Улсын Их Хурлын Аюулгүй байдал, гадаад бодлогын байнгын хорооны өнөөдрийн (2019.01.30) хуралдаанаар Гадаад харилцааны яамаар төлөөлүүлэн Монгол Улсын Засгийн газар, Мянганы сорилтын корпорациар төлөөлүүлэн Амеркийн Нэгдсэн Улсын хооронд байгуулсан Мянганы сорилтын компакт гэрээг соёрхон батлах тухай хуулийн төслийг хэлэлцэж дэмжив. Энэ талаарх хууль санаачлагчийн илтгэлийг Засгийн газрын гишүүн, Гадаад харилцааны сайд Д.Цогтбаатар танилцуулсан юм.

АНУ-ын Мянганы сорилтын корпорациас 2014 оны 12 дугаар сард Монгол Улстай хоёр дахь Компакт гэрээ байгуулах шийдвэр гарснаас хойш 3 жил гаруйн хугацаанд Гадаад харилцааны яамны дэргэд байгуулагдсан Монгол Улсын Засгийн газар, АНУ-ын Мянганы сорилтын корпораци (МСК) хооронд байгуулах хоёр дахь компакт гэрээг боловсруулах үүрэг бүхий Үндэсний ажлын алба, АНУ-ын МСК-тай хамтран Компакт гэрээ боловсруулах бэлтгэл ажлыг 2018 оны 5 дугаар сард бүрэн хангаж дуусгасан.

Олон улсын гэрээний тухай хуулийн дагуу Компакт гэрээнд гарын үсэг зурах асуудлыг Улсын Их Хурлын холбогдох Байнгын хороодтой 2018 оны 5 дугаар сарын 9-ний өдөр зөвшилцөж, гарын үсэг зурах асуудлыг зөвшөөрсөн санал, дүгнэлт гарсан. Энэ үндсэн дээр Монгол Улсын Засгийн газар, АНУ-ын Мянганы сорилтын корпораци хооронд Компакт гэрээний талаарх хэлэлцээ 2018 оны 5 дугаар сарын 16-21-ний өдрүүдэд АНУ-ын Вашингтон хотод амжилттай явагдаж, гэрээний төслийг тохиролцсон.

Засгийн газрын 2018 оны 6 дугаар сарын 13-ны өдрийн хуралдаанаар Мянганы сорилтын компакт гэрээнд гарын үсэг зурах асуудал дэмжигдэж, 2018 оны 7 дугаар сарын 27-ны өдөр Компакт гэрээнд гарын үсэг зурж гэрээг байгуулсан. Улмаар Монгол Улсын Ерөнхий сайд 2018 оны 9 дүгээр сарын 20-ны өдөр АНУ-ын Төрийн нарийн бичгийн даргатай Компакт гэрээг хэрэгжүүлэх хамтарсан тунхаглалд гарын үсэг зурсан гэдгийг сайд танилцуулав.

Компакт гэрээний дагуу АНУ-ын Засгийн газраас Улаанбаатар хотын нийт ус хангамжийг нэмэгдүүлэхэд олгосон 350 сая хүртэл ам.долларын буцалтгүй тусламж олгох юм. Энэ хүрээнд гүний худаг гаргах, ус цэвэршүүлэх үйлдвэр барих ажлууд үе шаттай хийгдэж, Улаанбаатар хотын нийт усан хангамж сайжрах боломж бүрдэх юм байна.

Хууль санаачлагчийн илтгэлтэй холбогдуулан Улсын Их Хурлын гишүүн Ж.Энхбаяр, О.Содбилэг нар Гадаад харилцааны сайд болон ажлын хэсгээс асуулт асууж тодруулсан бол Улсын Их Хурлын гишүүн Д.Лүндээжанцан энэ нь нийслэл хотын хувьд тулгамдсан нэг чухал асуудлыг шийдэхэд чиглэсэн томоохон хөрөнгө оруулалт бүхий гэрээ учраас яамд, холбогдох байгууллагууд хэрэгжилтэд нь онцгой анхаарч, ажлаа уялдуулан шуурхай ажиллах шаардлагатай байгааг сануулж байв.

УИХ-ын гишүүн Ж.Энхбаяр

Энэ бүхэн Монгол улсын энхийг сахиулах ажиллагаанд оролцож байгаа хэдэн бор цэргийн хөдөлмөр гэдгийг ойлгох ёстой хэмээн онцолсон юм. Мөн тэрээр Монголын талаас хүлээж байгаа үүргийг тодруулан асуусан юм.

Ж.Энхбаяр: Энэ бол энхийг сахиулах үйл ажиллагаанд оролцож буй "хэдэн бор" цэргийн маань гавьяа шүү