Өнөөдөр /2019.01.24/ УИХ-ын нэгдсэн чуулганаар "Төрийн зарим байгууллагын албан тушаалтны ангилал зэрэглэлийг тогтоох тухай" тогтоолын төслийн анхны хэлэлцүүлгийг хийв.

Энэ сарын 01-нээс хэрэгжиж эхлээд буй Төрийн албаны тухай хуулийн шинэчилсэн найруулга хэрэгжиж эхэлсэнтэй холбогдуулан салбарын 4 хуулийг нэр бүхий гишүүд оруулж ирсэн.

Үүний дотор "Төрийн зарим байгууллагын албан тушаалтны ангилал зэрэглэлийг тогтоох тухай" УИХ-ыцн тогтоолын төсөл багтаж буй бөгөөд өнгөрсөн долоо хоногийн чуулганаар үзэл баримтлалыг нь хэлэлцэх эсэхийг дэмжсэн юм.

Тогтоолын төслийг ТББХ-гоор хэлэлцсэн санал дүгнэлтийг УИХ-ын гишүүн С.Бямбацогт танилцууллаа.

Байнгын хорооноос 2019 оны 01 сарын 23-ны өдөр анхны хэлэлцүүлгийг нь хийж зарчмын зөрүүтэй саналын томъёоллууд гарган нэгдсэн чуулганы хуралдаанд хэлэлцүүлэхээр бэлтгэжээ.

Одоо байнгын хорооны санал дүгнэлттэй холбогдуулан УИХ-ын гишүүн С.Чинзориг, Ц.Даваасүрэн, М.Билэгт нар асуулт асууж, хариулт авлаа. Үүний дараа байнгын хорооноос гаргасан саналын томъёолол тус бүрээр санал хураалт явуулж тогтоолын төслийг эцсийн хэлэлцүүлэгт бэлтгүүлэхээр ТББХ-нд шилжүүллээ.

"Төрийн зарим байгууллагын албан тушаалтны ангилал зэрэглэлийг тогтоох тухай" тогтоолын төслийг эцсийн хэлэлцүүлэгт шилжүүлэв