Сарангэрэл.Д 2020.04.13 | Яамны хэвлэл мэдээллийн алба

ДЭМБ-аас 80.7 мянган ам.долларын өртөг бүхий хувийн хамгаалах хэрэгслийг Эрүүл мэндийн яаманд гардууллаа

ДЭМБ-аас 80.7 мянган ам.долларын өртөг бүхий хувийн хамгаалах хэрэгслийг Эрүүл мэндийн яаманд гардууллаа

ДЭМБ-аас Эрүүл мэндийн онц ноцтой байдал төслийн хүрээнд Эрүүл мэндийн яаманд 80,770 ам.долларын өртөг бүхий хувийн хамгаалах хэрэгслүүдийг өнөөдөр хүлээлгэн өглөө.

Үүнд, амны хаалт, лабораторийн урвалж оношлуур, нарийн шүүлтүүрт маск, нүүр болон нүдний хамгаалалтын шил, бээлий гэх мэт зүйлс багтжээ.

"Ийм үед тусламж үзүүлж буй та бүхэнд талархахгүй байхын аргагүй"

Энэ үеэр Эрүүл мэндийн сайд Д.Сарангэрэл хэлэхдээ

"ДЭМБ-аас нэгдүгээр сарын 3-ны өдөр Монгол улсад энэ өвчний талаар гишүүн орны хувьд мэдээлсэн.

Түүнээс хойш манай улсын эрүүл мэндийн салбар ДЭМБ-тай нэг ч өдөр тусдаа ажилласангүй. Өнөөдрийг хүртэл биднийг бүх чиглэлээр дэмжиж, хамтран ажиллаж байгаад талархаж байна.

Өнөөдрийн энэ тусламж нь, ДЭМБ-аас Монгол Улсад үзүүлж байгаа гурав дахь удаагийн дэмжлэг юм.

Өнөөдөр эрүүл мэндийн салбарт ажиллаж буй хүмүүс эрүүл байж ард иргэдээ аюулаас хамгаалах бололцоо бүрдэнэ. Тиймээс хамгийн чухал, нэн шаардлагатай хэрэгслүүдийг бидэнд хүлээлгэн өглөө. 

Өнөөдрийн байдлаар дэлхий дээр 1.6 сая хүн халдвар авчихсан, 213 улс, оронд халдвар тархаад байна. Ийм хүнд үед хандив, тусламж үзүүлж буй та бүхэнд талархахгүй байхын аргагүй" гэлээ.

Мөн тэрбээр "Монгол Улсын Засгийн газар ч мөн энэ өвчний тархалтаас сэргийлэхийн тулд эрүүл мэндийн салбарыг дэмжиж нийт 20 гаруй тэрбум төгрөгийн нөөц хөрөнгө зарцуулжээ.

Өнөөдрийн байдлаар эх орондоо амьдарч байгаа иргэдийн маань дунд энэ халдвар гараагүй байна. Гаднаас зөөвөрлөгдөж ирсэн 16 тохиолдол бий ч 4-г нь эмчлээд тусгаарлан ажиглаж байна.

Гэхдээ бид бусад орны нэгэн адил халдварыг ард иргэдийн дунд тархаахгүй байх юм чухал. Үүнд хүн бүрийн хүчин зүтгэл, оролцоо чухал юм" хэмээн онцлов.

"ДЭМБ үргэлжлүүлэн та бүхэнтэй хамтран ажиллахдаа баяртай байх болно"

ДЭМБ-ын Суурин төлөөлөгч доктор Сергей Диордица

 “Би энэхүү арга хэмжээнд өөрийн биеэр оролцож байгаадаа баяртай байна.

Монгол Улсад өнөөдрийн байдлаар дөнгөж 16 батлагдсан тохиолдол бүртгэгдсэн бөгөөд хилийн чандад байгаа иргэдээ татаж авчирсаар байна.

Тиймээс миний хувьд Монголын эрүүл мэндийн салбарын хамт олны дунд ажиллаж буй маань нэр төрийн хэрэг.

Эрүүл мэндийн салбарын ажилтнуудад нэн талархал илэрхийлье. Та бүхний хичээл зүтгэл энэ өвчнийг даван туулахад хамгийн чухал хувь нэмэр үзүүлж буй юм.

ДЭМБ үргэлжлүүлэн та бүхэнтэй хамт хүчээ нэгтгэн ажиллахдаа баяртай байх болно” гэв.