Х.Болормаа 2019.03.13 | Дүүргийн Хэвлэл мэдээллийн алба

СБД-ийн 4 дүгээр сургуулийн гадна фасад засварлах төслийн гэрээнд гарын үсэг зурлаа

СБД-ийн 4 дүгээр сургуулийн гадна фасад засварлах төслийн гэрээнд гарын үсэг зурлаа

Сүхбаатар дүүргийн Засаг дарга Х.Болормаа өнөөдөр Япон улсаас Монгол Улсад суух Онц бөгөөд Бүрэн Эрхт элчин сайд М.Такаокатай санамж бичигт гарын үсэг зурлаа.

Энэхүү санамж бичгийн хүрээнд Японы Засгийн газрын буцалтгүй тусламж “Өвсний үндэс” хөтөлбөрийн санхүүжилтээр дүүргийн 9 дүгээр хорооны нутаг дэвсгэрт байрлах 4 дүгээр сургуулийн гадна фасадыг 74.9 мянган ам.долларын санхүүжилтээр шинэчлэн засварлах юм.

Энэ үеэр дүүргийн Засаг дарга Х.Болормаа “Өнөөдөр бид 1989 онд ашиглалтанд орсноос хойшхи 30 жилийн хугацаанд их засвар хийгдээгүй 4 дүгээр сургуулийг засварлахаар болсонд баяртай байна. Монголын ирээдүй үеийг сурч, хөгжих таатай нөхцөлийг бүрдүүлэхэд хөрөнгө оруулалт хийсэн эрхэм элчин сайд болон төслийг хэрэгжүүлэгчдэд дахин талархлаа илэрхийлье” гэсэн юм.

Мөн Япон улсаас Монгол Улсад суух Онц бөгөөд Бүрэн Эрхт элчин сайд М.Такаока “Өнгөрөгч 2018 онд Япон улсын Засгийн газрын буцалтгүй тусламж “Өвсний үндэс” хөтөлбөрийн хүрээнд дүүргийн 10 дугаар хорооны нутаг дэвсгэрт байрлах 17 дугаар цэцэрлэгт 173 сая төгрөгний буцалтгүй тусламжийн санхүүжилтээр цэцэрлэгийн барилгын их засварын төсөл амжилттай хэрэгжсэн. Өнөөдөр бид дахин боловсролын салбарт хөрөнгө оруулалт хийж байгаадаа баяртай байна” гэлээ.