УИХ-ын чуулганы өнөөдрийн (2019.10.04) нэгдсэн хуралдаанаар Д.Ганзоригийг Зэвсэгт хүчний Жанжин штабын даргаар томилох эсэх асудулыг хэлэлцлээ.

Зэвсэгт хүчний Жанжин штабын даргаар ажиллаж байсан А.Ганбат үүрэгт ажлаасаа өөрийн хүсэлтээр чөлөөлөгдсөн тул Монгол Улсын Ерөнхийлөгч хуульд заасан бүрэн эрхийнхээ хүрээнд Довчинсүрэнгийн Ганзоригийг Зэвсэгт хүчний Жанжин штабын даргаар томилох асуудлыг зөвшилцөх тухай албан бичгийг 2019 оны 10 дугаар сарын 01-ний өдөр Улсын Их Хуралд хүргүүлсэн. 

Зэвсэгт хүчний Жанжин штабын даргаар томилох асуудалтай холбоотойгоор УИХ-ын гишүүд асуулт асууж, үг хэллээ. 

УИХ-ын гишүүн Б.Бат-Эрдэнэ.

"Дэмжиж байна. Д.Ганзориг генерал бол ЗХЖШ-ын даргаар ажиллах шаардлагуудыг хангасан боловсон хүчин. Ажлаа сайн хийнэ. Энэ бол амаргүй алба. Цэргийн анги байгууллгаа дээрх сахилга хариуцлага дэг журмын асуудлыг шинэ шатанд гаргахгүй бол энэ асуудал хүнд нөхцөлд хүрсэн зүйл бий шүү. Нийгмийн нөхцөл байдалтай холбон тайлбарлаж болох ч төрд тангараг өргөсөн алба хаагчдын хандлага ухамсар дээр анхаарахгүй бол хангалтгүй зүйл их байна.

Намайг цэргийн алба хааж байхад манай шадар дарга нар цэргүүдтэйгээ яг хамт ажилладаг байсан. Одоо өөр маягаар ажиллаад байгаа харагдах болсон. Энд хүний эрх зөрчигдөж, эрүүл мэнд, амь нас хохирох явдал давтагдсаар байна.

Би энэ салбарын сайдаар ажиллаж байхад иргэний хяналт, төсвийн хяналт, үйл ажиллагааг хуулийн хүрээнд нээлттэй байлгах талаар их ажилласан. Гэхдээ энэ салбарынхан их нуух дуртай хүмүүс шүү. Дахиад ингээд нуугаад эхэлбэл асуудал ужиграх байдалд орно шүү. Үүндээ анхаараарай.

Батлан хамгаалах яаманд ямар ч мэдээлэл өгдөгүй байхад хууль, журмыг нь батлаад өглөө бүр бүх анги нэгтгэлийн мэдээ мэдээллийг БХЯ-ны жижүүрт ирүүлж байх зохицуулалт хийсэн. Ахиц гарсан. Үүнийг анхаарч үргэлжлүүлэх хэрэгтэй. Улсын төсөвтэй холбоотой ч асуудал гарч байсан. Ангийнхаа алба хаагчийн цалингийн картын мөнгийн 200, 300 сая төгрөг авчихсан асуудал өнөөдөр ч хууль шүүх дээр явж байгаа. 

Улс төрийн нам, улс төрчийн хамаарал энэ салбарт нөлөөлж байсны уршиг эхнээсээ харагдаж байгаа. Батлан хамгаалах салбар бол улс төр, хэн нэг албан тушаалтнаас хараат байх ёсгүй. Өмнө нь ажиллаж байсан Ганбат генерал иймэрхүү нөхдийг албаа авсан даруйдаа чөлөөлж, хариуцлага тооцсон тухай би уншиж байсан. Энэ бол зөв."