Улсын Их Хурлын чуулганы өнөөдрийн /2019.10.10/ үдээс хойших нэгдсэн хуралдаанаар Монгол Улсын Засгийн газар, Холбооны бүгд найрамдах Герман Улсын Засгийн газар хоорондын “Монгол-Германы хамтарсан ашигт малтмал технологийн их сургууль төслийн санхүүгийн хамтын ажиллагааны хэлэлцээр болон гэрээг соёрхон батлах тухай” хуулийн төслийг соёрхон батлах асуудлыг хэлэлцэж баталлаа.

Хэлэлцэж буй асуудалтай холбоотойгоор УИХ-ын гишүүд асуулт асууж, үг хэллээ. 

УИХ-ын гишүүн Ц.Цогзолмаа:

"Боловсролын шинэчлэлд энэ сургууль шинэ дэвшил авчирсан. Эх орондоо гадаадын өндөр стандарттай боловсролыг эзэмших боломж нээгдсэн. Элсэгчдийн тоо нэмэгдсээр байна. Бид бие даасан төрт улсын хувьд дээд боловсролын хэмжээнд их сургуулийн кампусыг тал талаасаа анхаарч дэмжих ёстой. Тиймээс энэ зээлийн хэлэлцээрийг дэмжин хэлэлцэж байна.

Оюутан хүн бол зөвхөн сургалтын орчинд өндөр мэдлэг эзэмших ёстой. манайх шиг дэлгүүр баарны хажууд сургууль нь байдаг дэлхийн улс байхгүй. Тиймээс энэ төслийг дэмжих ёстой. Энэ сургуулийн үйл ажиллагааг орон нутгийн удирдлагууд ч дэмжиж улам өргөжүүлэх чиглэлд санаачлагатай ажиллах ёстой. Бусад их дээд сургууль ч энэ туршлагыг хэрэгжүүлэх хэрэгтэй.

Ингэж шийдэж чадвал жил бүр 90 гаруй мянгаар нэмэгдэж байгаа оюутнууд нийслэлийн төлөвлөлтийн асуудал ч цаад утгаараа шийдвэрлэгдэх боломжтой юм."