Үндэсний геологийн алба байгуулах тухай хуулийн төсөл УИХ-ын дарга Г.Занданшатарт өргөн барьсан талаар УИХ-ын гишүүн, УУХҮ-ийн сайд Д.Сумьяабазар өнөөдөр мэдээллээ.

Монгол Улсад 1990-ээд оны үед Үндэсний геологийн албыг албан ёсоор татан буулгажээ. Үүнээс хойш 30 гаруй жилийн хугацаанд уул уурхай, геологийн салбарт төрийн бодлого, хараа хяналт суларсан гэдгийг тэрбээр мэдээллийнхээ эхэнд онцоллоо. Тэрбээр, “Үндэсний геологийн албыг шинээр байгуулснаар, Монгол Улсын эдийн засагт тэргүүлэх салбар болох уул уурхай, геологийн салбарыг шинжлэх ухаанч байдлаар олон улсын түвшинд гаргах боломж бүрдэнэ.

Энэ алба нь зөвхөн уул уурхайн геологи хайгуул биш, усны хайгуул, хөрсний судалгаа болон барилга бүтээн байгуулалтад оролцох зэрэг ач холбогдолтой. Олон улсад энэ төрлийн алба нь Үндэсний аюулгүй байдлын зөвлөлийнхөө дэргэд ажиллаж зарим мэдээллээ нууцлах эсэх асуудлыг шийдвэрлэдэг. Монгол Улсад сүүлийн 30 жилийн хугацаанд бий болсон хариуцлагагүй уул уурхай, замбараагүй байдлыг төрийн бодлогоор цэгцэлж, оновчтой, зөв үе шаттай ажил хэрэгжүүлэх шаардлагатай байна” хэмээлээ.

Мөн энэхүү хуулийн төсөл батлагдсанаар, Үндэсний геологийн алба байгуулагдаж, 80 хүний орон тоотойгоор ажиллах бөгөөд цаашид ажлыг өргөжүүлж Геологийн төв лаборатори, АМГТГ-ыг түшиглэн 21 аймагт салбар байгуулах шаардлагатайг тодотгож байлаа.

Үндэсний геологийн алба байгуулах хуулийн төсөл өргөн барилаа