Улсын Их Хурлын чуулганы өнөөдрийн /2019.10.11/ үдээс хойших нэгдсэн хуралдаанаар УИХ-ын гишүүн С.Бямбацогтын асуулга болох сайжруулсан түлшний талаарх Засгийн газрын мэдээллийг сонсч байна. Асуулгын хариуг Шадар сайд Ө.Энхтүвшин танилцууллаа.

Асуулгын хариутай холбогдуулан УИХ-ын гишүүд асуулт асуулаа. 

УИХ-ын гишүүн О.Баасанхүү:

"Мэргэжлийн харижлт авах гэж мэргэжлийн сайд нарыг томилдог. Зарим хүмүүсийн тархин дахь удааг арилгах гэж хэлээд байна гэж та хэнийг хэлээд байна вэ? Ерөнхийлөгчийг үү? усанд ордоггүй гэж доромжлоод байдаг гэр хорооллынхоныг хэлээд байна уу? 159 хүн угаартсан. Цаашид нэмэгдэх гээд байна гээд байхад инээх зүйл байхгүй. Энэ шадар сайдаа огцруул.

Эрчим хүчний сайдаас асуух зүйл байна. Одоо асуудал гарсан байна уу үгүй юу? Та асуудал гарвал огцорно гэж та хэлсэн. 11 сард зам ашиглалтанд орохгүй бол огцорно гэж хэлж байсан сайд миний хажууд сууж л байна. 11 сар болох гэж байна. Зам чинь гараагүй байна. Та огцрох уу? Ийм олон хүн угаартаад нас барчихаад байна. Хэн хариуцлага хүлээх вэ? Эрүүгийн хэрэг үүсгэсэн үү? хүн үхвэл хэрэг үүсгэдэг. 6 хүн нас барчихаад байна. Хэнийг хариуцагчаар нь татсан бэ?Түлшний эзэн үү? Засгийн газар буруутай юу?

Бид утаатай тэмцэхгүй гэж энд суугаагүй. Угаартаад байгаа мэдээлэл гарч байна. Нэг хүн ч гэсэн угаартлаа гэдэгт бид санаа тавих ёстой. 159 хүн угаартчихлаа гэж байхад бид анхаарах ёстой. Хариуцлага хүлээх ёстой.

Бид нараас дээр ажиллана гэсэн учраас л энэ ажлыг өгсөн. хэрвээ чадахгүй юм бол ажлаа өг л дөө. ОХУ, БНСУ-руу явуулсан шинжилгээний хариу хэзээ ирэх вэ? Хариу нь ирээгүй байхад юу мэдээлээд байгаа юм бэ? Зүгээр гэж хэн хэлсэн юм бэ?"

Түүний асуултанд Эрчим хүчний сайд Ц.Даваасүрэн хариуллаа.