Шинжлэх ухаан технологийн их сургууль хичээлийн шинэ жилээ нээлээ. Нээлтийн арга хэмжээнд Улсын Их Хурлын дарга Г.Занданшатар, УИХ-ын гишүүн, засгийн газрын гишүүн, Боловсрол, соёл, шинжлэх ухаан, спортын сайд Ё.Баатарбилэг болон бусад хүндэт зочид, эрдэмтэн багш нар тус сургуулийн оюутан залуус оролцлоо.

БСШУС-ын сайд Ё.Баатарбилэг хичээлийн шинэ жилийг нээж хэлсэн үгэндээ:

“Монгол Улсад дээд боловсролын салбарын орчин үеийн өөрчлөлт шинэчлэлийг манлайлж их сургуулийн удирдлагын нэгдсэн систем, “Нээлттэй боловсрол” сургалтын систем, инженерийн боловсролд олон улсын CDIO стандарт нэвтрүүлж, байгууллагын болон хөтөлбөрийн магадлан итгэмжлэл хийлгэсэн та бүхэнд хичээлийн шинэ жилийн баярын мэнд дэвшүүлье. Шинжлэх ухаан технологийн их сургууль энэ онд тохиож буй түүхт 60 жилийн ойгоо сургалтын хөтөлбөрүүдээ шинэчилсэн, үндсэн сурах бичгүүдээ орчин үеийн стандартын дагуу шинээр хэвлүүлэн гаргасан, эрдэм шинжилгээ инновацийн дэд бүтцээ өргөжүүлэн бэхжүүлсэн, яамны дэмжлэгтэйгээр Япон Улстай хамтарсан Инженер технологийн дээд боловсрол төсөл, Азийн хөгжлийн банкны Дээд боловсролын шинэчлэлийн төслийг амжилттай хэрэгжүүлсэн. Олон улсын Робокон-2019 тэмцээнд оюутан залуус нь өндөр амжилт гаргасан зэрэг олон сайхан амжилтаар угтаж байгаад чин сэтгэлийн халуун баяр хүргэж байгааг хүлээн авна уу. БСШУСЯ-наас дээд боловсролыг түүн дотроо инженерийн дээд боловсролыг дэлхийн хэмжээнд хүргэж чанаржуулах өрсөлдөх чадварыг дээшлүүлэх, төгсөгчдийг ажлын байраар хангаж, аж үйлдвэрийн дөрөвдүгээр хувьсгалын эрин үед улс эх орны хөгжил дэвшлийг хурдасгах талаар олон чухал зорилт дэвшүүлэн ажиллаж байна. Энэ бүхнийг хийж хэрэгжүүлэхэд бидний идэвхтэй хамтын ажиллагаа нэн чухал бөгөөд яамны зүгээс боломжтой бүхий л талаар дэмжин ажиллах болно. Оюутан залуус Та бүхэн Монгол Улсын ирээдүйн хөгжлийг түүчээлэн авч явах хариуцлагатай бөгөөд хүндтэй үүргийг хүлээн, энэ сургуулийн төгсөгчдийн амжилтыг улам ахиулж, эх орноо цогцлоон хөгжүүлнэ гэдэгт итгэлтэй байна.Энэ завшааныг ашиглан ШУТИС-ийн нийт профессор багш нар, ажилтнууд, оюутан суралцагчид, үе үеийн ахмадууд, төгсөгчдөд ШУТИС-ийн 60 жилийн ойн баярын халуун мэндийг өргөн дэвшүүлж, сурлага, хөдөлмөрийн өндөр амжилт хүсэхийн сацуу хичээлийн жилийн мэнд-Эрдмийн баярын мэндийг дахин дэвшүүлж, хамгийн сайн сайхан бүхнийг хүсэн ерөөе” гэв.