Ш.Анхмаа 2019.09.24 | Vip76.mn

Нийслэлийн Боловсролын салбарын ажлын хэсгийн ээлжит хуралдаан боллоо

Нийслэлийн Боловсролын салбарын ажлын хэсгийн ээлжит хуралдаан боллоо

Нийслэлийн Боловсролын салбарын хөрөнгө оруулалтын төсөл, арга хэмжээг эрчимжүүлэх Ажлын хэсгийн ээлжит хуралдаан боллоо.

Хуралдаанд Улаанбаатар хотын Захирагчийн ажлын алба, Нийслэлийн Боловсролын газар, Нийслэлийн Худалдан авах ажиллагааны газар, Нийслэлийн Хөрөнгө оруулалтын газар, Нийслэлийн Газар зохион байгуулалтын алба, Нийслэлийн Хот байгуулалт, хөгжлийн газар, “Хэсэгчилсэн инженерийн хангамжийн удирдах газар” ОНӨТҮГ-ын удирдлага, холбогдох албан тушаалтнууд оролцлоо.

2019 оны 9 дүгээр сарын 15-ний өдрийн байдлаар нийслэл хотод 10 сургууль, 17 цэцэрлэг, 3 спорт заалны барилга ашиглалтанд орсон болон Улсын төсвийн хөрөнгө оруулалтаар он дамжин баригдаж буй сургууль, цэцэрлэгийн барилга угсралтын явц 78.0 хувьтай байгаа тухай Нийслэлийн Боловсролын газраас мэдээллээ.

Засгийн газрын 2018 оны 62 дугаар тогтоолоор тусгай зөвшөөрөлтэй аж ахуйн нэгжээс бусад иргэн, аж ахуйн нэгж, байгууллагуудыг түүхий нүүрс хэрэглэхийг хориглосон бөгөөд өөрөө бие даан халаалтын асуудлаа шийдвэрлэж байгаа сургууль, цэцэрлэгийн асуудлыг өнөөдрийн хуралдаанаар мөн хэлэлцлээ.

Монгол Улсын 2019 оны төсөвт батлагдаж газрын асуудал шийдвэрлэх шатандаа явж байгаа 4 байршлын асуудлыг ирэх 7 хоногийн Нийслэлийн Удирдлагын зөвлөлийн хуралдаанд асуудал боловсруулж, танилцуулахыг Нийслэлийн Газар зохион байгуулалтын албанд үүрэг болголоо.