Энх-Амгалан.Б 2020.02.17 | Vip76.mn

Бодлогыг хөрснөө буулгагч

Vip76.mn сайтын редакцаас эрхлэн гаргадаг Vip Expert сэтгүүлийн энэ удаагийн тусгай дугаар "Монгол төрийн түшээ" хэмээх нэр хүнд, үүрэг хариуцлага, ёс зүй, мэдлэг, туршлага агуулсан сэдвийн хүрээнд бэлтгэн эрхэм уншигч таны өмнө дэлгэж байна. Төр нийгмийн зүтгэлтэн, салбартаа төдийгүй ард иргэдийн хүндлэлийг хүлээсэн эрхэмүүд, эрдэмтэн судлаачид “Монгол Төрийн Түшээ” хүн ямар шинж, төлөвийг цогцлоон бүрдүүлсэн байх ёстойг хэрхэн тодорхойлсоныг уг сэтгүүлээс унших боломжтой бөгөөд өнөөгийн парламентын гишүүдэд олон нийтийн зүгээс өгч буй үнэлгээ, хамгийн өндөр үнэлгээ авсан гишүүд, тэдний хийсэн ажлыг танилцуулж байна.

Өнөөдрийн онцолж буй түшээ бол Монгол Улсын Их Хурлын Гишүүн, Зам, тээврийн хөгжлийн сайд Бямбасүрэнгийн Энх-Амгалан.

Ойрын болон хэтийн өгөөж ихтэй томоохон бүтээн байгуулалтууд Монгол Улсын зам, тээврийн салбарт эрчимтэй өрнөж, салбарын яам энэ бүхнийг оновчтой бодлого, шуурхай удирдлага, зохион байгуулалтаар хангаж чадсанаар сүүлийн жил гаруйхан хугацаанд түүхэн гэж зүй ёсоор үнэлэгдэх хэд хэдэн ажлын ард гараад байгаагийн нэг нь  газрын тос боловсруулах үйлдвэрийн 27 километр төмөр замыг монголчууд өөрсдөө барьсан явдал юм.

Төмөр замын бүтээн байгуулалтад бусдыг царайчлах шаардлагагүйг Тавантолгой-Зүүнбаян чиглэлийн төмөр замын бүтээн байгуулалтын ажил баталж байна. Монголчууд 414.6 км төмөр замыг өөрсдөө барихаар ханцуй шамласан нь хөрш орнууд дахь бидний тухай үнэлэмжийг өсгөж,  “Оросын төмөр замууд” ХНН уг бүтээн байгуулалтад хамтран ажиллах хүсэлтээ Б.Энх-Амгалан сайдад илэрхийллээ. Энэ чиглэлийн төмөр зам баригдсанаар Оюутолгой, Тавантолгой, Цагаан суварга, Хармагтай зэрэг баялаг нөөцтэй орд газруудын үнэ цэн улам нэмэгдэнэ. Мөн Тавантолгой ордын өрсөлдөх чадварыг өсгөх Тавантолгой-Гашуун сухайтын төмөр замын ажил үргэлжилнэ гэдгийг ч Б.Энх-Амгалан сайд мэдэгдээд байна.

Монгол, Орос, Хятадын эдийн засгийн коридор хөтөлбөрийн хүрээнд хэрэгжүүлэх дэд бүтцийн томоохон төслүүд хөрсөн дээрээ бууж, бодит ажил болсноор манай эдийн засагт ихээхэн хэмжээний эерэг үр дагавар авчрах тооцоо судалгаа бий. Зам, тээврийн хөгжлийн сайд болохоосоо өмнө ч энэ чиглэлд анхаарч, ажилласаар ирсэн УИХ-ын гишүүн Б.Энх-Амгалан өдгөө хэрэгжих боломжтой төслүүдэд салбарын сайдын хувиар илүүтэй анхаарал хандуулж байна. Тухайлбал, өнгөрөгч есдүгээр сард “Оросын төмөр замууд” ХНН-ийн Ерөнхий захирал Белозёровтой уулзахдаа Кызыл–Курагино чиглэлийн төмөр замыг Монголын газар нутгаар дайруулах, чиглэл тогтоох асуудлаар тохиролцсон юм.

