Улсын Онцгой комиссын Шуурхай ажлын хэсэг Өмнөговь аймгийн нүүрс экспортын эрсдэлтэй бүс болох Гашуунсухайт, Шивээхүрэн хилийн боомтод ажиллаж, өргөтгөсөн хурлаа Даланзадгад хотод зохион байгууллаа.

Энэ үеэр УИХ-ын гишүүн Л.Энхболд Корона вирусээс урьдчилан сэргийлэх, жолооч нарын эрүүл, аюулгүй байдлыг хангах үүднээс нүүрсний экспортыг түр хугацаанд зогсоох шаардлагатай байгааг онцгой анхаарч ажиллах, энэ талаарх шийдвэрийг яаралтай гаргах тухай саналаа илэрхийллээ.

Өнөөдөр (2020.02.10)-ийн байдлаар Өмнөговь аймгийн Гурвантэс сум дахь “Шивээхүрэн” хилийн боомтод нүүрс тээвэрлэлтийн 50 компани үйл ажиллагаа явуулдгаас өнөөдрийн байдлаар 16 компанийн 400 орчим автомашин нүүрс тээвэрлэж байгаа ажээ.

Шинэ коронавирусийн халдвараас урьдчилан сэргийлэх зорилгоор “Шивээхүрэн боомтод онц халдварт өвчин гарах үеийн ажиллагааны урьдчилсан төлөвлөгөө”-г шинэчлэн баталсан бөгөөд боомтын нөхцөл байдал болон зорчигч, тээврийн хэрэгслийн хил нэвтэрсэн тухай мэдээг хоёр цаг тутамд өгч, холбогдох арга хэмжээ авч буй юм байна.