Боловсрол, соёл, шинжлэх ухаан спортын яамны Төрийн нарийн бичгийн дарга Б.Баярсайхан Баянзүрх дүүрэгт баригдаж байгаа 10 дугаар цэцэрлэгийн барилгын явцтай танилцлаа.

“Алтанбулаг ХХК гүйцэтгэгчээр ажиллаж байгаа тус цэцэрлэгийн барилгын явц өнөөдрийн байдлаар 70 хувьтай  байна. Гэрээнийхээ дагуу ирэх есдүгээр сарын 1 гэхэд ашиглалтад оруулахаар ажиллаж байна хэмээн гүйцэтгэгч тал танилцууллаа.

Тус цэцэрлэг нь хөгжлийн бэрхшээлтэй хүүхдэд зориулсан сувилалын цэцэрлэгийн зориулалтаар баригдаж байгаа юм. Нэмэлтээр 3 лифт байрлуулах, дулааны шугам сүлжээний эх үүсвэрийг тодорхой болгох, холбогдох байгууллагаас зөвшөөрөл авахад яамны зүгээс дэмжлэг үзүүлэхийг хүслээ.

Төрийн нарийн бичгийн дарга Б.Баярсайхан, Улсын хэмжээнд хоёрхон байдаг тусгай хэрэгцээт боловсрол шаардлагатай хүүхдэд зориулсан цэцэрлэгийн нэг нь энэ. Хүлээлт маш их байгаа ч барилгын ажлыг чанартай гүйцэтгэхийг санууллаа.  Зохион байгуулалтаа сайжруулах, хүн хүчээ нэмэгдүүлэх, өдрийн ажиллах цагаа уртасгахыг үүрэг болголоо.

Дулааны шугам сүлжээтэй холбоотой асуудлыг БСШУСЯ-ны Үйлдвэрлэлийн хэлтэс, Улаанбаатар хотын орон сууц, нийтийн аж ахуйн газар, Дулааны шугам сүлжээ ТӨХК, гүйцэтгэгч компанийн хамтарсан уулзалт зохион байгуулж, шийдэхээр тогтлоо.