АНУ-ын элчин сайдын яамны төлөөллийг хүлээн авч уулзлаа
2019.09.25

АНУ-ын элчин сайдын яамны төлөөллийг хүлээн авч уулзлаа

МҮЭ-ийн холбооны Ерөнхийлөгч Х.Амгаланбаатар АНУ-ын Элчин сайдын яамны улс төрийн ажилтан ноён Иан Роздилскиг хүлээн авч уулзлаа.

МҮЭ-ийн холбооны төлөөлөл АНУ-ын элчин сайдын яамны улс төрийн хэлтсийн төлөөлөгч нартай жил бүр уулзаж, харилцан мэдээлэл солилцдог уламжлалтай билээ.

Уулзалтын эхэнд ноён Иан Роздилски Монгол улсад улс төрийн ажилтнаар томилогдоод удаагүй байгаа тул Монгол улсын нийгэм, улс төрийн байдал, ҮЭ-ийн холбооны хэрэгжүүлж буй үйл ажиллагааны талаар дэлгэрэнгүй мэдээлэл авахыг зорьсон гэдгээ уламжилав.

МҮЭ-ийн холбооны ерөнхийлөгч Х.Амгаланбаатар МҮЭ-ийн холбооны үйл ажиллагааны тэргүүлэх чиглэл болох Хөдөлмөр эрхлэгчдийн цалин, ХАБЭА, Нийгмийн хамгаалал болон нийгмийн даатгал, Хөдөлмөрийн хяналтын асуудлаар өнөөгийн байдал, холбооны зүгээс авч хэрэгжүүлж байгаа үйл ажиллагааны талаар мөн Хөдөлмөр, нийгмийн түншлэлийн гурван талт үндэсний хорооны үйл ажиллагаа, бүтэц, хэлэлцээр хийх явцын талаар дэлгэрэнгүй танилцуулав.

Энэ үеэр Иан Роздилски АНУ-ын элчин сайдын яамнаас санаачлан Хүүхдийн хөдөлмөрийн эсрэг томоохон төслийг эхлүүлэхээр бэлтгэл ажилдаа орсон байгаа тул энэхүү төслийг аль салбарт түлхүү чиглүүлэх тухай тодруулж байв. Хариуд нь МҮЭ-ийн холбооны Ерөнхийлөгч Х.Амгаланбаатар “1990 он гарснаас хойш ил хэлбэрийн Хүүхдийн хөдөлмөр Монголд ихэссэн, харин одоо бидний нүдэнд ил биш далд хэлбэрийн хөдөлмөр мөн нэмэгдээд байна. Жишээлбэл Монголын уламжлалт нүүдлийн соён иргэншилтэй холбоотойгоор Хөдөө, аж ахуйн салбарт, үйлчилгээний салбарт түлхүү гарч байна. МҮЭ-ийн холбооны дэргэдэх Залуучуудын хорооны зүгээс Хүүхдийн хөдөлмөрийг устгах асуудлаар анхан шатны хороодын хамтын гэрээнд Хүүхдийг ажиллуулахгүй байх гэсэн заалт нэмүүлснээр тодорхой өөрчлөлт гарсан хэдий ч, бусад ҮЭ-ийн хороогүй байгууллагуудад төдийлөн хүрч үйлчилж чадахгүй байна” хэмээн хариуллаа.

Уулзалтын төгсгөлд хоёр орны цаашдын хамтын ажиллагааг хүний эрх, Хөдөлмөрийн хяналт, Хөдөлмөрийн хуулийн чиглэлээр эрчимжүүлж ҮЭ-ийн холбооны салбар, орон нутгийн холбоодоор дамжуулан хамтран ажиллах сонирхолтой байгаагаа илэрхийлж байлаа.