МАН-ын ерөнхий нарийн бичгийн дарга Д.Амарбаясгалан 2016 оны наймдугаар сарын 29-ний өдөр тухайн үеийн Зам, тээврийн хөгжлийн сайд Д.Ганбатад хандан илгээсэн албан бичиг есдүгээр сарын 24-ний өдөр нийгмийн сүлжээгээр тарсан.

Уг албан бичигт МАН-ын гишүүн Н.Энхбаатар УИХ-ын гишүүн Б.Бат-Эрдэнэ, Л.Оюун-Эрдэнэ, Д.Гантулга нарын сонгуулийн сурталчилгааны ажлыг амжилттай зохион байгуулахад чухал үүрэгтэй байсан тул “МИАТ” хувьцаат компанийн дэд захирлаар томилоход дэмжлэг үзүүлэхийг хүсэж байгаагаа илэрхийлсэн байсан юм.

Тэгвэл энэ талаар УИХ-ын гишүүн, ЗГХЭГ-ын дарга Л.Оюун-Эрдэнэ дараах тайлбарыг өгч байна.

Тэрбээр “МИАТ” хувьцаат компанийн дэд захирлын албан тушаал сонгуулийн сурталчилгааны шагнал байсан эсэх талаар тайлбарлахдаа “Шагнал маягаар биш л дээ. Нэг бичиг нийгмийн сүлжээгээр тарсан, харсан. Тодруулъя гэж бодож байна. Яагаад тэр бичиг гарч ирэв, юу болов гэдгийг тодруулж байна. Сонгуулийн дараа тийм бичгүүд авч байсан. Би бичиг өгсөн эсэхээ шүүж байна. Тухайн үед намын даргаар М.Энхболд гэж хүн ажиллаж байсан. УИХ-ын гишүүдээс тийм бичиг нам дээр ирдэг байсан гэдэг. Энэ асуудлыг бүхэлд нь тодруулах нь зүйтэй, бүхэлд нь харах хэрэгтэй гэж бодож байна” гэсэн юм.