Өнөөдөр /2019.01.29/ УИХ-ын чуулганы хуралдаанаар УИХ-ын даргыг албан тушаалаас нь чөлөөлөх талаарх тогтоолын төслийг хэлэлцэж байна. 

Өнгөрсөн баасан гарагт буюу 1 сарын 25-нд УИХ-ын гишүүн Л.Оюун-Эрдэнэ, Т.Аюурсайхан, Ж.Батзандан, Л.Болд, Х.Нямбаатар нар 39 гишүүний гарын үсэг бүхий тогтоолын төслийг өргөн барьсан юм. Хэлэлцэж буй асуудалтай холбогдуулан УИХ-ын гишүүд асуулт асуулж, санал хэллээ.

УИХ-ын гишүүн Л.Болд

Нэг хүний төлөө хууль гаргаж болохгүй, нэг хүний төлөө хувьсгал хийж болохгүй, нэг хүний төлөө парламент ажиллаж болохгүй гэдэгтэй санал нийлж байна. Яг ийм учраас л өнөөдөр Монголын ард түмэн тэмцэж байна, парламент парламентын хувьсгал хийж байна. Өнөөдөр бид Монголд хүчирхийллийн хувьсгал бус парламентынхаа дотор хувьсгалыг хийдэг жишиг тогтож байна гэж харж байна. Өнөөдрийнх хүртэлх Монголыг өөрчилсөн 40 хоногт үүнийг нотолж байна. Монголын иргэд чөлөөтэй жагсаж байна, тэмцэж байна. Бүрэн эрхт парламентын гишүүд хэний ч барьцаанд орохгүй олонхоороо шийдвэр гаргаж байна. Энэ бүхэн бидэнд нэг хүнд зориулсан хууль гаргахгүйгээр эрхзүйн олон шинэчлэл хийх шаардлагатай байгааг харууллаа.  

Хэдийгээр энэ хэд хоногт парламентын нэр хүнд унасан ч нөгөө талдаа бид ард түмнийхээ өмнө амлалтаа биелүүлж алдаагаа засаж, цаашид улс орноо зөв авч явах нөхцөл бүрдэж байна. Өнөөдөр парламентын бүх гишүүд тэгш эрхтэй. Гэтэл 76-ийн нэг гишүүн нь хаа ч байхгүй бүрэн эрхтэй, төрийн өндөрлөг гэж нэрлэгдэж, дархан эрх авсны төлөөсийг төлж байна. Парламент дээр 76 гишүүн тэгш эрхтэй байх ёстой.