МАН өчигдөр Бага хурлаараа 2020 оны УИХ-ын сонгуульд оролцох мөрийн хөтөлбөрөө баталсан. Мөрийн хөтөлбөр болон УИХ-ын ээлжит хаврын чуулганы талаар УИХ дахь МАН-ын бүлгийн дарга Д.Тогтохсүрэнтэй ярилцлаа.

-УИХ-ын хаврын буулган дөрөвдүгээр сарын 5-нд нээлтээ хийх ёстой. Хугацаандаа эхлэх үү.

-Хаврын ээлжит чуулган дөрөвдүгээр сарын 5-ндаа эхэлнэ. Одоогоор хугацааг нь хойшлуулах талаар яригдаагүй байгаа. Улсын онцгой комиссоос гаргасан шийдвэрээр олон хүн нэг дор цугларахыг хориглож байгаа. Гэхдээ парламент үйл ажиллагаагаа тасралтгүй явуулах шаардлага өнөөдөр үүсээд байна. Тиймээс ээлжит чуулган хугацаандаа эхэлнэ гэж бодож байна. Харин ээлжит чуулганыг хуралдуулахдаа орчин үеийн техникийг ашиглаж, онлайн хэлбэр рүү оруулах чиглэл рүү ярьж, бэлтгэл ажил хийгдэж байгаа асуудал байна.

-Тэгэхээр гишүүд өрөө өрөөнөөсөө чуулгандаа оролцоно гэсэн үг үү. Техникийн боломж бий юү?

-Танхимдаа бөөнөөрөө суухгүй, өрөө өрөөнөөсөө санал өгдөг, үг хэлдэг хэлбэрийг судалж байна. Гэхдээ одоо яг эцэслээгүй байна. Технологийн хувьд тийм боломж байгаа.

-2020 оны УИХ-ын сонгуульд оролцох мөрийн хөтөлбөрөө баталлаа. Энэ удаагийн мөрийн хөтөлбөрийн онцлог юу байна вэ?

-“20-50 хөтөлбөр”-ийг Засгийн газар боловсруулаад УИХ-д өргөн барьсан. Энэ “20-50 хөтөлбөр” дээр үндэслэн мөрийн хөтөлбөрөө баталсан. Энэ 30 жилийн хөтөлбөр. Үүн дотроос ирэх дөрвөн жил улс орон, нийгэм эдийн засгийн өнөөдрийн байгаа байдалдаа дүгнэлт хийгээд ямар асуудлыг хэрэгжүүлж болох вэ гэдгээ авсан. манай намын мөрийн хөтөлбөр цогц мөрийн хөтөлбөр байгаа. Шинэ хэд хэдэн зүйл байгаагийн нэг нь ирэх дөрвөн жилд “Хуримтлалын нэгдсэн сан”-тай байх.

Ер нь “Хуримтлалын нэгдсэн сан”-тай байж иргэдийнхээ нийгмийн асуудлыг онцгой анхаарч явахгүй бол өнөөдрийн байгаа тогтолцоогоор явбал иргэдийн нийгмийн асуудлыг шийдэхэд тун хүндрэлтэй байна гэж үзэж байгаа. Олон юм бий. Том том бүтээн байгуулалтын ажлууд байна. Төрийн чиглэлээр яаж авилгагүй, төрийн албан хаагчдыг ёс зүй өндөртэй болгох вэ гээд олон олон шинэ заалт орсон мөрийн хөтөлбөр баталсан. Одоо Аудитын байгууллагад өгнө. Аудитын байгууллага нэг сарын хугацаанд хянаж үзэх ёстой. Хянаж үзээд болохгүй заалт байна гэж үзвэл Удирдах зөвлөл хуралдаад өөрчлөлт оруулаад явна. Удирдах зөвлөлд өөрчлөлт оруулах эрхийг нь өчигдөр өгсөн.

-Ямар эрх вэ?

-Мөрийн хөтөлбөртөө өөрчлөлт оруул гэдэг Аудитын байгууллагаас өгвөл заавал Бага хурал хуралдуулахгүйгээр Удирдах зөвлөл хуралдаад өөрчлөлт хийх хувилбарыг яриад Удирдах зөвлөлд Бага хурлын эрх шилжсэн байгаа.

-Сонгууль хойшлуулах нөхцөл байдал үүсэх үү?

-Би хувьдаа сонгууль хойшлуулах нөхцөл байдал үүсэхгүй байх гэж бодож байна. Бас ч гэж манай улс гайгүй байна. улс орон дотор халдаагүй байна. Гаднаас зөөрлөгдөж ирсэн 10 хүний асуудал байгаа. Дахиад нэмээд халдвар авсан хүн ирэхгүй, дотооддоо алдчихгүй байвал улс орон даяараа сонгуулиа явуулах боломж бий.

-Ер нь санал хураалтыг цахимаар авах боломж бий юү?

-Одоохондоо бол цахимаар авна гэсэн асуудал яригдаагүй байна. Хуулийн хүрээндээ ч цахимаар авна гэж байхгүй. Зөвхөн нууцаар иргэн хүн өөрөө төлөөлж өгөх учраас цахимаар санал авна гэдэг ойлголт байхгүй.

​Д.Тогтохсүрэн: Хаврын чуулган хугацаандаа эхэлнэ, онлайнаар хуралдах асуудлыг судалж байна

Д.Тогтохсүрэн: Хаврын чуулган хугацаандаа эхэлнэ, онлайнаар хуралдах асуудлыг судалж байна