УИХ-ын гишүүн, Зам, тээврийн хөгжлийн сайд Б.Энх-Амгалан Монгол Улсад нисэх хүчин үүсч хөгжсөний 94 жилийн ойг тохиолдуулан тус салбарт үр бүтээлтэй ажилласан ажилтан, ахмад зүтгэлтнүүдэд шагнал гардуулан өглөө.

Б.Энх-Амгалан сайд баяр хүргэж хэлсэн үгэндээ, Иргэний нисэхийн салбар нь Монгол Улсын стратегийн хөгжилд томоохон байр суурь эзлэдэг, тэргүүлэх салбар төдийгүй далайд гарцгүй, өргөн уудам нутаг дэвсгэртэй манай орны хувьд гадаад ертөнцтэй холбогдох гол гарц гэдгийг онцоллоо.

Иргэний нисэхийн салбарын үйл ажиллагаа жилээс жилд өргөжин тэлж, шинэ шатанд гарах ажлууд эрчимтэй хийгдэж, цаашлаад хөшигийн хөндийн нисэх буудлыг ашиглалтад хүлээн авснаар нисэхийн салбарын хөгжлийг шинэ тавцанд гаргаад зогсохгүй ерөнхий зориулалтын агаарын тээвэр, үйлдвэрлэл, нисэхийн боловсон хүчнийг дотооддоо бэлтгэх сургалтыг хөгжүүлэх, үйлчилгээний өрсөлдөөнийг бий болгох боломж, гарцыг хийж хэрэгжүүлэхэд чухал түлхэц болохыг мөн тэмдэглэн хэлэв.