2019.10.04

Ж.Энхбаяр: УИХ, Засгийн газар, Ерөнхийлөгч гэсэн 3 институцийн "толгой"-г олох нь чухал

УИХ-ын чуулганы өнөөдрийн /2019.10.04/ үдээс хойших хуралдаан эхэллээ. Хуралдаанаар Ард нийтийн санал асуулга явуулах, Монгол Улсын Үндсэн хуулийн нэмэлт, өөрчлөлтийн эхийг батлах тухай Улсын Их Хурлын 2019 оны 73 дугаар тогтоолд бүхэлд нь тавьсан Монгол Улсын Ерөнхийлөгчийн хоригийг хүлээн авах эсэхийг хэлэлцэж байна. 

Хэлэлцэж буй асуудалтай холбоотойгоор УИХ-ын гишүүд үг хэлж, асуулт асуулаа. 

УИХ-ын гишүүн Ж.Энхбаяр:

"1992 онд батлагдсан Үндсэн хууль Монгол Улсын нийгмийн амьдралыг зохицуулаад 30 аад жил өнгөрлөө. Энэ хугацаанд Монголын ард түмэн өөрчлөгдөх шаардлагатай гэдгийг ойлгосон. Гэхдээ хэрхэн өөрчлөх тухай олон санаа гарсны гол түлхүүр нь Үндсэн хууль байсан.

19 жилийн өмнөх Үндсэн хуулийн цэцийн дүгнэлтийг хараад сууж байна. 1999.12.23 онд хийгдсэн өөрчлөлт нь ҮХЦ-ээс санал аваагүй, Ерөнхийлөгчөөс санал аваагүй, олон нийтээр хэлэлцээгүй гэж Үндсэн хууль зөрчсөн зүгнэлт гарсан байна. Энэ хуулийг баталсан хүмүүс ч энд зарим нь сууж байна. Энэ сургамж дээрээ үндэслээд цэцэд өргөн мэдүүлж, Ерөнхийлөгчтэй зөвшилцөөд ард нийтээсээ санал авая гээд асуудлаа боогоод оруулаад ирлээ.

Бидний хамгийн гол асуудал бол засаглалын өөрчлөлт. Бүх асуудал энд байгаа. УИХ, Засгийн газар, Ерөнхийлөгч гэсэн 3 асуудлын толгойг олох, үүнийг дагаад орон нутаг, нутгийн удирдлага болоод байна. Ерөнхийлөгчийн хоригийг УИХ хүлээн авбал улс төр нийгмийн ямар асуудал үүсэх вэ? Эсвэл хүлээж авахгүй бол яах вэ?

Д.Лүндээжанцан даргаас асууя. Хуулийн эх барьж байгаа хүний хувьд. Нийгэм, эдийн засгийн өөрчлөлтийг бид хийхгүй бол ирэх онуудад бий болох зүйлийг нийгэм дийлэх үү?"

Түүний асуултад Ерөнхийлөгчийн тамгын газрын дарга З.Энхболд, УИХ-ын гишүүн Д.Лүндээжанцан нар хариуллаа.