ явуулж байна. 2019 онд манай хороон дээр 320 хүүхдийн хүчин чадалтай бага сургууль, 250 хүүхдийн хүчин чадалтай 1 цэцэрлэг, 176-р цэцэрлэгийн өргөтгөл, 4,6 км авто зам, гэрэлтүүлэг, усан сан, явган хүний зам гээд олон ажлуудыг хийхээр УИХ-ын гишүүн, нийслэл, дүүргийн төлөөлөгч нарынхаа дэмжлэгээр улс, нийслэл, орон нутгийн төсөвт суулгасан байгаа. Мөн бид залуучуудын чуулга уулзалтаа болон залуучууд, иргэддээ чиглэсэн олон талт ажлуудыг хийхээр төлөвлөж байна.

-Танай хорооны залуучууд хэр идэвхитэй вэ?

-Х.Нямбаатар гишүүний санаачилгаар зохион байгуулсан 1000 залуугийн уулзалтын дараа би 100 залуугийн чуулга уулзалтыг хорооныхоо хүрээнд зохион байгуулсан. Залуучууддаа хорооны үйл ажиллагааг ойлгуулъя, идэвхи оролцоог нэмэгдүүлье, хурал болохоор ахмадууд л ирдэг байдлыг өөрчилье, төрийн үйл ажиллагааны талаарх мэдээ, мэдээллийг хүргэе гэсэн зорилготой уг уулзалтыг хийсэн. Мөн залуучуудын санал санаачилгыг сонсъё, залуу хүний нүдээр ямар ажил хиймээр харагддаг, ямар ажил дутуу байна гэж хардаг юм бол гэж энэ уулзалтыг хийсэн. Залуучуудаас маш их санаа, санал гарч байсан. Гэрэлтүүлэг, зам, дэд бүтцийн асуудлыг ярьж байсан. Бид гэрэлтэй гудамжаар гэртээ очмоор байна, дүү нараа, хүүхдүүдээ сургууль, цэцэрлэгт нь хүргэхэд сайхан замаар явмаар байна гээд маш олон санал санаачилгууд гаргаж, асуудлуудыг шийдэхэд боломжоороо хамтарч ажилламаар байна гэж байсан. Ингээд уулзалтын дараа залуучуудаа 5 баг болгон хуваагаад, ахлагч тавиад дунд нь болзолт уралдаан зарлаад явлаа. Гэтэл залуучууд маань маш их идэвхижиж хорооны хийх ажил гэж суулгүй шүүмжилдэг байсан ажлаа хүртэл өөрсдөө хийж, тэр бүү хэл худгийн хажууд хогийн сав тавьж, самбар байршуулаад, хогоо хаяхгүй байх уриалга гаргаад, гудамжны хогоо цэвэрлээд, замаа засварлаад их мундаг байсан. Тэгээд би харж байсан юм. Залуучуудыг идэвхижүүлээд, урамшуулаад, чин сэтгэлээсээ ярилцаад явахаар маш их зүйлийг хийж болдог юм байна гэдгийг тэр ажлуудаас харж байсан. Өөдөөс хараад “худлаа шоу доо” гэж хэлж байсан зулуус дундаа ороод энд юм хийчихмээр байна, энэ замыг ингэж засмаар байна гээд сэтгээд, санаачлаад явчихаж байгаа юм. Цэвэрлэгээ хийгээд, замаа засаад, гудамжны мөсөө цохиод ахмад настнуудынхаа усыг хүртэл зөөж өгөөд, бид ингэлээ гээд, хороогоор орж гараад мэдээлэл аваад явчихдаг болсон. Залуучууд маань одоо ч гэсэн хороотойгоо холбоотой ажиллаж, бид ч тэднийхээ санал санаачилгыг ажилдаа тусгаад явж байна.

