Ерөнхий сайд У.Хүрэлсүх захирамж гарган, Говь-Алтай аймгийн засаг дарга В.Рэнцэндоржийг ажлаас нь чөлөөлжээ.

Говь-Алтай аймгийн засаг дарга асан В.Рэнцэндорж нь тус аймгийн Гэр бүл, хүүхэд залуучуудын хөгжлийн газрын дарга С.Болормаа агсны амиа алдсан хэрэгт сэжиглэгдэн шалгагдаж буй билээ.

Мөн энэ талаар ЗГХЭГ-ын дарга Л.Оюун-Эрдэнэ хэлэхдээ, "Говь-Алтай аймгийн Засаг дарга В.Ренцэндоржийг үүрэгт ажлаас нь чөлөөлж, хууль, хяналтын байгууллагаар шалгуулахаар боллоо. Засаг даргыг чөлөөлөх захирамжид Ерөнхий сайд гарын үсэг зурсан. Тэрээр ажлын байран дээрээ архидан согтуурахсан нь тогтоогдсон. Өөрөө ч үйлдлээ хүлээн зөвшөөрсөн. Орлогч нь үүрэг гүйцэтгэнэ" гэлээ.

Мөн ЦЕГ-ын дарга мэдээлэл өгөхдөө, түүнийг журам зөрчсөн нь баримтаар нотлогдсон буюу ЗДТГ-ын байр руу архи, согтууруулах ундаа оруулсан үнэн, хүн амины хэрэгтэй холбоотой асуудлаар багадаа 14 хоногийн хугацаа орно гэдгийг хэлсэн байна.

Говь-Алтай аймгийн засаг дарга В.Рэнцэндорж өөрөө архи, согтууруулах ундаа ажлын байран дээрээ оруулсан нь үнэн, ёс зүйн хариуцлага хүлээхэд бэлэн гэдгээ илэрхийлсэн байна.

-Говь-Алтай аймгийн Засаг даргыг ямар үндэслэлээр огцруулсан юм бэ?

-Говь-Алтай аймгийн Засаг даргыг чөлөөлөх захирамжид Ерөнхий сайд гарын үсэг зурсан. Өчигдөр цагдаагийн байгууллагатай холбогдож мэдээлэл авсан. Ажлын байран дээр архидан согтуурсан нь Засгийн газрын тогтоолыг зөрчсөн үйлдэл болсон. Тиймээс энэ үндэслэлээр хариуцлага тооцсон. Өөртэй нь холбогдсон. Өөрөө ч энэ асуудлыг хүлээн зөвшөөрсөн. Дараагийн Засаг даргыг томилогдох хүртэл Засаг даргын орлогчид албан тушаалыг гүйцэтгүүлэхээр үүрэг болгосон. Бусад асуудлаар мөрдөн байцаах ажиллагаа явж байгаа юм байна гэж ойлгосон. Цагдаагийн газраас өгсөн мэдээллээр багадаа хоёр долоо хоногийн хугацаа орно гэсэн.

-Архидан согтуурсан нь хүн амины хэрэгтэй яаж холбогдох вэ?

-Үүнийг цагдаагийн байгууллага тогтооно. Одоогоор Засаг даргын Тамгын газарт архи, согтууруулах ундаа оруулсан нь тогтоогдоод байна. Өөрөөс нь лавласан. Өөрөө ёс зүйн хариуцлага хүлээхэд татгалзах зүйл байхгүй гэсэн.

-Засаг дарга В.Ренцэндорж тэнсэн харгалзах ялтай байсан юм уу?

-Түүнийг сайн мэдэхгүй байна. Иргэдийн хурлаар томилогдоод бүрэн эрхээ хэрэгжүүлж байсан Засаг дарга. Одоо бол захирамжаар чөлөөлж байна.

-Түүнийг хүн амины хэрэгт сэжиглэж байгаа юу?

-Үүнийг цагдаагийн байгууллага шалгана. Нэгдүгээрт, Засаг даргын Тамгын газрын байр руу архи, согтууруулах ундаа оруулж Засгийн газрын журам зөрчигдсөн нь баримтаар нотлогдсон. Хоёрдугаарт, хүн амины хэрэгтэй холбоотой асуудалд хугацаа орно гэж цагдаагийн газраас хэлсэн. Багадаа 14 хоног гэсэн. Холбогдох хууль хяналтын байгууллага өөрсдөө мэдээлэл өгөх байх.

Л.Оюун-Эрдэнэ: Говь-Алтайн Засаг дарга өөрөө ёс зүйн хариуцлага хүлээхэд татгалзахгүй гэсэн