Коронавирусийн халдвараас сэргийлэх ажилд иргэд, ААН-үүд хандив өргөсөөр байна. Тухайлбал, “Голомт” банк 100 сая, “Бичил глобус санхүүгийн нэгдлээс” 33 сая, Ардын эмч Н.Баасанжав, зүрхний мэс засалч “Ач” анагаах ухааны их сургуулийн нэрийн өмнөөс таван сая, хамгаалалтын 20 хувцас хэрэглэл, Хан-Уул дүүргийн ахмадууд мөнгөн тусламжийг ЭМ-ийн сайд Д.Сарангэрэлд өнөөдөр гардууллаа.

Энэ талаар ЭМ-ийн сайд Д.Сарангэрэл

“Засгийн газар, ЭМЯ, мэргэжлийн байгууллагууд коронавирусийн халдварыг эх орондоо оруулж ирэхгүйн тулд ажиллаж байна. Хэрэв орж ирвэл хариу арга хэмжээ авах бэлэн байдлыг хангах чиглэлээр тасралтгүй ажиллаж байгаа. Монголын ард түмэн халдварыг оруулж ирэхгүйн төлөө ажиллаж, УОК, эрүүл мэндийн салбарыг дэмжиж сэтгэлийн хандив өргөсөөр байгаа нь бидэнд урам зориг өгч, монголчуудын эв нэгдлийг харуулсанд баярлалаа. Та бүхний хандивыг Төрийн нарийн бичгийн дарга ахлаад маш нарийн бүртгэл хийж байна.

Мөнгө төгрөг болон хамгаалах хэрэгсэл бүгд эрүүл мэндийн салбарын ажилтнуудад очно, зориулалтаар нь ашиглах болно. Нэг ч төгрөгийг үрэгдүүлэхгүйгээр эздэд нь хүргэх болно. ЭМЯ болон эрүүл мэндийн салбарынхан өвчин зовлонгоос сэргийлэх чиглэлээр хандивласан мөнгө төгрөгийг хувьдаа ашиглаж буяндаа бузар хийхгүй. Та бүхэн минь үүнд итгэлтэй байж болно” гэлээ.

Д.Сарангэрэл: Нэг ч төгрөгийг үрэгдүүлэхгүйгээр эздэд нь хүргэнэ