Н.Амарзаяа 2019.10.02 | Vip76.mn

Н.Амарзаяа: Орон нутгийн эдийн засгийн бие даасан байдлыг хангах хэрэгтэй

Улсын Их Хурлын Төсвийн байнгын хорооны өнөөдрийн (2019.10.02) хуралдаан гишүүдийн 52,6 хувийн ирцтэй эхэлж, Монгол Улсын 2018 оны нэгдсэн төсвийн гүйцэтгэл, Засгийн газрын санхүүгийн нэгтгэсэн тайлан, “Монгол Улсын 2018 оны төсвийн гүйцэтгэлийг батлах тухай” Улсын Их Хурлын тогтоолын төслийн хоёр дахь хэлэлцүүлгийг хийлээ. Хуралдааныг Улсын Их Хурлын гишүүн Н.Амарзаяа даргалав. 

Монгол Улсын 2018 оны нэгдсэн төсвийн гүйцэтгэл, Засгийн газрын санхүүгийн нэгтгэсэн тайлангийн талаар Засгийн газрын гишүүн, Сангийн сайд Ч.Хүрэлбаатар, Төсвийн байнгын хорооны харьяа төсвийн ерөнхийлөн захирагчийн эрхлэх асуудлын хүрээний байгууллагуудын санхүүгийн нэгтгэсэн тайлан, төсвийн гүйцэтгэлд хийсэн аудитын дүгнэлтийн талаар Монгол Улсын Ерөнхий аудитор Д.Занданбат  нар тус тус танилцуулав.

Энэ үеэр УИХ-ын гишүүн Н.Амарзаяа

2018 онд Монгол улс олон улсын валютын санд хамрагдчихсан эдийн засгийн хувьд хүндрэл бэрхшээлтэй үед аж ахуй нэгж байгууллагуудын тусламжтай төсвийн орлогоо биелүүлж анх удаа ашигтай гарсан жил байлаа.

Орон нутгийн бие даасан байдлыг хангах, тэр дундаа суман дээр бүртгэлтэй байгаа аж ахуй нэгж байгууллагуудын орлогыг сум нь өөрөө авдаг эрх зүйн тогтолцоог эрс шинэчлэл хийх хэрэгтэй гэдгийг хэлээд байгаа юм. Удахгүй 2020 оны төсвийн асуудал яригдана. Тиймээс бид төвлөрлийг сааруулах орон нутгийн бие даасан байдлыг хангах тал дээр анхаарах шаардлага нөхцөл үүссэн байна.

Төсвийн бодлогод суурилсан хөгжлийн бодлого ямар хэмжээнд явааг бид харж байгаа.  Харин үүнийг хөгжлийн бодлогод нийцүүлэн төсвийн бодлогоо тодорхойлох нь бидний ирээдүйд шаардаж байгаа маш том зүйл гэдгийг хэлмээр байна.