Н.Цэрэнбат 2019.10.02 | Яамны хэвлэл мэдээллийн алба

БОАЖЯ “Ахмадын зөвлөх үйлчилгээ”-г бий болголоо

БОАЖЯ “Ахмадын зөвлөх үйлчилгээ”-г бий болголоо

Олон улсын ахмадын өдрийг тохиолдуулан байгаль орчин, аялал жуулчлалын салбарын бодлогыг тодорхойлж, Монгол орны унаган байгалийг хамгаалах үйлсэд гар бие оролцож явсан үе үеийн ахмад ажилтнуудаа БОАЖЯ-наас өнөөдөр хүлээн авч, хүндэтгэл үзүүллээ.

Байгаль орчин, аялал жуулчлалын сайд Н.Цэрэнбат хүндэтгэлийн арга хэмжээнд оролцож, яамны зүгээс хийж, хэрэгжүүлж буй зарим ажлыг танилцуулсан юм. Сайд Н.Цэрэнбат Монгол Улс анх удаа аялал жуулчлалын үндсэн маршрутаа батлуулж чадсаныг онцлоод “Бид зоригтойгоор олон ажлыг эхлүүлж, түүнийгээ ажил хэрэг болгох тал дээр тууштай ажиллах болно” хэмээн илэрхийллээ.

Мөн өнөөдрийн уулзалтад ирсэн ахмадуудын гаргасан санал санаачилгыг бодит ажил хэрэг болгох үүднээс Ахмадын зөвлөх үйлчилгээг бий болгосон талаар мэдэгдсэн юм. Энэ талаар “Засгийн газрын 2016-2020 оны үйл ажиллагааны хөтөлбөрт тусгагдсан Ахмадын зөвлөх үйлчилгээг бий болгох ажлын хүрээнд Байгаль орчин, аялал жуулчлалын яам ахмадуудтай хамтран ажиллах, дэмжлэг үзүүлэх тухай 6 бүлэг, 19 заалттай гэрээ байгуулан ажиллаж байна. Энэхүү гэрээний дагуу тус яамны зарим ахмад ажилтнаар зөвлөх үйлчилгээний ажил хийлгэж байгаа бөгөөд цаашид ч ахмад ажилтан та бүхний арвин туршлага, ур чадварыг түшиглэн байгаль орчныг хамгаалах, нөхөн сэргээх чиглэлээр олон ажлыг хамтран гүйцэтгэх зорилт тавьж ажиллах болно” хэмээн мэдэгдсэн юм.