Өнөөдөр буюу /2020.07.29/-нд МҮЭ-ийн холбооны ЕНБД Г.Адъяа, ХХХБГ-ын дарга Ц.Отгонтунгалаг, Монголын Төмөр замчдын ҮЭ-ийн холбооны дэд дарга Б.Алтанхуяг нар Улаанбаатар Төмөр замын эмнэлгийн ҮЭ-ийн хорооны идэвхтэн сонгуультнуудад дарамт, хүчирхийллийн тухай 190 дүгээр конвенц, 206 дугаар зөвлөмжийг танилцууллаа.

Европын холбооны дэмжлэгтэйгээр МҮЭ-ийн холбоо, ОУХБ-тай хамтран хэрэгжүүлж буй “Аливаа ялгаварлан гадуурхалт, дарамт, хүчирхийллээс ангид ажлын байрны төлөө” мэдээллийн кампанит ажлыг 2020.06.20-оос 2020.07.31-ны хооронд өрнүүлж байгаа билээ. Энэ хүрээнд Улаанбаатар Төмөр замын эмнэлгийн эмч ажилтнуудад дээрх конвенц, зөвлөмжийн талаар дэлгэрэнгүй мэдээлэл өгч сонирхсон асуултад нь хариуллаа.

Энэ үеэр тус эмнэлгийн ажилтнууд дарамт, хүчирхийллийн тухай конвенц, холбогдох зөвлөмжийн талаар дэлгэрэнгүй мэдээлэл өгч байгаад баярлаж буйгаа илэрхийлж, эмнэлгийн орчинд үйлчлүүлэгч нараас дарамт учруулдаг нь эмч, ажилтнуудад хүндрэлтэй байдаг талаар хэлж байв.

Мөн энэ үеэр МҮЭ-ийн холбооны ЕНБД Г.Адъяа, ХХХБГ-ын дарга Ц.Отгонтунгалаг, МТЗ-чдын ҮЭ-ийн холбооны дэд дарга Б.Алтанхуяг нарт мэс заслын тасгийн үйл ажиллагааг танилцуулав. Тус тасгийн тоног төхөөрөмж сүүлийн жилүүдэд сайжирсан нь “Мэс заслын тасаг”-ийн чанар, үйлчилгээ иргэдэд хүртээмжтэй болж байгаа талаар онцолж байв.

Харин ажилтнуудынхаа нийгмийн асуудлыг шийдвэрлэх хүрээнд орон сууцанд хамруулах байдал дутагдалтай байгаа нь тулгамдсан асуудал болдог талаар дурдаж байсан юм.

Төмөр замын эмнэлгийн ажилтнуудад дарамт, хүчирхийллийн тухай 190 дүгээр конвенцыг танилцуулав