“Оюу толгой” компанийн хөрөнгө оруулалттай “Говийн Оюу хөгжлийг дэмжих сан”-ийн хамтран санхүүжүүлсэн Мах боловсруулах үйлдвэрийг арваннэгдүгээр сарын 25-ны өдөр Өмнөговь аймгийн Даланзадгад суманд ашиглалтад оруулав.

Үйлдвэрийн үйл ажиллагааг “Гүүд Рүүт Интертрэйдинг" компани эрхлэн явуулах юм. Тус компани нь Өмнөговь аймаг, Германы олон улсын хамтын ажиллагааны нийгэмлэг (GIZ), “Говийн Оюу хөгжлийг дэмжих сан”, “Оюу толгой” компанийн хамтран байгуулсан “Бизнесийн инноваци хөгжлийн төв”-ийн Өмнөговь дахь салбарын Жижиг, дунд бизнес эрхлэгчдийг чадавхжуулах сургалтад хамрагдаж ийнхүү үйлдвэрээ нээж байна.

“Гүүд Рүүт Интертрэйдинг" компанийн нядалгааны цэг бүхий мах ангилан ялгах, боловсруулах, хадгалах үйлдвэрийг нийт 4.775 тэрбум төгрөгөөр барьж байгуулсан бөгөөд “Говийн Оюу хөгжлийг дэмжих сан” 975 сая төгрөгийн санхүүжилтийг гаргасан юм.

Энэхүү үйлдвэр нь Өмнөговь аймгийн тогтвортой хөгжилд чухал нөлөө үзүүлэх томоохон төсөл төдийгүй тус аймагт эрүүл ахуйн шаардлага хангасан нөхцөлд малыг төхөөрч, олон улсын чанарын стандартад нийцсэн мах, махан бүтээгдэхүүн үйлдвэрлэх боломжтой боллоо.

Мах боловсруулах үйлдвэр нь өдөрт 100 бог, 20 бод мал нядлах хүчин чадалтай, 200 тонн багтаамжтай бүрэн тоноглогдсон гүн хөлдөөх агуулахтай, микробиологи болон химийн лаборатори бүхий иж бүрэн үйлдвэр юм.

Тус үйлдвэр ашиглалтад орсноор орон нутагт шинээр арван ажлын байр бий болж байна. “Гүүд Рүүт Интертрэйдинг" компани Өмнөговь аймгийн Мал эмнэлгийн газартай түүхийн эдийн чанарын шалгалт дээр хамтран ажиллаж байгаа бөгөөд менежментийн зөвлөх үйлчилгээний "Алтернатив Ренювэйбл Энержи" компанитай хамтран хүнсний бүтээгдэхүүний үйлдвэрлэлээс тээвэрлэх явцад бий болох эрсдлийг үнэлэх тогтолцоо болох “HАССР” стандартыг нэвтрүүлэхээр ажиллаж байна.

“Оюу толгой” компани 2010-2019 оны III улирлын байдлаар Өмнөговь аймгийн хэмжээнд 523 сая ам.долларын худалдан авалт хийжээ. Харин “Говийн Оюу хөгжлийг дэмжих сан” 2015 оноос хойш Өмнөговь аймгийн хэмжээнд 45.8 тэрбум төгрөгөөр 163 төсөл, хөтөлбөр санхүүжүүлсэн бөгөөд тэдгээр төсөл, хөтөлбөрүүдийн үр шимийг 390,000 гаруй иргэн хүртэж, 391 ажлын байр бий болгосон байна.

Өмнөговь аймаг мах боловсруулах иж бүрэн үйлдвэртэй боллоо