Байгууллага, хамт олныхоо дунд эрүүл амьдрах хандлага, зан үйлийг төлөвшүүлэх, ажилчдын эрүүл мэндийг дэмжих орчинг бий болгоход идэвх санаачилгатай  ажиллаж, бусдыгаа манлайлсан байгууллагуудыг өнөөдөр шалгарууллаа.

Нийслэлийн Засаг  даргын хэрэгжүүлэгч агентлагууд болон дүүргүүдийн ЗДТГ-аас  сүүлийн гурван жилийн хугацаанд “Эрүүл ажлын байр” удирдамжийг хэрэгжүүлэн ажиллаж буй юм.

Энэ хүрээнд “Эрүүл ажлын байр”-ыг бүрдүүлсэн шилдэг байгууллагаар нэгдүгээр байрт Нийслэлийн Өмчийн ашиглалт удирдлагын газар, хоёрдугаар байрт нийслэлийн Нийтлэг үйлчилгээний газар, гуравдугаар байртНийслэлийн Бүртгэлийн газар болон Монголын Хүүхдийн ордон тус тус шалгарч, өргөмжлөл, мөнгөн шагналаар шагнуулсан юм. Түүнчлэн нийслэлийн Мэдээлэл технологийн газар, Чингэлтэй дүүргийн Засаг даргын Тамгын газар, Баянзүрх дүүргийн Цагдаагийн 3-р хэлтэс гэх мэт 32 байгууллага тус удирдамжийг хэрэгжүүлэн, үр бүтээлтэй олон ажил хийжээ.

Нийслэлийн Засаг даргын захирамжийн дагуу “Сүрьеэгийн эрт илрүүлгийг нэмэгдүүлж, эмчилгээний чанар хүртээмжийг дээшлүүлье” аян болон “Бэлгийн замаар дамжих халдварыг илрүүлэх шинжилгээнд зорилтот бүлгийн иргэдийг бүрэн хамруулъя” аяны шилдгүүдийг тодруулав.

Сүрьеэгийн тусламж, үйлчилгээний чанар, хүртээмжийг сайжруулах, идэвхтэй эрт илрүүлэг болон хавьтал илрүүлгийн ажлыг эрчимжүүлэх, сүрьеэгийн тархалтыг бууруулах зорилгоор “Сүрьеэгийн эрт илрүүлгийг нэмэгдүүлж, эмчилгээний чанар хүртээмжийг дээшлүүлье” аяны хүрээнд хийж хэрэгжүүлсэн үйл ажиллагаагаараа бусдыгаа манлайлан оролцсон Хан-уул дүүргийн Эрүүл мэндийн төв тэргүүн байрт, Чингэлтэй дүүргийн Эрүүл мэндийн төв 2-р байрт, Налайх дүүргийн Эрүүл мэндийн төв 3-р байрт, Сүхбаатар дүүргийн Эрүүл мэндийн төвийн сүрьеэгийн диспансерийн хамт олон тусгай байрт тус тус шалгарчээ.