Шинэ төрлийн коронавирусний халдвар өмнөд хөршид гарснаас хойш цар тархалт нь буурахгүй байна. Үүнтэй холбоотойгоор ДЭМБ-ын зөвлөмжийн хүрээнд олон улсын хурал цуглаанаас эхлээд олныг хамарсан үйл ажиллагаануудыг цуцлаад байгаа юм. Монгол Улсын тухайд вирусний халдвар бүртгэгдээгүй ч өвчлөл өндөр тархах магадлалыг тооцож, Монгол Улс бэлтгэлээ сайтар базаахыг ДЭМБ зөвлөсөн.

БНХАУ-д дэгдсэн уг өвчин цар тахлын хэмжээнд хүртлээ дэгдэх болсон шалтгаан нь цагаан сартай холбоотой гэдгийг батлаад байгаа. Тиймээс Монгол Улсын иргэн, Эрүүл мэндийн сайд Д.Сарангэрэл санаачилга гарган цагаан сарыг албан ёсоор цуцлах санал гаргасныг Засгийн газар, Улсын онцгой комисс дэмжсэн. Үүнээс өмнө Улсын онцгой комисс цагаан сарыг гэр бүлийн хэмжээнд цомхон тэмдэглэх хэрэгтэй гэж байсан юм.

Д.Сарангэрэл сайдын санаачилгыг тухайн үед хүмүүс хоёр янзаар хүлээж авсан нь нууц биш. “Монгол түний уламжлалт баярыг хориглолоо. Коммунист шийдвэрээ боль” гэхчилэн түүнд хаягласан хатуу үгс хөвөрсөн. Нөгөө талд нь “Эрүүл байвал ирэх жилүүдэд олон цагаан сарыг бид үзнэ. Сайдын санаачилгыг дэмжиж байна” хэмээж байв. Тэр хэнхэгтээ, хэн нэгнээс илүү гарах гэсэндээ тэгж хэлээгүй болов уу. Монгол Улсын эрүүл мэндийг салбарыг тэргүүлж байгаа бодлого тодорхойлогчийн хувиар, монголчууд аа, бяцхан үрсээ халдварт өвчнөөс хол байг гэсэн эх хүний сэтгэлээр хандсан гэдгийг бид одоо л ойлгож байна. Д.Сарангэрэл сайд цагаан сард дургүйдээ, Монголын эртний өв уламжлалаас татгалзсандаа, монголчуудынхаа дургүйг хүргэх гэсэндээ тэгээгүй юм аа, гэдгийг харлаа.

Улсын онцгой комиссоос гаргасан шийдвэрийн хүрээнд гэр бүлийн хэмжээнд цагаан сарыг тэмдэглэж болно гэдэг ойлголт явсан бол угийн хэнэггүй монголчууд урьдын адил цагаан сараа тэмдэглэх байсан нь үнэн. Тиймээс ҮАБЗ-ийн зөвлөмж гарсан. Анхлан гаргасан түүний санаачилгыг сэтгүүлчээр олон жил ажилласан хүний мэдрэмж, туршлагатай холбон үзэхээс өөр аргагүй.

Д.Сарангэрэлийг Эрүүл мэндийн сайдаар томилогдоход мэргэжлийн бус хүн томиллоо хэмээн эсэргүүцэгчид байсан. Гэхдээ аливаа салбарт мэдрэмжтэй, боловсролтой, шаардлагатай тохиолдолд шийдвэрийг шуурхай гаргаж чаддаг менежер чухал байдгийг өөрийн биеэр үлгэрлэн харууллаа. Сайн менежерийн дэргэд мэргэжилтэй боловсон хүчин байхад асуудлыг бүрэн дүүрэн шийдэх боломжтой юм.

Түүний нөхцөл байдалд бодит дүгнэлт хийж, шаардлагатай шийдвэрүүдийг шуурхай гаргаж, сар шинийн баярыг энэ удаа албан ёсоор цуцалж, хайртай хүмүүсээ тэр дундаа хөгшчүүдээ улмаар нийт монгол ахан дүүсээ аюулт өвчнөөс хамгаалах санаачилга гаргасан нь зөв байлаа. Баярлалаа, Д.Сарангэрэл сайд аа.