Шатахууны хангамж, үнэ тарифыг тогтворжуулах, хяналт тавих Үндэсний зөвлөл өнөөдөр хуралдлаа.

Хуралд УУХҮ-ийн сайд бөгөөд зөвлөлийн дарга Д.Сумьяабазар, зөвлөлийн бүрэлдэхүүн болох МҮЭХ, МАОЭНХ, АМГТХЭГ, ШӨХТГ, ЗТЯ, ХЭАХН, Сангийн яам, ТЕГ, МХЕГ, ГЕГ, Шатахуун импортлогч компаниуд зэрэг байгууллагын төлөөлөл оролцож дараах шийдвэрүүдийг олонхын саналаар дэмжин зөвлөмж гаргалаа:

• 1. Шатахууны хангамж, үнэ тарифыг бууруулах, тогтворжуулах талаар дэлхийн зах зээл дээрх нефтийн үнийн бууралттай холбоотойгоор шатахууныг энэ сараас дахин бууруулах /ингэхдээ 100 орчим төгрөгөөр хямдлах/, цаашид 6 сарын хугацаанд дэлхийн зах зээл дээр үнэ нь өссөн ч жишиг үнийг тогтвортой барих;
• 2. 2014 оноос хойш шатахууны жижиглэнгийн үнийн тооцооллын жишиг буюу ААН-үүдын зардлын өртөгийг цалин хөлс, валютын ханшийн өсөлт зэргийг харгалзан литр тутамд дунджаар 5 хүртэл төгрөгөөр нэмэгдүүлэх;
• 3. Шатахууны үнийг дахин хямдлах болж байгаа тул үүнийг даган өссөн бараа бүтээгдэхүүн, үйлчилгээний үнийг бууруулах ажлын баг байгуулахаар боллоо.

Уг хуралд МҮЭХ-ноос суурь үнэ дэлхийн зах зээлийн үнэ тариф буурсантай холбогдуулан 300-400 төгрөгөөр хямдарсныг дахин бууруулах, стандарт бус гэж нэрлэж буй керосины төрлийн бүтээгдэхүүний наймааг таслан зогсоох, онцгой татвар ногдуулах шаардлагатай байгааг илэрхийлж, иргэд хөдөлмөрчдөөс автомашины эвдрэл гэмтэлтэй холбоотой олон санал шүүмжлэл гарч байгааг онцгой анхааралдаа авахыг хүслээ. Мөн шатахууны үнэ тариф буурсантай холбоотой бусад төрлийн бараа бүтээгдэхүүний үнийн тооцооллыг гаргаж бууруулах талаар төрийн болон ТББ-ууд хамтран ажиллах саналыг тавилаа. Түүнчлэн энэхүү салбарт ажиллаж байгаа ажилчдын цалин хөлсийг зохих хэмжээнд нэмэх боломжийг олгох, нефть импортлогч компаниуд салбарынхаа хэлэлцээрээр цалинг тодорхой хэмжээнд нэмэх үүргийг биелүүлэх, цар тархалтын өндөр эрсдэлтэй ШТС-ын ажилчдын хөдөлмөр хамгаалал, цалин хөлсийг сайжруулж ажлын байрыг хамгаалах арга хэмжээ авах шаардлагатайг онцоллоо.

Дээрх асуудлыг зөвлөлийн дарга УУХҮ-ийн сайд Д. Сумьяабазар ААН-үүдад анхааруулж, цалин хөлс ажлын байрыг сайжруулах, хамгаалах арга хэмжээг авахад онцгой анхаарч ажиллах нөхцөлтэйгөөр жишиг зардлыг нэмэгдүүлж байгааг дэмжлээ.