Монгол Улсын төрийн эрх барих дээд байгуулага болох УИХ-ыг сонгох 8 дахь удаагийн сонгуулийн сурталчилгаа орон даяар эхэллээ.

УИХ-ын гишүүн, ТББХ-ны дарга С.Бямбацогт

Эрдэм боловсролын үрийг тарьсан сургууль цэцэрлэгүүдийнхээ барилга байгууламжийг үндсэнд нь бүрэн шинэчилж, эрүүл энхийн эх булаг болсон эрүүл мэндийн салбараа бэхжүүлж чадлаа. Урлаг, соёл, спортын салбараа дэвшитгэн хөгжүүлж Ховдынхоо нэрийг улсдаа төдийгүй дэлхийд цуурайтуулж байна.

Олон ястны өлгий нутаг маань Хамаг Монголын Баруун нийслэл болон хөгжих түүхэн боломж бүрдлээ.

Бүтээн байгуулсан амжилтдаа дөрөөлөн урагшлан хөгжих, бууриа засаж ханаа дугуйлсан ШИНЭ ХОВДЫНХОО тооныг өргөх шинэ түүхийг та бид хамтдаа бүтээх гэж байна.

Монгол Ардын Намын 2020 оны сонгуулийн Мөрийн хөтөлбөрт ирэх жилүүдэд Ховд аймагт хэрэгжих олон том төслүүд ШИНЭ ХОВД гэсэн нэгэн тугийн дор нэгтгэн зангидагдаж байна.   

ШИНЭ ХОВД бол сонгуульд зориулсан амлалт уриа биш харин бодитой шийдэл, даацтай бодлого юм. 

Монгол Ардын Намын Мөрийн хөтөлбөрт Ховд аймгийг шинэ шатанд гарган хөгжүүлэх “ШИНЭ ХОВД” хөтөлбөр хэрэгжүүлнэ хэмээн заасан нь ч чухам ийм учир шалтгаантай.  

Ховд аймаг эрчим хүч импортлогч биш үйлдвэрлэгч аймаг болно. Эрдэнэбүрэнгийн УЦС-аас эрчим хүчний тусгаар тогтнол эхэлнэ. Өөрсдөө эрчим хүчээ үйлдвэрлэнэ гэдэг айлаас түлш гуйж гал алдахгүй гэсэн үг. Тийм болохоор Эрдэнэбүрэнгийн УЦС ШИНЭ ХОВД-ын хөгжлийн гал нь болж байгаа юм. 

Одоогоос жилийн өмнө Монгол Улсын Ерөнхий сайд шавыг нь тавьж байсан Ховд эко цементийн үйлдвэрийн бүтээн байгуулалтын ажил өнөөдөр ид дундаа өрнөж 500 хүн ажлын байртай боллоо. Ирэх оны эхээр ашиглалтад орох цементийн үйлдвэрийн ачаар баруун бүсэд “барилгын талх” гэгддэг цементийн үнэ 2 дахин хямдарч хотынхтой ижил болно. 

Ховд агро парк төсөл Монгол улс Хүнс үйлдвэрлэгч улс болох эрхэм зорилтын баруун жигүүр нь болно. Ховдчууд эх нутгийнхаа хөрсөнд ургасан эрүүл органик жимс жимсгэнэ, хүнсний ногоогоор бүрэн хангагдаж, илүү гарсанаа гадаад дотоодын зах зээлд борлуулж,  хямд чанартай мах сүүгээр өөрсдийгөө бүрэн хангадаг болно. Ногоочид фермерүүдийн маань ашиг орлого арвижиж, амьдралын чанар дээшилнэ. 

Гэр хорооллын иргэдийн газрын үнэ цэнийг өсгөж, хашаандаа хаустай, гэртээ яндангүй, гаднаа ил жорлонгүй,  ая тухтай амьдралын шинэ хэвшил болсон ХАШААНДАА САЙХАН АМЬДАРЦГААЯ хөтөлбөр бодитоор хэрэгжиж эхлэн олон хүний ирээдүйн амьдралд итгэлийн оч бадрааж байна. 

Дэлхийн боловсролыг Ховддоо эзэмших Кембриджийн стандарт, дэлхийн хүмүүсийг Ховддоо угтах Олон улсын нисэх буудал мөрөөдөл биш бодит зорилт болон биежиж, ойрын үед ажил хэрэг болох гэж байна. 

Өндөр үнэтэй шатахууныг хотынхтой ижил болгон хямдруулж Ховддоо үйлдвэрлэх, хольж хутгасан хуурамч шатахуун биш нэрж гаргасан цэвэр чанартай бензинээр нийт баруун бүсээ хангах нефть боловсруулах үйлдвэрийн ТЭЗҮ боловсруулагдаж дуусаад байна.    

ШИНЭ ХОВД хөтөлбөрийн үр дүнд Ховдчуудын амьдралын өртөг зардал буурч, орлого өсөх учиртай. Ажлын байр бий болж, өрсөлдөх чадвар нэмэгдэх ёстой. 

ШИНЭ ХОВД-ын энэ бүх зорилт ирэх жилүүдэд хэрэгжих бүрэн үндэстэйг энэхүү бодлогын баримт бичигт боловсруулан тусгасан гэдгийг хэлэхэд таатай байна. 

Өөрөөр хэлбэл бид ийнхүү ШИНЭ ХОВД төслөө шүншиглэн  аравнайлж, амь орууллаа. 

Хэрэгжээд эхэлсэн ажлуудаа хийдэл дутагдалгүй бүрэн гүйцэд хэрэгжүүлэх ШИНЭ ХОВД-ын гараанаас бариа руу ийнхүү эрчтэй хөдөлж байна.  

ШИНЭ ХОВД бол холын мөрөөдлийг ойрын биелэл болгох БОДЛОГЫН ЖОР юм” гэсэн байна