“Ард холдинг” группээс өнгөрсөн бямба гарагт “Хөрөнгө оруулагч үндэстэн” форум зохион байгууллаа. Таван сэдвийн хүрээнд өрнүүлсэн форумын “Утаагүй ирээдүйн сан-Смартсити” салбар хуралдаанд нийслэлийн ИТХ-ын дарга С.Амарсайхан, төлөөлөгч Ч.Гантулга нар оролцож, хотоос хэрэгжүүлж буй үйл ажиллагааны талаар мэдээлэл өгсөн юм.

Салбар хуралдааныг нээж нийслэлийн ИТХ-ын дарга С.Амарсайхан үг хэлсэн бөгөөд тэрбээр “Нийгэмд тулгамдаж олон бэрхшээлийг шийдэхээр нийслэлийн ИТХ-аас санал, санаачилга гаргаж ажиллаж байгаа. Алдаа, оноо бий. Утааг бууруулахын тулд төр захиргааны байгууллагын ажилтан, алба хаагчид, иргэд хамтрах ёстой. Тэгж байж аливаа бэрхшээлийг шийднэ” гэв.

Утаа эрүүл мэнд, эдийн засагт ихээхэн даримт учруулж, түүнийг нь арилгахын тулд зарцуулах хөрөнгө жилээс жилд нэмэгдэж байгааг олон улсын байгууллагын судлаачид онцолж буй. Тиймээс утааг бууруулж, агаарын бохирдлоос үүдэлтэй үр дагаврыг багасгахаар нийслэлийн ИТХ-аас Агаар, орчны бохирдлыг бууруулах мастер төлөвлөгөө батлан, хэрэгжүүлж байна. Салбар хуралдааны үеэр нийслэлийн ИТХ-ын дарга С.Амарсайхан хотоос хэрэгжүүлж буй бодлого, арга хэмжээний талаар “Гэр хорооллыг орон сууцжуулах нь утааг бууруулах үндсэн ажил. Гэвч тус ажилд хугацаа шаардлагатай. Тиймээс завсрын хугацаанд нь зүгээр суухгүйн тулд сайжруулсан түлш иргэдэд нийлүүлж эхлээд байна. Мөн гэр хороололд инженерийн дэд бүтэц татаж эхэллээ. Дүүрэг, хороо бүрт уг төслийг хэрэгжүүлнэ. Өөрөөр хэлбэл, Улаанбаатарыг өрсөлдөх чадвартай, аюулгүй хот болгон хөгжүүлэх бодлого хэрэгжүүлж эхлээд байна. Энэ мэтээр нийслэлийн ИТХ-аас өнгөрсөн жил гаруйн хугацаанд хэд хэдэн бодлогын шийдвэр гаргалаа. Гэхдээ гүйцэтгэлийн үр дүн, хяналт нь сайн байж гэмээнээ цогц үр дүнд хүрэх юм. Тэгэхээр иргэн бүр оролцох шаардлагатай болж байгаа юм. Нийслэлийн ногоон бүсэд үйл ажиллагаа явуулж буй амралтын газар, барилгын хашаан дахь манаачийн пүүтэг хүртэл зуух тавьж, галлаж байгаа. Зуун айл дахь барилгын материалын худалдааны зах байна. Наана нь хэдхэн барилгад хүмүүс худалдаа эрхэлж буй мэт боловч цаана нь хүнд үйлдвэрүүд үйл ажиллагаа явуулдаг. Тиймээс энэ мэт үйлдвэрүүдийг хотоос гаргаж, дүүргүүдийг эдийн засгийн, худалдааны, аялал жуулчлалын гэх зэргээр ангилан хөгжүүлж, өрсөлдөх чадвартай хот байгуулахаар ажиллаж байна. Утааг бууруулахад ухаалаг төхөөрөмжийг хэрхэн ашиглаж байна вэ гэхээр, нийслэл дэх 152 хорооны 3000 гаруй хэсгийн ахлагчийн агаарын чанарын хянагчаар ажиллуулж, и-сервисээр үр дүнг хянадаг байхаар шийдэж байна” гэсэн юм.

Харин төлөөлөгч Ч.Гантулга “Агаар, орчны бохирдол сүүлийн 30 орчим жил төлөвлөлтгүй төвлөрөл бий болгосноос үүдэлтэй. Дэд бүтцээ шийдээгүй байж их нүүдэл хүлээж авсан. Тиймээс бид тэр алдааг засах ёстой. Өнгөрсөн хугацаанд олон зуун тэрбум төгрөг утааг бууруулахад зарцуулсан. Гэхдээ төдийлэн үр дүнд хүрээгүй. Тиймээс эх үүсвэртэй нь тэмцэх хэрэгтэй. Бий болчихсон гэр хорооллыг нүүлгэж, айл өрхийн янданг буулгаж чадахгүй шүү дээ. Өмнө нь янданд нь шүүлтүүр суурилуулж, зуухыг нь сольж үзсэн. Оновчтой байсангүй. Тиймээс бид түлж бий түлшийг нь өөрчлөх хэрэгтэй гэж үзсэн. Энэ хүрээнд өнөө жил сайжруулсан түлш бэлтгэж, нөөцлөх ажил эхлүүлээ. Үр дүнд нь ирэх онд Улаанбаатарын утаа 50 орчим хувиар буурах байх гэсэн тооцоо гаргасан” гэв.

Нийслэлийн ИТХ-ын ХМОНХТ

“Улаанбаатарыг өрсөлдөх чадвартай, аюулгүй хот болгоно”