О.Баасанхүү: Би улс төрийг томоор харж, багаар явмаар байна
2020.05.07

О.Баасанхүү: Би улс төрийг томоор харж, багаар явмаар байна

Эх сурвалж: Үндэсний шуудан сонин, сэтгүүлч Б.Бадралмаа

УИХ-ын гишүүн О.Баасанхүүгээс зарим зүйлсийг тодрууллаа.


-Та өнгөрсөн сард АН-д элсэж, намын батлахаа гардаж авсан. Та намын дарга С.Эрдэнэтэй түнжин муутай байсан. Гэтэл намд нь элсчихлээ. Бодлогын хувьд таарна гэж бодож байна уу?

-2012-2016 онд МАХН, АН хоёр хамтарсан Засгийн газар байгуулсан. Тухайн үед би хамтарсан Засгийн газарт маш их шүүмжлэлтэй хандаж байлаа. Өөрөөр хэлбэл, эрх баригч дотроо сөрөг хүчний үүрэг гүйцэтгэсэн гэсэн үг. Үүний дараа 2016 онд  МАН 65, АН-аас ес, МАХН-аас нэг гишүүн УИХ-д сонгогдсон.  АН энэ ялагдалдаа дүгнэлт хийх ёстой. Нэг ёсондоо “Эрдэнэт үйлдвэр”-ийн 49 хувь зэрэг олон асуудлаас болж иргэд АН-д гомдчихсон байсан. Харин дөрвөн жилийн хугацаанд МАН-ынхан 65-уулаа төрийн эрхийг барилаа. Одоо тэдэнд гомдох зүйл байхгүй. Харин иргэд эрх баригчдаас хариуцлага нэхэх цаг болсон. Тэд нэгдүгээрт, биднийг баяжуулж, сайхан амьдруулна гэсэн. Хоёрдугаарт, шударга ёсыг тогтоох, гуравдугаарт, төрийг эмх цэгцэд оруулна гэсэн. Энэ амлалтын аль нь ч хэрэгжээгүй байна. Тиймээс сөрөг хүчинд нэгдэхээс өөр аргагүй болсон.

-Та хүчтэй сөрөг хүчин байгуулахаар АН-д элсэж байна хэмээн мэдэгдсэн. АН одоо сөрөг хүчний үүрэг гүйцэтгэж чадаж байгаа юу?

-АН бодит сөрөг хүчин мөн. Энд байгаа намын дарга юм уу, УИХ-ын гишүүдээр тус намыг дүгнэх хэрэггүй. Би 1994-2011 он хүртэл АН-ын гишүүн байсан. Намаас яагаад гарсан талаар хүмүүс асуухаа больчихож. Би нэг хэсэг МАХН-ын дарга Н.Энхбаяр гэдэг хүн дээр төвлөрч, улс төр хийх ёстой гэсэн бат итгэлээр түүнийг дагаж явсан. Гэтэл намайг олон түмний нүдэн дээр найман удаа намаасаа хөөсөн.

-МАХН-аас гарахдаа та “Надгүйгээр ялаарай” гээд гарсан шүү дээ?

-Би 2016 онд гарвал гарчих л байсан. Яагаад намайг намаасаа гаргасныг нь Н.Энхбаяр даргаас асуугаарай. Би Н.Энхбаяр даргын тухай яримааргүй байна. Намайг улс төрд хөтөлж оруулсан миний ах гэдэг нь үнэн. Түүний 2009 оноос өмнө хийсэн бүх асуудлыг нь цайруулахаар өмгөөлсөн минь үнэн. Бид хоёр 2012-2016 онд Засгийн газрын бүтэц, бүрэлдэхүүнээс эхэлж маргалдсан.  2020 онд Ерөнхийлөгчийн сонгуулийн тухай хуулиас болж дахин маргалдсан. Гэвч бүх зүйлд миний зөв байсан. Ингээд л боллоо.

-Намын батлахаа гардах үеэр авахуулсан зургийг тань хараад хүмүүс таныг хүчээр АН-д элсэж байна гэж байсан. Энэ үнэн үү?

-Хүнийг ямар өнцгөөс яаж авч олон нийтэд тараах вэ гэдэгт асуудал байгаа юм. АН-аас авсан зургууд нь хамгийн хөгжилтэй, баяртай зургууд байгаа. Би найман жил УИХ-ын гишүүн байлаа. 45 нас ч хүрлээ. Хуучин Үндсэн хуулиараа Ерөнхийлөгчид нэр дэвших нас шүү дээ. Тиймээс би улс төрийг томоор харж, багаар явмаар байна. Улсдаа илүүг хийх зорилготой байгаа. Орхон аймгаар жишээ татвал, жилд 25 тэрбум төгрөгийн хөрөнгө оруулалт өгдөг. Ингээд дуртай, дургүй тендер зарлаж, дундаас нь цавчсаар олигтой юм хийдэггүй. Олигтой юм хийвэл О.Баасанхүүгийн нэр хүнд өснө гэх хандлагатай байдаг. Тиймээс би ядаж өөрийн намын орон нутгийн төлөөлөгчтэй уулзаад, тэдэнд хариуцлага тооцдог, хамтарч ажилладаг болмоор байгаа юм.

-АН УИХ-ын сонгуульд нэр дэвшихээр горилж буй гишүүдээсээ 100 сая төгрөгийн дэнчин авч байгаа. Та энэ мөнгөө өгсөн үү?

-АН-ын Нарийн бичгийн дарга Ц.Баатархүү намайг намдаа элсэхийг урьсан. Намайг урьсан юм чинь би өгөхгүй. Харин авлигачид амилахын түүс болчихжээ. Тэд дахин амилах гээд байдаг аргаа хэрэглэж байна. Маш олон хуурамч бие даагчид гаргаж, хулгайн мөнгөөрөө санхүүжүүлж байгаа.

-УИХ-ын ээлжит сонгууль ирэх зургадугаар сард болно. Коронавирусийн халдвартай холбоотой сонгуулийг хойшлуулах, эсэх асуудал хөндөгдөх боллоо. Энэ талаар та ямар байрь суурьтай байна вэ?

-Өнөөдрийн байдлаар сонгууль хойшлуулах нөхцөл үүсээгүй. Дэлхий нийтийн жишгээр ийм тохиолдолд хилээ хамгаалж, хяналт тавьж иргэдээ чөлөөтэй байлгах ёстой. Сургууль, цэцэрлэг, үйлчилгээний байгууллагаа чөлөөтэй ажиллуулах ёстой. Коронавирусийн халдвар дотроосоо гараагүй байна. Гаднаас зөөвөрлөгдөж ирсэн тохиолдол байгаа. Сонгууль хийх гэж байгаа бол хорио цээрээ зогсоох хэрэгтэй. Өвчин гараагүй бол сонгуулиа хийе гэсэн байр суурьтай байна.