УИХ-ын гишүүн Н.Учрал Их Британийн Букингхамын их сургуульд "Олон улсын менежмент"-ийн мэргэжлээр суралцаж, өнөөдөр төгсөлтөө хийж байгаа тухайгаа өөрийн цахим хуудастаа нийтэлжээ.

Н.Учрал: "Англид 2 дахь сургуулиа төгсөөд төгсөлтийн баяртаа оролцоод итгэл дүүрэн, сэтгэл өөдрөг байна."

Тэрээр энэ тухайгаа: "Суралцах үйл явц бүхэн өөр өөрийн гэсэн өнгө аястай. 2007 онд Малайз улсын дэлхийн 8 улсад салбартай Лимкоквинг /www.limkokwing.net/ их сургуулийг зорьж foundation курсэд сууж үргэлжлүүлэн тус сургуулийн Лондон хот дахь салбарт шилжин суралцаж Англид хос дипломтой төгсөж байлаа. Харин 2 жилийн өмнө хэдийгээр төрийн түшээ болоод удаагүй байсан ч цагийн менежментдээ найдан Их Британий их сургуульд 2 дахь удаагаа мастер хамгаалах зорилгод хөтлөгдөн Букингхамын их сургуульд (www.bucks.ac.uk) элссэн маань "Олон улсын менежментийн мэргэжил" эзэмшихийг зорьсоноос гадна диссертацийн маань кейс болсон "Oxfam" /www.oxfam.org.uk/ хүмүүнлэгийн байгууллагын сонирхолтой менежментийг судлахад оршиж байсан юм. Өмнө нь МУБИС болон Англид мастераа, ОХУ-ын ШУА-ын Сибирийн салбарт докторын зэргээ хамгаалахдаа би жирийн нэг оюутан, цүнхээ үүрээд л хичээлээ бэлдээд төгсөж байсан бол энэ удаад танхимын хичээлд бүтэн цагаар заавал суухгүйгээр онлайн сургалтын хөтөлбөрөөр боловсролын зэргээ ахиулж байна." хэмээн бичжээ.

Тэрээр Улсын Их Хурлын Цахим бодлогын түр хорооны даргын хувьд цахимаар шууд хичээлээ аваад, даалгавар бие даалтаа цахимаар өгч, диссертациа ч цахимаар удирдагч багштайгаа харилцаж болдог гэдгийг энэхүү сургалтаараа харуулахыг зорьжээ.

Харин дипломын хамгаалалтаа өөрийн биеэр тус улсад очиж хамгаалж судалгааны ажилдаа эзэн нь болж чадсан тухайгаа онцолжээ.

Бүх л зүйл орон зайнаас үл хамааран хийж болох шинэлэг сургалтын хэлбэрээр суралцах гарц байгааг, дэлхий хавтгай болсоныг залуучууддаа ойлгуулахыг эрмэлзсэний үр дүн гарлаа. Дипломын удирдагч багш Paul Dudley танд талархаж байна. Боловсролын бүх түвшний хөгжлийн загварыг тодорхойлох алсын хараанд хүч нэмсэн алхам миний гадаад, дотоодод хамгаалсан 4 дахь магистрын зэрэг байлаа.

Их Британий хуулийн дагуу тус улсад мастер, докторын зэрэг хамгаалсан бол 2 жил тус улсад ажиллах эрх өгдөг байна. УИХ-ын гишүүн Н.Учралд 2 дахь удаагаа энэ эрх нээгдэж байгаа хэдий ч тэрээр түмний төлөөх үйлсдээ эх орондоо хүчин зүтгэж байгаа хүн тул олон улсын түвшний боломжуудыг өөртөө бус залуустаа олгох ёстой . Тиймээс зорилготой, тууштай ажиллах болно гэжээ.

Н.Учрал гишүүн орон зайнаас үл хамааран шинэлэг сургалтын хэлбэрээр суралцаж, дөрөв дэх мастерын зэргээ хамгааллаа