Монгол Улс, ОХУ, БНХАУ-ын Төрийн тэргүүн нарын удаа дараагийн уулзалтуудаар яригдсан ОХУ-аас БНХАУ руу байгалийн хий дамжуулах хоолойг Монгол Улсын нутаг дэвсгэрээр дамжуулах асуудлыг яаралтай ажил хэрэг болгох үүднээс 2019 оны 09 дүгээр сард Монгол Улсын Эрчим хүчний Сайд Ц.Даваасүрэн, ОХУ-ын Эрчим хүчний Сайд А.В.Новак нарын хийсэн уулзалтаар Гурван Улсын Эрчим хүчний яамд, холбогдох компаниудын оролцоотой Ажлын хэсгийг яаралтай байгуулан уулзалт, яриа хэлэлцээрүүдийг эхлүүлэхээр тохиролцсон билээ.

Энэхүү асуудлын хүрээнд Монгол, ОХУ-ын Эрчим хүчний Дэд Сайд нараар ахлуулсан хоёр Улсын Ажлын хэсгийн хуралдаан 2019 оны 12 дугаар сарын 04-ны өдөр Москва хотноо ОХУ-ын Эрчим хүчний яаманд боллоо.

Монголын талын Ажлын хэсгийг Эрчим хүчний Дэд сайд Т.Гантулга ахалж, Эрчим хүчний яам, Уул уурхай хүнд үйлдвэрийн яам, Гадаад харилцааны яам, “Эрдэнэс Монгол” ХХК-ийн удирдлага, холбогдох албан тушаалтнууд оролцлоо.

ОХУ-ын Ажлын хэсгийг Эрчим хүчний Дэд Сайд П.Ю.Сорокин ахалж, ажлын хэсэгт Эрчим хүчний яам, Газпром, Газпром Экспорт компаниудын удирдлага, холбогдох албан тушаалтнууд багтсан юм.

Хоёр талын Ажлын хэсгийн анхны ууззалтаар ОХУ-аас БНХАУ руу байгалийн хий дамжуулах хоолойг Монгол Улсын нутаг дэвсгэрээр дамжуулах төслийн талаар 3 гол асуудлыг хөндөн ярилцлаа. Үүнд төслийн техникийн асуудлыг шийдвэрлэх хүрээнд харилцан мэдээллүүдийг солилцон ажиллах, төслийн эдийн засгийн үр өгөөжийг тооцох судалгааг эхлүүлэх, дараагийн хуралдааныг Гурван улсын ажлын хэсэг төслийг хамтран хэлэлцэх зэрэг сэдвүүдээр ярилцлаа.