Ё.Баатарбилэг 2019.11.20 | Яамны хэвлэл мэдээллийн алба

Эрдэнэбатхан сайдын хүргэж өгсөн оюутнуудын материалыг 93 жилийн дараа Ё.Баатарбилэг сайдад гардуулжээ

Эрдэнэбатхан сайдын хүргэж өгсөн оюутнуудын материалыг 93 жилийн дараа Ё.Баатарбилэг сайдад гардуулжээ

Монгол Улсын Боловсрол, соёл, шинжлэх ухаан, спортын сайд Ёндонпэрэнлэйн Баатарбилэг Бүгд Найрамдах Франц Улсын Лицей Мишле ахлах сургууль болон Сорбоны их сургуулийн үйл ажиллагаатай 2019 оны 11 дүгээр сарын 18-ны өдөр танилцлаа.

Лицей Мишле ахлах сургуулийн захирал Бизет Эрик “Манай сургуульд 1930 оноос хойш Монгол сурагч суралцаж байгаагүй, монгол сурагчдыг манайд ирж суралцахыг урьж байна” гээд сургуулийн архивт хадгалагдаж буй монгол төгсөгч Ж.Дүгэрсүрэн, Л. Уртнасан, Л. Намсрай, Б.Аюурзана нарын хувийн хэргийн хуулбар, гэрэл зургуудыг сайд Ё.Баатарбилэгт гардуулан өглөө.

Эдгээр сурагчдыг 1926 онд БНМАУ-ын Ардын гэгээрлийн яамны сайд Эрдэнэбатхан Парист хүргэж өгч байжээ. Тэр үйл явдлаас 93 жилийн дараа Монгол Улсын гэгээрлийн салбарын 32 дахь сайд Ё.Баатарбилэг тус сургуулийг зорин очсон нь энэ байлаа.

ХХ зууны хориод оны дундуур дунд сургууль (долдугаар анги) төгссөн шилдэг 40 сурагчийг Монголын төр, засгаас бодлогоор дэмжиж Герман, Францад сургасан нь хожмоо шинэ Монгол Улсын шинжлэх ухаан, соёл урлаг, аж үйлдвэрийн салбарын тэргүүлэх сэхээтнүүд болсон байдаг.

БСШУС-ын сайд Ё.Баатарбилэг 93 жилийн өмнө монгол оюутнуудын сурч байсан лицей сургуулийн багш, удирдлагуудтай монгол хүүхдүүдийг өнөө цагт дахин сургах асуудлаар харилцан санал солилцов.