Улсын Их Хурлын Аюулгүй байдал гадаад бодлогын байнгын хорооны өнөөдрийн (2019.10.08) хуралдаан эхэллээ. Хуралдаанаар Нэмэлт санхүүжилтийн зээлийн хэлэлцээрийн төсөл болон Засгийн газар хоорондын санхүүгийн хэлэлцээрийн төслүүдийг хэлэлцэнэ.

Хуралдаанаар Монгол Улсын Засгийн газар, Бүгд Найрамдах Франц Улсын Засгийн газар хооронд байгуулах Санхүүгийн хэлэлцээрийн төслийг зөвшилцөв. Засгийн газраас 2019 оны 10 дугаар сарын 01-ний өдөр ирүүлсэн уг төслийн талаар Улсын Их Хурлын гишүүн, Засгийн газрын гишүүн, Сангийн сайд Ч.Хүрэлбаатар танилцууллаа.

УИХ-ын гишүүн Б.Бат-Эрдэнэ

Зээлийн хэлэлцээрийг дэмжиж байгаа. Батлан хамгаалахын яамтай ярилцаад хэрэгцээтэй тоног төхөөрөмж авах юм байна. Одоо яг үүсэж байгаа зүйл дээр Онцгой байдлынхан онцгой анхаарч ажиллахгүй бол болохгүй нь байна шүү. Өчнөөн мянган өрхүүдэд тараацан маргаашнаас хөрсөн дээр цочир хүйтрэнэ. Энэ арай л болохгүй байна.

Энэ шахмал түлш чинь ердийн галлагаатай зууханд түлэх ямар ч боломжгүй юм байна шүү дээ яаралтай арга хэмжээ авахгүй бол болохгүй байна даа байнгын хорооны даргаа. Хичнээн арван хүний хордлоготой асуудал үүссэн төр энэ дээр арай л хөшүүн хойрго хандаад байна даа.