Монгол Улсын Их Хурлын гишүүн, Хүнс, хөдөө аж ахуй, хөнгөн үйлдвэрийн сайд Ч.Улаан 2020 оны 2 дугаар сарын 14-15-ны өдрүүдэд Бүгд Найрамдах Австри Улсад ажлын айлчлал хийв.

Айлчлалын хүрээнд НҮБ-ын Аж үйлдвэрийн хөгжлийн байгууллага (ЮНИДО)-ын Ерөнхий захирал Ли Ёнг, Ази, Номхон далайн бүс нутгийг хариуцсан захирал Ральф Бредел болон Хөдөө аж ахуйн хөгжлийн асуудал хариуцсан газрын удирдлагуудтай уулзаж, хоёр талын хамтын ажиллагааг өргөжүүлэх, эрчимжүүлэх асуудлаар тодорхой санал солилцов.

Тухайлбал, хөдөө аж ахуйн салбар нь Монгол Улсын эдийн засгийн хөгжлийн тулгуур салбар гэж Засгийн газраас тодорхойлж, экспортыг дэмжих, эдийн засгийг төрөлжүүлэх чиглэлээр хэрэгжүүлж буй бодлого үйл ажиллагаагаа танилцуулав. Энэ хүрээнд ЮНИДО-той хамтран хэрэгжүүлэх төсөл, хөтөлбөрийн талаар ярилцаж, Монгол Улсын хөдөө аж ахуйн салбарын үйлдвэрлэлийг хөгжүүлэх, орон нутагт хөдөө аж ахуйн агропаркуудыг байгуулах чиглэлээр хамтран ажиллах тухай санал солилцож, Ерөнхий захирлыг Монгол Улсад айлчлахыг урив.

Ерөнхий захирал Ли Ёнг-ийн зүгээс Монгол Улсад ойрын хугацаанд айчлахаа мэдэгдэж, хөдөө аж ахуйн нэмүү өртөг шингээсэн үйлдвэрлэлийг хөгжүүлэхийн чухлыг цохон тэмдэглэж, НҮБ-ын Аж үйлдвэрийн хөгжлийн байгууллагаас Монгол Улсын Засгийн газрыг дэмжин ажиллахаа мэдэгдлээ.

Хүнс, хөдөө аж ахуй, хөнгөн үйлдвэрийн сайд Ч.Улаан Вена хотноо ажиллах үеэрээ мөн Дэлхийн банкны Хөрөнгө оруулалтыг дэмжих нэгжийн удирдлагуудтай уулзаж, хөдөө аж ахуйн салбар руу чиглэсэн гадаадын шууд хөрөнгө оруулалтыг дэмжих, үндэсний жижиг, дунд үйлдвэрүүдийг хөгжүүлэх, тэдгээрийн өрсөлдөх чадварыг сайжруулах асуудлаар хамтран ажиллах талаар санал солилцов. Үүнээс гадна айлчлалын үеэр Австрийн бяслагны жижиг загвар үйлдвэр, хөдөө аж ахуйн сургалт, судалгааны төвийн үйл ажиллагаатай танилцлаа.

Ч.Улаан сайд НҮБ-ын аж үйлдвэрийн хөгжлийн байгууллагад ажлын айлчлал хийлээ