УИХ дахь Шударга иргэдийн нэгдсэн эвсэл нам (ШИНЭН)-ын зөвлөлийн өнөөдрийн хуралдаанаар Оюутолгой ордыг ашиглах хөрөнгө оруулалтын гэрээний хэрэгжилтийг шалгаж санал, дүгнэлт гаргах үүрэг бүхий ажлын багийн дүгнэлтийг хэлэлцэж, Засгийн газарт шаардлага хүргүүлэхээр болжээ.

Энэ талаар УИХ-ын гишүүн Ж.Батзандан, “Оюутолгой төслийн хөрөнгө оруулалтын гэрээг өөрчлөхийг манай нам дэмжиж байгаа. Ингэхдээ тус ордын 51 хувь Монголын ард түмэнд ногдохоор өөрчлөх ёстой юм. Мөн анх Оюутолгой төслийн хөрөнгө оруулалтын гэрээг байгуулахдаа ТЭЗҮ-ийг батлаагүй байхад нь гарын үсэг зурсан.

Тиймээс эхлээд ТЭЗҮ-ийг баталсны дараа гарын үсэг зурж, хуулийн зөрчлийг арилгахыг шаардаж байна. Түүнчлэн Оюутолгой төсөлтэй холбоотой гэрээнүүдийг нууцын зэрэглэлээс гаргахыг шаардаж байгаа юм. Ингэснээр иргэд тус төслийн хэрэгжилт, хөрөнгө оруулалт, зарцуулалтад хяналт тавих боломж бүрдэнэ. Мөн Оюутолгой төслийн валютын урсгалыг Монголбанкаар дамжуулахыг шаардаж байна” гэлээ.

Оюутолгойн ордыг ашиглах хөрөнгө оруулалтын гэрээний хэрэгжилтийг шалгах ажлын багаас энэ оны дөрөвдүгээр сард санал, дүгнэлтээ УИХ-ын Эдийн засгийн байнгын хорооны даргад хүлээлгэн өгсөн юм.

ШИНЭН-ын зөвлөлөөс УИХ-аар хэлэлцэж буй Үндсэн хуульд оруулах нэмэлт, өөрчлөлтийн төслийг энэ долоо хоногт иргэдэд танилцуулж, саналыг нь авахаар төлөвлөсөн байна.

Оюутолгой төслийн гэрээнүүдийг нууцаас гаргахыг шаардав