Казахстан улсаас иргэдээ татна
2020.08.05

Казахстан улсаас иргэдээ татна

УИХ-ын гишүүн Т.Аубакир Казахстан улсаас эх орондоо буцах хүсэлтэй иргэдийг татан авах асуудлаар Шадар сайд Я.Содбаатартай өнөөдөр уулзжээ. 

Уулзалтаар өнгөрсөн сарын 7-нд УОК-т хүргүүлсэн албан бичгийнхээ хариуг тодруулж, иргэдийн санал хүсэлтийг уламжлан Казахстан улс руу дахин нислэг үйлдэх товийг тодорхой болгох талаар УИХ-ын гишүүн Т.Аубакир байр сууриа илэрхийллээ. 

Шадар сайд Я.Содбаатар Монгол Улсын Засгийн газраас дэлхийн улс орнуудаас иргэдээ татан авах ажлыг үргэлжлүүлж байгаагаа хэлээд энэ сард буюу Казахстан улс руу нислэг үйлдэхээ албан ёсоор хэлжээ. Казахстан, Орос улсад өдөр ирэх бүр өвчлөл ихсэж, нөхцөл байдал хүнд байгаа учир иргэдээ авчрахаасаа өмнө эрчимт эмчилгээний орны хүрэлцээ, эмчлэх нөөц бололцоог сайтар бэлдэх хэрэгцээ шаардлагатай талаар Дэлхийн Эрүүл Мэндийн байгууллагаас ЭМЯ, УОК-т зөвлөж байгаа учир ийнхүү татан авах ажиллагаа түр удаашраад байгааг танилцуулсан байна. Иймд Казахстан улсад байгаа иргэдийг хүлээцтэй хандахыг Шадар сайд хүсчээ. 

Ташрамд дурдахад, Иргэдийн дунд ИБУИНХУ, Танзани, БНТУ зэрэг улсаар дамжин ОХУ руу зорчих боломжтой гэсэн ташаа мэдээлэл гарч, иргэдийг төөрөгдүүлж байгаа тул зөвхөн албан ёсны эх сурвалжаас мэдээлэл авахыг анхааруулж байна.