МҮЭ-ийн холбооноос арваннэгдүгээр сарын 14-ний өдөр Монгол улсын Ерөнхийлөгч Х.Баттулгад НДШ-ийг 2020 оноос нэмэгдүүлэх асуудлаар Төсөвт хориг тавих тухай хүсэлтийг хүргүүлсэн билээ.

Энэ хүрээнд Монгол улсын Ерөнхийлөгчийн Хүний хөгжил, нийгмийн бодлогын зөвлөх Д.Үүрийнтуяа, хуулийн зөвлөх Д.Отгонбаяр нар өнөөдөр МҮЭ-ийн холбооны удирдлагуудыг хүлээн авч уулзлаа. Монгол улсын Ерөнхийлөгчийн Хүний хөгжил, нийгмийн бодлогын зөвлөх Д.Үүрийнтуяа “Бид та бүхний НДШ-ийн асуудлаар Сангийн яам, ХНХЯ-ны гадаа хийсэн жагсаал цуглааныг мэдэж байгаа.

Тиймээс төрийн тэргүүний хувьд НДШ-д хориг тавихаа зарласан. Хориг тавих ажлын хэсэгт МҮЭ-ийн холбоо, ажил олгогч, ХАҮТ-ын төлөөллийг оруулан гишүүдэд тайлбар хийхийг хүсч байна” гэв. Энэ үеэр МҮЭ-ийн холбооны ерөнхийлөгч Х.Амгаланбаатар “Бидний тавьж байгаа гол асуудал бол нийгмийн зөвшлийн гурван талт хэлэлцээр байгаа юм.

Үүнд нэгд, 2019-2020 оны хэлэлцээрт НДШ-ийг нэмэхгүйгээр тохирсон боловч 2020 оны төсөвт бидэнтэй хэлэлцэлгүйгээр оруулж ирсэн. Бид долоодугаар сард төсвийн тухай хуулийн төсөлд санал өгсөн. Хоёрт, ХАБЭА-н зардлыг төсвийн зардлын ангилалд оруулж төсөвт тусгах тусгай асуудлын хүрээнд бид Монгол улсын Ерөнхийлөгчийг хориг тавьж хамтран ажиллахыг хүссэн.

2020 онд НДШ-ийг хоёр хувь нэмэхээр нэг татвар төлөгч 34.7 хувийн татвар өгөхөөр байна. Энэ бол татвар төлөгчдөд хүндээр тусахаар байна. Энэ нь эргээд цалин хөлсийг 2020 онд инфляцтай уялдуулж найман хувь нэмнэ гэсэн тохиролцоо үгүй болно гэсэн үг. Тиймээс энэ бүхэн бидний хөдөлмөрийн маргааныг цаашид үргэлжлүүлэх гол гогцоо болж байна” хэмээв.

Уулзалтын төгсгөлд Монгол улсын Ерөнхийлөгчийн тамгын газраас зүгээс хориг тавих болсноо илэрхийлж, Хориг тавих ажлын хэсгээс УИХ-д уг асуудлыг танилцуулахаар боллоо.