УИХ-ын чуулганы Баасан гаригийн үдээс хойших нэгдсэн хуралдаан эхэллээ. Тус хуралдаанаар Улсын Их Хурлын гишүүн Д.Оюунхорол, С.Бямбацогт, М.Оюунчимэг, Я.Санжмятав, Л.Энх-Амгалан, Д.Эрдэнэбат нарын гишүүдээс “Монгол Улсад короновирус /СОVID-19/-ийн халдварын тархалтын эрсдэл өндөр хэвээр байгаатай холбогдуулан нийгэм, эдийн засагт сөргөөр нөлөөлж буй хор уршгийг үнэлэн тооцоолох, ард иргэдийн амжиргааг дээшлүүлэх, нийгэм, эдийн засгийн тогтвортой байдлыг сэргээх, гамшгийн бэлэн байдлыг сайжруулах чиглэлээр Засгийн газраас авч хэрэгжүүлж буй арга хэмжээний талаар” тавьсан асуулгын хариуг сонслоо. 

Энэ үеэр УИХ-ын гишүүн Б.Бат-Эрдэнэ

Маш чухал ажлуудыг хийсэн байна. Үр дүн нь тодорхой байгаа. Дэлхийн олон улс орон энэхүү тахлын өмнө сөхөрч байхад манай улс харьцангуй сайн байгаа. Төр ард түмэн болон хүчин зүтгэж байгаа бүх хүмүүст талархал илэрхийлье. Анх энэ өвчин Ухань хотод дэгдэж байхад хилээ хаа гэж хэлж байсан. Чуулган завсарласан байх хугацаанд ч АБГББХ болон бусад хороон дээр өнөөдрийн асуулгад дурдагдсан олон ажлууд шийдэгдэхэд чиг зүг нь гарахад оролцож явсан хүний хувьд энэ ажлуудаас тодруулж асуух зүйл алга. 

Нэгдсэн нэг журам дүрмийг баримталмаар байна. Маск зүүнэ гэхэд бүгд зүүдэг. Зарим хүмүүс эрүүн дороо зарим нь хамраа гаргачихсан бүр зарим нь энгэртээ зүүсэн зүйлээ энэ байна гээд сууж байна. Чуулган эхэлснээс хойш би энэ зүйлийг шаардаж байгаа. Яг энэ дүрмийг баримтална гэсэн нэгдсэн шаардлагыг хэлж гишүүд төрийн ордноосоо үлгэрлэмээр байна. 

Түүний асуултад Эрүүл мэндийн сайд Д.Сарангэрэл хариуллаа.