Улсын Их Хурлын Аюулгүй байдал, гадаад бодлогын байнгын хорооны өнөөдрийн (2019.09.12) хуралдаан 13 цаг 10 минутад гишүүдийн 52,6 хувийн ирцтэй эхэлж, есөн асуудал хэлэлцэн шийдвэрлэв.

Хуралдаанаар Засгийн газраас 2019 оны 06 дугаар сарын 14-ний өдөр өргөн мэдүүлсэн Экспортын зээлийн тухай Монгол Улсын Засгийн газар, Бүгд Найрамдах Беларусь Улсын Засгийн газар хоорондын ерөнхий хэлэлцээрийг соёрхон батлах тухай хуулийн төслийг хэлэлцсэн.

Монгол Улсын Засгийн газар, Бүгд Найрамдах Беларусь Улсын Засгийн газар хооронд 50 сая еврогийн "Зээлийн ерөнхий хэлэлцээр”-ийг 2019 оны 04 дүгээр сарын 19-ний өдөр гарын үсэг зурж байгуулаад байна. Энэхүү зээлийн ерөнхий нөхцөл нь эргэн төлөгдөх хугацаа 7 жил, үндсэн төлбөрөөс чөлөөлөгдөх хугацаа 2 жил байна.

Олон улсын валютын сангийн аргачлалаар энэхүү зээлийн хөнгөлөлтийн түвшин 17.42 хувь байгаа бөгөөд Монгол Улсын Өрийн удирдпагын тухай хуулиар хөнгөлөлттэй зээлийн ангилалд хамаарч байна. Экспортын зээлийн ерөнхий хэлэлцээрийн хүрээнд хэрэгжүүлэх төслүүдийг хоёр улсын Засгийн газар цаашид тохиролцох бөгөөд эхний ээлжинд Онцгой байдлын ерөнхий газарт гал унтраах машин, тоног, төхөөрөмжийг нийлүүлэхээр төлөвлөжээ.

Засгийн газар хоорондын ерөнхий хэлэлцээрийг соёрхон батлах тухай хуулийн төслийг хэлэлцэх үеэр УИХ-ын гишүүд асуулт асууж, байр сууриа илэрхийллээ.

УИХ-ын гишүүн Ж.Энхбаяр:

"Беларусь улс Монгол Улсын хөдөө аж ахуйн салбарт маш их үүрэг гүйцэтгэсэн. Беларусийн Белаз машинаар олон ч ажлууд хийгдсэн. Бид саяхан өргөн бүрэлдэхүүнтэй очиж хөдөө аж ахуйн техникийн гайхалтай хөгжлийг харсан. Хөдөө аж ахуй эрчимжүүлэлтээрээ дэлхийд гайхагдаж байна. Монголоос 8 дахин бага газар нутагтаа хэрнээ хөдөө аж ахуйн экспорт нь 8 тэрбум ам.долларт хүрсэн. 10 болгох зорилт тавьсан. Сүүний нийлүүлэлтээр дэлхийд 3 дугаарт бичигдэж байна. Эндээс жишиг авч сүүний үйлдвэр байгуулах туршлага томоохон мэргэжлийн баг үзэж ТЭЗҮ-ээ боловсруулсан байна лээ. Мөн хуучны орон сууцуудад ашиглагдаж байгаа олон лифт Беларусь улсын үйлдвэрлэсэн лифт байдаг.

Тиймээс энэхүү зээлийн ерөнхий хэлэлцээрийн хүрээнд Улаанбаатар хотын барилга, орон сууцны лифт, лифтний тоног төхөөрөмжийг шинэчлэх болон сүү, сүүн бүтээгдэхүүний үйлдвэрлэлийг нэмэгдүүлэх төсөлд хэрхэн зарцуулахаар төлөвлөсөн бэ?"

Ж.Энхбаяр: Беларусь улсын ХАА туршлагаас суралцах ёстой