2020.07.28
Нийгмийн түншлэгч талуудын зөвлөлдөх уулзалт болов
Өнөөдөр буюу /2020.07.28/-нд Монголын үйлдвэрчний эвлэлийн холбоо /МҮЭХ/-ны хурлын танхимд нийгмийн түншлэгч талуудын зөвлөлдөх уулзалт боллоо. Европын холбооны дэмжлэгтэйгээр МҮЭ-ийн холбоо, Олон Улсын Хөдөлмөрийн Байгууллага /ОУХБ/-тай хамтран өрнүүлж байгаа “Аливаа ялгаварлан гадуурхалт, дарамт, хүчирхийллээс ангид ажлын байрны төлөө” мэдээллийн кампанит ажлын хүрээнд энэхүү зөвлөлдөх уулзалт болж байгаа билээ.
Уулзалтад МҮЭ-ийн холбоо, Монголын Эрүүл мэндийн ажилтны үйлдвэрчний эвлэлийн холбоо /МЭМАҮЭХ/, Хөдөлмөр нийгмийн хамгааллын яам /ХНХЯ/, Хууль зүй дотоод хэргийн яам /ХЗДХЯ/, Монголын ажил олгогч эздийн нэгдсэн холбоо /МАОЭНХ/, Хүний эрхийн үндэсний комисс /ХЭҮК/, Жендэрийн үндэсний хороо /ЖҮХ/, Мэргэжлийн хяналтын ерөнхий газар /МХЕГ/, Монголын худалдаа аж үйлдвэрийн танхим /МХАҮТ/-ын төлөөллүүд оролцов.
Уулзалтын эхэнд МҮЭ-ийн холбооны ЕНБД Г.Адъяа, ХНХЯ-ны Хөдөлмөрийн харилцаа, бодлого зохицуулалтын газрын ахлах шинжээч Ш.Маяа нар нээлтийн үг хэлж энэхүү зөвлөлдөх уулзалтаас гарах үр дүн, цаашид авч хэрэгжүүлэх арга хэмжээний талаар ярьж байв.
Энэ үеэр МҮЭ-ийн холбооны өрнүүлсэн “Аливаа ялгаварлан гадуурхалт, дарамт, хүчирхийллээс ангид ажлын байрны төлөө” мэдээллийн кампанит ажлын явц үр дүнгийн талаар МҮЭ-ийн холбооны Хөдөлмөрийн хяналт хуулийн бодлогын газрын дарга Ц.Отгонтунгалаг танилцуулж, МЭМА-ны ҮЭ-ийн холбооны дарга Б.Мягмар “Эрүүл мэндийн салбарт явуулсан цахим судалгааны явцын талаар” мэдээлэл өгч оролцогчдын сонирхсон асуултад хариулав.
Харин уулзалтын төгсгөлд ОУХБ-ын Хөдөлмөрийн хүрээний дарамт, хүчирхийллийн тухай 190 дүгээр конвенцийн дагуу хамтран авч хэрэгжүүлэх арга хэмжээний талаарх “Зөвлөмжийн төсөл”-ийг хэлэлцэн баталж, Ковид-19 цар тахлын хөдөлмөрийн хүрээнд үзүүлж байгаа нөлөө, хөдөлмөр, нийгмийн зөвшлийн талуудын хамтын ажиллагааны талаар санал солилцож, хэлэлцсэнээр энэ удаагийн зөвлөлдөх уулзалт өндөрлөсөн юм.
