УИХ-ын гишүүн О.Баасанхүүг "LEAD STYLE.mn сайт “Өглөөний ӨӨДРӨГ 5 асуулт” буландаа урьжээ

-Та өглөө хэдэн цагт босч, ажилдаа гарахаасаа өмнө юу амжуулдаг вэ?

Би ихэвчлэн өглөө 06.00 цагт сэрдэг. Өглөө өөрийнхөө ажлын төлөвлөгөөгөө гаргаж, гэрийнхээ ажлуудаа цэгцэлчихээд 07.30 гээд гэрээсээ гардаг.

Ажилдаа явах замд охиноо сургуульд нь хүргэж өгнө. Бага хүү маань 10 сартай учраас охиноо сургуульд нь хүргэж өгөх ажил надад оногдсон. Ажил дээрээ 08.00 цагт ирдэг.

-Өглөөг ямар бодлоор эхлүүлдэг вэ?

Энэ өдрийг өгсөн бурхандаа талархана. Өнгөрсөн шөнө эцэг эх, найз нөхөд, ойр дотнын хүмүүсээс муу муухай зүйл, өвчин зовлонгийн талаар муу мэдээ сонсоогүйдээ баярлана.

Энэ өдөр ч гэсэн тийм байлгаж өгөөрэй гэж залбирдаг. Өглөө өнгөрсөн шөнийн мэдээллүүд юу байв гэж эхний ээлжид твиттер, фэйсбүүкээ шалгана. Улс оронд маань өнөөдөр юу болох бол, ямар сонин зүйл дуулдах бол, өнөөдөр ямар ажлууд амжуулах билээ. Ажлууд маань сайхан бүтэх байгаа. Хүмүүсийн ажил үйлс сайхан бүтээсэй гэсэн бодлоор өглөөг эхлүүлдэг дээ.

-Та өнөөдөр ямар ажил хийхээр төлөвлөж байна. Ажлынхаа сүүлийн үеийн сонин сайхнаас хуваалцахгүй юу?

Би хагас бүтэн сайн болгонд Эрдэнэт рүү тойрог руугаа явдаг. Иргэд сонгогчидтойгоо уулзаж, тойргийн ядарсан зүдэрсэн айлуудаар орж, ярилцана.

Хууль тогтоомжийн талаар иргэдтэй санал солилцоно. Өнөөдрийн хувьд нэн тэргүүний ажил маань иргэд сонгогчдоос ирүүлсэн өргөдөл захидалтай танилцаж, энэ долоо хоногийн ажлын төлөвлөгөөндөө оруулж хэрхэн шийдүүлэх талаар бодож тунгаана.

Ажлын сүүлийн үеийн сонин сайхнаас гэвэл миний бие Хавдрын эсрэг хуулийн Ажлын хэсгийг ахалж байгаа хүний хувьд 21 аймагт 7 төрлийн хавдрыг үзлэгт, төрийн санхүүжилтээр 40-өөс дээш насны иргэдийг анхан шатны үзлэгт хамруулж байх хуулийн төслийг батлуулсан.

Түүнээс гадна Эрүү, Зөрчлийн тухай хуулийн Ажлын хэсгийн гишүүний хувьд хууль хяналтын байгууллагынхантай уулзаж санал солилцож, хэлэлцүүлэг өрнүүлсэн. Улсын төсөв батлагдах гэж буйтай холбогдуулан албан байгууллагуудын төлөөлөлтэй уулзаж, тойрогтоо ажиллах үеэр орон нутгийн нөхцөл байдал, мөн төсвийн үйл ажиллагаа нь бодит эсэхтэй газар дээр нь танилцлаа. Энэ долоо хоногт төсөв батлагдана.

-Өдрийг өөдрөгөөр эхлүүлэх таны "Аз жаргалын тарни" юу вэ?

Өглөө сэрэх тоолонд өөртөө “Энэрэнгүй байж шударгыг үйлд” гэж хэлдэг. Хүн энэрэнгүй бас шударга байх ёстой. Юунаас ч бүү ай, хэзээ ч бүү бууж өг гэдэг үгэнд дуртай. Хүний амьдралд янз бүрийн юм тохиолдоно.

Аз жаргалтай амьдаръя гэвэл айдасгүй амьдрах хэрэгтэй. Бэрхшээлд амархан бууж өгч болохгүй. Хэзээ ч бууж өгдөггүй юм шүү гэсэн бодлоор өөрийгөө цэнэглэдэг.

-Залуучууддаа хандан хамгийн гоё зөвлөгөөг өгөхгүй юу?

Би одоо 45-тай. Өөрийгөө залуу гэж боддог. Бүх юм тэгээс эхэлнэ. Би 22 настай байхдаа багшийнхаа машинд сууж явахдаа “Хэзээ би тань шиг болох уу?” гэж асууж билээ.

Багш маань хариуд нь “Чи таван жилийн дараа надаас мундаг болно шүү дээ” гэж хэлсэн. Гэтэл би таван жилийн дараа багшийнхаа унадаг машинаас илүү сайныг уначихсан, бас өөрийн гэсэн байртай болсон байсан. Өнөөдрийн харагдах байдлаар маргаашийг дүгнэж болохгүй. Ирээдүй үргэлж сайхан байдаг.

Хамгийн гол нь нэг зүйлд итгэх хэрэгтэй. Тэр нь юу вэ гэхээр та зүтгэвэл жил болгон таны нөхцөл байдал сайжирна, боломж үргэлж гарч ирнэ. Харин та үүнд бэлэн үү гэж өөрөөсөө асуугаарай. Гэнэт танд НҮБ-д ажиллах урилга ирэх ч юм бил үү.

Гэтэл та бэлэн биш, ямар ч хэл усгүй, боловсролгүй бол яах вэ? Дараа жил нь танд Ерөнхий сайд болох хүсэлт ирдэг. Та бас л бэлтгэлгүй байдаг... Эндээс юу хэлэх гээд байна вэ гэхээр боломж танд хэзээд ирж мэдэх тул үргэлж бэлэн бай гэж залуучуудад зөвлөмөөр байна.

О.Баасанхүү "Боломж танд хэзээд ирж мэдэх тул үргэлж бэлэн бай"