УИХ-ын гишүүн Б.Баттөмөртэй ярилцлаа.

-“Эрдэнэс Тавантолгой” ХК-ийг хувьчлах асуудал яригдлаа. Хэрэв хувьчлагдвал гарах үр дүнг яаж харж байна вэ?

- “Эрдэнэс Тавантолгой” ХК-ийг олон нийтийн болгох нь зөв. Гэхдээ 30 хувийг хувьчлах асуудал дээр санал нэгдэхгүй байна. 30 хувийг хувьчлах УИХ-ын тогтоол гарсан боловч энэ нь шууд худалдана гэсэн үг биш. Монголын ард түмний өмч учир маш олон шалгуурыг давж байж хувьчлагдах асуудал яригдах ёстой. Коронавирусээс шалтгаалан дэлхийн зах зээлд эдийн засгийн хямрал бий болоод байна. Ийм үед “Эрдэнэс Тавантолгой” ХК-ийг хувьчилж, зах зээлд худалдаж болохгүй. 30 хувийн үнэлгээ нь нэг тэрбум ам.доллар гэдэг зүйл байх ёсгүй. Анх таван тэрбум ам.доллар гэж байсан. Таван тэрбум ам.доллар гэдэг ч бага гэж бодож байна. Тийм учраас маш их тооцоо, судалгааны үндсэн дээр хувьчлах асуудлыг ярих ёстой. Миний хувьд хувьчлах асуудлыг дэмжихгүй.

ТАВАНТОЛГОЙ БОЛ АСАР ҮНЭТЭЙ ОРД

-Одоогийн нөхцөлд IPO гаргаж болохгүй гэсэн үг үү?

-Одоо цаг нь биш. Гэхдээ эдийн засаг тогтворжоод, хамгийн үр ашигтай болсон үед IPO гаргаж болно. Түүнээс биш одоогийн хямралтай үед нэг тэрбум ам.доллароор 30 хувиа өгнө гэдэг бол үндсэндээ 3,3 тэрбум ам.долларын үнэтэй орд болгох гэж байгаатай адил. “Эрдэнэс Тавантолгой” ХК хийсвэр тооцоогоор 550 гаруй тэрбум ам.долларын өртөгтэй. Энэ орд бол асар өндөр өртөгтэй, үнэтэй орд. Иймд IPO гаргах нь зөв ч Монголын ард түмэнд үр ашигтай IPO байх ёстой.

“Хувьчлал нэрэн дор хулгай хийдэг, цөөхөн хэдэн хүний эрх ашигт нийцүүлэн хувьчлал хийдэг зүйл цаашид Монголын төрд гарахгүй”

МОНГОЛЫН ТӨР ӨӨРИЙН ӨМЧИД БАЙГАА ЗҮЙЛЭЭ БҮРЭН АШИГЛАХ ЁСТОЙ

-Ногдол ашиг хуваарилахтай зэрэгцээд IPO гаргавал гарах эрсдэл нь юу байх вэ? Энэ хоёрыг зэрэг хийх боломжтой юу?

-IPO гаргана гэж байхгүй. Миний ойлгосноор 2020 онд IPO гаргахгүй. Цаашид цаг үе, тооцоогоо маш сайн хийж байж IPO гаргах тухай ярихаас биш, одоо IPO гаргана гэсэн зүйл яригдахгүй. Ард түмэнд олгох хувьцааны ногдол ашгийг тавдугаар сараас эхлэн олгоно. Нэгэнт ард түмэн хувьцааг нь эзэмшиж байгаа учраас ногдол ашгийг өгөх нь зүйтэй. IPO гэдэг зүйл одоо байхгүй. Монголын төр өөрийн өмчид байгаа зүйлээ бүрэн ашиглах ёстой. Бүгдийг нь хувьчиллаа гээд сайн сайхан зүйл байдаггүй гэдгийг өнгөрсөн 30 жилийн туршлага харуулж байна. Монгол Улс бүгдийг нь хувьчиллаа. Төрд өмч байхгүй. Дэлхийд хамгийн хуримтлалгүй улс орнуудын нэг Монгол болчихлоо. Энэ нь одоогийн хөгжлийн бодлого, хөгжлийн загвар буруу байгаатай холбоотой юм. Үүнийг засах хэрэгтэй. Ардчилал, зах зээлийн нийгэмд шилжээд 30 жил болоход Монгол Улс асар их өртэй, хуримтлалгүй улс болсон байна. Монгол Улсын хөгжлийн бодлого, загварыг маш тодорхой болгох хэрэгтэй. Хувьчлал нэрэн дор хулгай хийдэг, цөөхөн хэдэн хүний эрх ашигт нийцүүлж, хувьчлал хийдэг зүйл цаашид Монголын төрд гарахгүй, гаргуулахгүй.

-Баярлалаа.

Б.Баттөмөр: Эдийн засгийн хямралтай үед “Эрдэнэс Тавантолгой” ХК-ийг хувьчилж, зах зээлд худалдаж болохгүй