Автотээврийн салбарт ч бүтээн байгуулалтын олон ажил хийгдэж байна. Зөвхөн энэ онд гэхэд авто замын салбарт нийт 130 гаруй төсөл хөтөлбөр хэрэгжиж байна. Улаанбаатар-Дархан чиглэлийн ная гаруй жилийн түүхтэй авто замын засвар, шинэчлэлийн ажил ирэх оны зургаадугаар сард дуусна. Улаанбаатар-Налайхын замыг сайжруулан, шинэчиллээ. Засгийн газрын үйл ажиллагааны Мөрийн хөтөлбөрт тусгагдсан 21 аймгийг нийслэл хоттой хатуу хучилттай авто замаар холбох ажил өндөрлөх шатандаа явна.

Тээврийн салбарт ч сайн мэдээ олон байна. Төрийн өмчит МИАТ компани агаарын хөлгийн парк шинэчлэл хийж, АНУ-ын Air Lease Corporation компаниас Боинг787-9 Dreamliner агаарын хөлгийг үйл ажиллагааны түрээсээр авч ашиглах гэрээг үзэглэлээ. МИАТ компанийн засвар үйлчилгээний төвийг цаашид Боинг компанийн Ази дахь засварын төв болгохоор ажиллаж байна.  Зам, тээврийн салбарын ажил их, амжилт арвин байгаа нь Б.Энх-Амгалан сайд бодлого зорилтыг бодит ажил болгон хөрснөө буулгаж, сайн ажиллаж чадаж байгаагийн илэрхийлэл юм. 

 ЗАРЧИМДАА ҮНЭНЧ ХҮН

Либеральчлал, менежментийн хувьчлал зэрэг шошгоор халхавчлан төрийн өмчийг үнэгүйдүүлж, дампууруулж, хувьчилж авдаг зальжин аргыг УИХ-ын гишүүн Б.Энх-Амгалан хатуу шүүмжилсээр ирсэн. МИАТ-ийг хувьчлах тухай яригдахад “Манай улс далайд шууд гарцгүй орон учраас стратегийн маш чухал ач холбогдолтой, үндэсний эрх ашигт онцгой нөлөөтэй салбар болох Монголын Иргэний Агаарын Тээврийг либеральчлал нэрийн дор дампууруулчих вий” хэмээн сэрэмжлүүлж байсан. Мөн сонгогдсон тойрогт нь хамаатай асуудал учраас “Уучлаарай, надад нисэхийн салбарт ямар ч хувийн ашиг сонирхол байхгүй. Би Буянт-Ухаагийн буурал дэнж, Өлзийт, Морин даваа, Нисэхийнхний дэмжлэгийг авч төрд сонгогдсон төлөөлөл нь учраас дуугарч байна. Дуугарч ч ирсэн, дуугарах ч болно” гэж тэрээр байр сууриа тов тодорхой илэрхийлсэн билээ.

Хууль тогтоох дээд байгууллагын гишүүний хувиар тэрээр Гэмт хэрэг, зөрчлөөс урьдчилан сэргийлэх тухай, Цэргийн албан хаагчийн тэтгэвэр тэтгэмжийн тухай зэрэг хэд хэдэн чухал хуулийг санаачилж, хамтран боловсруулж УИХ-аар батлуулаад байна.

Эх орондоо өргөсөн эр цэргийн тангарагаа Монгол төрийн түшээгийн тангарагаар улам баталгаажуулсан Б.Энх-Амгалан эрх ашгийн эрэмбийг сайтар мэддэг хүн. “Эх орон, ард түмэн, үндэсний эрх ашгаас дээгүүр ямар ч эрх ашиг байж болохгүй. Энэ бол улстөрчийн хувьд миний баримталж ирсэн, цаашид ч хэлбэрэлтгүй баримтлах хатуу зарчим” хэмээн нэгтээ мэдэгдэж байсан тэрээр энэхүү зарчимдаа үнэнч явна. 

Vip76.mn