Баасанхүү.О 2020.01.02 | Vip76.mn

О.Баасанхүү гишүүн тэтгэврийн зээлийг тэглэх УИХ-ын тогтоолын төсөл боловсруулжээ

УИХ-ын гишүүн О.Баасанхүү тэтгэврийн зээлийг тэглэх УИХ-ын тогтоолын төсөл боловсруулснаа танилцууллаа.

УИХ-ын гишүүн О.Баасанхүү

Монгол Улсын ерөнхийлөгч шинэ оны мэндчилгээн дээр тэтгэвэрийн зээлийг бүхэлд нь нэг удаа тэглэх ҮАБ-ын шийдвэр гаргалаа гэж мэдээлэл хийсэн. Би их хуралд 8 жил сууж байгаа хуульч гишүүний хувьд зарим зүйл дээр байр сууриа илэрхийлэх нь зөв байх гэж бодож байна. 

Ахмадуудыг алагчилж болохгүй. Зээлтэй ахмадуудын тэтгэврийг тэглэх бол зээл аваагүй ахмад настныг мөн орхиж ялгаварлаж болохгүй. Тэдэнд мөн зээл авах боломж олгодог уу,  эсвэл мөнгийг нь олгодог уу боломж олгох ёстой.

УИХ-ын гишүүн хуулийн төсөл санаачлах эрхтэй. Би эрх баригчдаас хоёр асуудлыг тодорхой болгохыг шаардаж байна. Нэгдүгээрт, Салхитын мөнгөний ордыг төрд өмчлөх шийдвэр шүүхээр эцэслэн шийдэгдсэн үү?  Хоёрдугаарт, төрд 230 мянган ахмадын тэтгэврийг тэглэх 776 тэрбум төгрөг байна уу ?

Газар доор байгаа алтыг гаргаж ирэх гурван арга бий. Нэгдүгээрт өөрийнхөө мөнгөөр ухах, эсвэл хэн нэгнээр ухуулаад ашгаа авах. Бонд гаргах замаар шийднэ гэвэл зээл. Тавантолгойн  орд дээр өнөөдрийг хүртэл бонд гаргаж чадаагүй байна.

Маргаантай зүйл дээр хэн ч зээл авахгүй. Гэтэл 776 тэрбум буюу 200 орчим сая ам.доллар хэрэгтэй. Хэрэв мөнгө нь байгаа бол сар шинээс өмнө ахмадуудад зээлийг нь тэглээд, зээл аваагүйд нь мөнгийг нь өгөх хэрэгтэй.

Иймээс би 776 тэрбум төгрөг байна уу ? хэзээ өгөх вэ гэдгээ тодорхой болгох шаардлагатай гэдэг асуудлыг эрх баригчдад хандан тавиад байгаа юм. .

УИХ-ын гишүүд мөнгө угаасан байхад шалгахгүй, 49 ЖДҮ-чдийг зарлахад шийтгэхгүй байна. Энэ үед Ерөнхийлөгч гоё шийдвэр гаргаж байна. Салхитын мөнгөний ордыг эргэлтэд оруулж, тэтгэврийг тэглэнэ гэж байна. Заримыг нь УИХ-ын дарга Монголбанкинд тушаасан. Энэ асуудлаар хэд хэдэн зүйлийг тодруулна. 

Салхитын мөнгөний орд хэний өмч вэ? Хэвлэл мэдээллээс авсан зүйлээс Ян Ман-ы өмч байснаа улсад авсан. 50-150 сая төгрөгийн хахууль авсан хэргээр 6 шүүгч шалгуулж байгаа. Хахууль өгч, мөнгө гаргасан этгээд бас байгаа. Хятадын ЭСЯ оруулсан мөнгөө хамгаална гэсэн. Энэ асуудал шүүхийн дагуу шийдвэрлэгдэнэ.

11 дүгээр сарын мэдээллээр  233034 хүн зээлийн данс нээсэн байгаа. Тиймээс  776 тэрбум төгрөг төлөх хэрэгттэй. Монголд 300 гаруй мянган ахмад тэтгэвэр авдаг. Энэ асуудал хууль санаачилснаар хэлэлцэнэ. Нэгдүгээрт нь Салхитын мөнгөний ордын өмчлөх эзэн шүүхээр шийдвэрлэгдсэн үү. 776 тэрбум төгрөг үнэхээр байгаа юу, төрийн дансанд. Энэ асуудлыг Цагаан сараас өмнө шийдвэрлэх хэрэгтэй. 

У.Хүрэлсүх гитар дараад явж байгаа болохоос ямар ч ажил хийхгүй, утаа хэвээрээ байгаа шүү хэмээв. УИХ-ын гишүүн О.Баасанхүү мэдээлэл хийснийхээ дараа сэтгүүлчдийн асуултад хариулав.