Ж.Эрдэнэбат 2020.05.04 | Vip76.mn

Ж.Эрдэнэбат: Хүрэлсүх дарга бид хоёр нэг завин дээрээ яваа

Ж.Эрдэнэбат: Хүрэлсүх дарга бид хоёр нэг завин дээрээ яваа

Ерөнхий сайд асан Ж.Эрдэнэбат сүүлийн үед өөртэй нь холбоотой гарсан зарим мэдээлэлд дараах тайлбарыг гаргажээ.

Жаргалтулгын Эрдэнэбат миний УИХ-ын гишүүний бүрэн эрхийг түдгэлзүүлэх саналыг хуулийн байгууллагаас УИХ-д оруулж ирэх гэж байна, мөн ирсэн тухай мэдээллийг нэр бүхий зарим цахим сайтад дахин мэдээлжээ.

Энэ нь миний хувьд “шинэ мэдээ” биш бөгөөд өнгөрсөн өвлөөс эхэлж явуулсан, УИХ-ын сонгууль ойртох тусам эрчимжиж буй ээлжит захиалгат худал мэдээлэл юм.

Надад Монгол Улсын Ерөнхий сайдын албан тушаал болон УИХ-ын гишүүний давуу эрхээ ашиглаж үйлдсэн гэмт хэрэг байхгүйг ард түмэндээ хариуцлагатайгаар мэдэгдэж байна. Хууль хяналтын байгууллага ч хуулийн хүрээнд шударга ажиллаж, үнэнийг тогтооно гэдэгт миний бие эргэлзэхгүй байна.

Үүнээс гадна У.Хүрэлсүх бид хоёрын Засгийн газрын тэргүүний алба, тамга солилцсон, хувь хүмүүсийнхээ хувьд түүхэн үйл явдлыг хувийн өш хонзон болгох, тэгж харагдуулахыг хүссэн, хүлээсэн мэдээллийг ч цацах боллоо.

2016 оны УИХ-ын сонгуулийн дараа 1.2 хувийн өсөлттэй эдийн засгийг хүлээж авсан МАН-ын Засгийн газарт өнөөдрийн Ерөнхий сайд У.Хүрэлсүх бид хоёр нэг баг болон хамтран зүтгэсэн. Хувь заяаны эрхээр тэр үед би Ерөнхий сайд, харин У.Хүрэлсүх Монгол Улсын Шадар сайдаар ажиллаж миний тэргүүлсэн танхимын багт хамт байлаа. Өнөөдөр мөн л хувь заяаны эрхээр У.Хүрэлсүх Монгол Улсын Ерөнхий сайд болж, намын гишүүний хувьд би түүний удирдаж буй МАН-ын багт хамт яваа. Бид нэг баг, нэг завиндаа хамт байгаа, хэн нэг нь завинаасаа  буугаагүй, хэн нэгнээ буулгах үйлдэл одоогоор хийгээгүйг хариуцлагатай хэлье.

Засгийн газар огцорч солигдох нь улс төрд, ялангуяа парламентын засаглалтай улс оронд байдаг л үйл явдал. “Цаг хугацаатай хааны алба”-ндаа харамссан, ханасан үйлдэл бидний хэнд ч байхгүй. Тийм учраас “У.Хүрэлсүх нь Ж.Эрдэнэбатаа нэр дэвшүүлэхгүй”, “Ж.Эрдэнэбат нь У.Хүрэлсүхдээ өс санаж явдаг” гэж бидний дунд “яс хаях” нь явуургүй бөгөөд миний хувьд  ийм мэдээллийг “Жингийн цуваа явахтай адил” хүлээн авч үддэг болно.

Өнгөрсөн өвлөөс явуулж байгаа эдгээр цуврал худал мэдээлэл нь улс төрийн сонгуулийн өмнө өрсөлдөгчөө чадвал зайлуулах, ядаж нэр хүндийг нь унагах гэсэн улстөрчдийн, мөн намын хамт олноос авдаг УИХ-ын сонгуульд нэр дэвших мандатыг “тооноор орж” авах гэсэн нөхөд-ийн ээлжит гүтгэлэг юм. Тэдний Монгол Улсын хууль дүрэм, хүний ёсыг уландаа гишгэсэн, хуулийн байгууллагын нэрийг хувийн сонирхолдоо ашигласан удаа дараагийн эрээ цээргүй энэ үйлдэлд дургүйцэж байгаагаа илэрхийлж, шаардлагатай бол захиалагчийн талаарх зарим баримтыг дэлгэх болно гэдгийг мэдэгдэж байна.

Монголчууд бид энэ цаг үед, өнөөдөр давхар давхар хариуцлагын өмнө ирлээ. Дэлхий нийтийг бүрхсэн коронвирусийн цар тахлыг эндэгдэлгүй, эрсдэлгүй давахын тулд монгол хүн бүр хичээн зүтгэж, Засгийн газар боломжит бүх арга хэмжээг шуурхай авч хэрэгжүүлж байгаа нь хэн бүхэнд илэрхий байна. Энэхүү цар тахлаас үүдэлтэй эдийн засгийн хямрал дэлхий дахинд үргэлжлэх нь нэн тодорхой байгаа. Бид коронавирусийн цар тахлыг хилээ хаагаад,  Монгол Улс дангааршиж яваад эрсдэлийг  давах нь зөв. Харин эдийн засгийн хямралыг бол хилээ нээж,  дэлхийтэй хамт явж байж давна. Одоо бодитой байгаа, угтан буй  ийм хүнд цаг үед тогтвортой төр засагтай байж, хариуцлагатай улс төрийн хүчин засаглах нь хамгаас чухал. Тогтвортой төр засгийг хариуцлагатай улс төрийн хүчин, хариуцлагатай улстөрчид бүрдүүлнэ.  Гэтэл УИХ-д сонгогдох эсэхээ ч мэдэхгүй, баталгаагүй байхад зөвхөн нэр дэвших эрх олж авахын тулд иймэрхүү буруу арга хэрэглэж байгаа өрсөлдөгчид, горилогчид цаашдаа  хариуцлагатай улстөрчид байж чадахгүй нь илэрхий юм. УИХ-д нэр дэвших эрх олж авах гэсэн, сонгуульд ялах гэсэн буруу арга нь УИХ-ын гишүүн болох зорилгоо зөв болгохгүй. Зорилго нь аргаа ч цайруулахгүй.

УИХ-ын сонгуульд ялах хүнээ оноож нэр дэвшүүлэх намын хамт олны шийдвэр, сонгуульд яллаа гэхэд УИХ-д шударга, хариуцлагатай ажиллах нэр дэвшигчээ олж сонгох ард түнийхээ эрх ашгийг хүндэтгэж шударга өрсөлдөцгөөе!

УИХ-ын гишүүн, Монгол Улсын Ерөнхий сайд асан Жаргалтулгын Эрдэнэбат