Хамгийн сүүлийн үеийн мэдээллээр, шинэ төрлийн коронавирусийн халдвар авсан нийт 73429 тохиолдол бүртгэгдсэнээс БНХАУ-д 72436 хүн халдварлажээ.

Өнгөрсөн хугацаанд халдварын улмаас нийт 1868 өвчтөн нас барсан бол 12500 хүн эдгэрч, эмнэлгээс гарчээ. Нэг хоногийн дотор халдварын 1886 шинэ тохиолдол батлагдсан бол 98 өвчтөн нас барж, 1701 өвчтөн эмнэлгээс гарсан байна.

Коронавиурсийн халдвар нь дэлхийн аялал жуулчлалын салбарт хүндрэл учруулаад байгаа бөгөөд Монгол Улсад хэрхэн нөлөөлж байгаа талаар БОАЖ-ийн сайд Н.Цэрэнбатаас тодруулахад

“Зөвхөн Монгол төдийгүй дэлхийн аялал жуулчлалын салбарт хүндрэл учирч байна.Дэлхийн аялал жуулчлалын холбооноос Зүүн өмнөд Азийн аялал жуулчлалын салбарын 40 гаруй хувьд хүндрэл учирна гэдэг судалгаа гаргаснаа бидэнд танилцуулсан. Тиймээс бид цаашид энэ өвчлөлийг газар авхуулахгүй байх шаардлагатай байна. Бид халдвар тархаагүй орон хэвээр үлдэж чадах юм бол цаашид Монголд ирэх жуулчдын тоог нэмэгдүүлэх боломжтой” хэмээн хариулав.