Хороо зам тавилаа гээд дундаас нь мөнгө идээд сууж байдаг газар гэж хэлж байсан бол одоо хороо төсөвгүй, сэтгэл зүрхээрээ ажил явдаг гэдгийг ойлгочихсон байгаа. Яг үнэнийг хэлэхэд хорооны томоохон арга хэмжээг хийхдээ цалингийн зээл аваад, зээлээс зээлийн хооронд ажлаа урагшлуулаад л явж байдгийг хүртэл ойлгоод л яаж дэмжих үү, би чадахаараа туслая гээд л өөр өөрсдийн чаддаг мэддэгээр дэмжлэг болоод л хамтраад явж байна. Залуучууд маань ингэж сайхан ойлгоод, урам дэмжлэг өгч байхад ажлаад л байхаас өөр яахав дээ гээд л зүтгээд байнадаа. /инээв/

-Танай хорооноос хийн дасгалаар нийслэлээс томоохон шагнал авсан гэж дуулсан?

- Энэ жил хийн дасгал, аэробекийн 31-55 насны ангилалд 2 баг маань дүүрэгт алтан медаль, нийслэлд мөнгөн, хүрэл медаль хүртсэн амжилттай байгаа. Нийслэлийн шилдэг дүүргүүдтэй өрсөлдөхийн тулд мэдээж маш их цаг зав, сэтгэл зүрх, хөдөлмөрөө зориулж баг тамирчид маань бэлдсэн. Надад тулсан 1 асуудал бол хувцасны асуудал байлаа. 2 багийн 18 хүний 36 хувцасыг шинэчилж орох хүсэлтээ багийн ахлагч маань хэлсэн. Нэгэнт л дүүргээ, 31-р хороогоо төлөөлж нийслэлийн тэмцээнд орох гэж байхад асуудлыг шийдэхээс өөр арга байхгүй. Ингээд энэ асуудлаараа НИТХ-ын төлөөлөгч С.Мөнхчулуун, ДИТХ-ын төлөөлөгч Д.Идэрзаяа нарт хандаж, хамтран 2 сая 300 мянгөн төгрөгийн хувцас хийлгэж өгсөн. Өөрийгөө хөгжүүлээд, дүүрэг хорооныхоо нэрийг гаргаад явж байгаа хүмүүсийг аль болох дэмжиж ажиллахыг эрмэлздэг. Тэмцээн дээр очоод харж байхад бусад дүүргүүд манай багийг хараад ямар гоё хувцастай юм бэ, яасан чадварлаг юм бэ гээд бүр шуугисан шүү дээ. Дүүрэг, хорооныхоо нэрийг ингэж сайхан гаргасандаа баяртай байсан. Баг тамирчид маань манай хорооны л иргэд. Тэд маань ч баяртай байсан. Нэг ч гэсэн хүний сэтгэлд хүрч ажиллана гэдэг бидний хувьд чухал асуудал шүү.

-Сүүлийн асуултыг танд үлдээе?

-Баярлалаа. Нэг зүйлийг хэлэхэд зарим иргэд хэлдэг УИХ-ын гишүүн чинь төсвийг нь батлуулаад, нийслэлийн Төлөөлөгч чинь хөөцөлдөөд сургууль цэцэрлэг, зам барьчихаж байгаа шүү дээ. Үүнд чиний оролцоо юу байдаг юм бэ гэж. Санаачилга эндээс эхэлж, хүсэлт, судалгаа, төслөө уламжилж, удаа дараа хөөцөлдөж байж ажил болдог юм шүү дээ. Тиймээс би ажил бүр дээрээ бүтэн хавтас гаргаад, хаанаас хаа хүртэл, хэн хэнд хандаж, яаж явж байж энэ үр дүнд хүрсэн гэдгээ иргэддээ нээлттэй харуулдаг.

Ярилцсанд баярлалаа

Г.Бадамцэцэг: Нэг ч гэсэн хүний СЭТГЭЛД ХҮРЧ ажиллахыг хичээдэг