Агуу зөнч Ванга хэрэв энх тунх байсансан бол 1-р сарын 31-нд 100 нас сүүдэр зооглох байлаа. Түүнийг мэдэхгүй хүн даян дэлхийд байхгүй гэхэд хилсдэхгүй. Гэхдээ л энэ өдөр түүний тухай олон шинэ мэдээлэл олны хүртээл боллоо. Тухайлбал Вангаг хүү өргөж авсан гэж, мөн эр нөхөртэйгээ гунигт амьдралыг туулсан тухай одоо л хүмүүс мэдэж авчээ. Энэ удаа зөвхөн улстөрийн талаарх зөгнөлүүдийг нь түүвэрлэн хүргэе.

Түүний жинхэнэ нэр бол Вангелия Пандева Гуштерева /Димитрова/. Тэрээр бүр 12 настайгаасаа улстөр сонирхох болсон гэдэг. Энэ нь тохиолдол бус, учир нь Ванга орчин үеийн Македонд төрсөн юм. Чухам энэ газар нутгийг Турк, Грек, Болгар болон Серб улсууд удаан хугацааны турш булаацалдсаар ирсэн билээ. Вангагийн эх орон дэлхийн хоёр дайны хөлд нэрвэгдэж, ах дүү ард түмэн болох болгарчууд, сербүүд хоорондоо тулалдаж байсан юм. 1945 оноос хойш ч Ванга улстөрийг сонирхсоор байв. Тэр 1930-аад онд Болгарын Петрич хотод ирж суурьшлаа.

Вангаг хамгийн анх дэлхий даяар алдаршуулсан зөгнөл бол Дэлхийн II дайн эхлэх тухай таамаглал. Болгарын хаан III Борис өөрийн биеэр түүн дээр хүрэлцэн ирэхэд Ванга “Чиний улс томорсоор байгаа. Гэвч дахиад самрын хальсан чинээ болох вий. Ер нь Болгар улс дайнд оролцох хэрэггүй” гэж сэрэмжлүүлжээ. Гэвч улстөрчид зөнчийн үгэнд орсонгүй, Гитлерийн талд байлдаж, улмаар ялагдсан билээ. Тэгээд дайны дараа ЗХУ “өмөөрсний ачаар” Болгар улс газар нутгаа алдахаас сэргийлсэн гэж оросууд үздэг. Дашрамд дурдахад Гитлер ч Ванга дээр ирж үзүүлсэн бөгөөд маш гутранги гарч явсан гэдэг. Бодвол Ванга үнэнийг шулуухан хэлчихсэн байх. Учир нь тэрээр Гитлерийг 1945 оны 4-р сард үхнэ гэж зөгнөсөн юм.

III Борис хаан 1942, 1943 оны эхээр түүн дээр дахин иржээ. Сохор зөнч эхний удаа эзэн хаандаа “Та 1943 оны 8-р сарын 28-нд нас барна” гэжээ. Дараа нь буюу 1943 оны 2-р сард Ванга “Чиний ордон дээр улаан туг байгааг харж байна” гэж зөгнөв. Бүх үйл явдал яг түүний хэлснээр өрнөж, 30 гаруйхан настай залуухан Вангагийн эртнээс зөгнөсөн яг тэр өдөр хаан өнгөрчээ. Харин 1944 оны намар Софи хотын дээгүүр улаан туг намирлаа. Ийнхүү Болгар улс аажмаар социалист болон хувьссаар.

Ванга Болгар төдийгүй дэлхийн улс орнуудын талаар зөгнөдөг тул удалгүй түүний алдар дэлхий даяар түгсэн юм. Тэр ирээдүйн үйл явдлуудыг маш тодорхой зөгнөн хэлдэг байсан нь үнэхээр гайхалтай. Болгарын зөнч амьдралынхаа ихэнх хэсгийг социалист Болгар улсад өнгөрүүлсэн юм. Харин энд далдыг харагчид болон зөнбилэгчдэд сөрөг, таагүй хандаж байлаа. Яагаад гэвэл коммунистууд Вангаг мухар сүсэгт хүмүүсийг автуулж, социализм барьж байгуулах их ажлаас хөндийрүүлж байна гэж үзэж байв. 1952 оны намар зөнч маш хэцүү байдалд орсон юм. “Хагас жилийн дараа Иосиф Сталин нөгөө ертөнцөд одно” гэж тэр зөгнөв. Сталиныг дэмжигчид тухайн үед Болгарын төрийн эрхийг атгаж байсан тул Вангаг шоронд хорьжээ. Гэвч тэр тэнд нэг их удаагүй. Түүний зөгнөсөнчлөн Зөвлөлтийн генералиссимус үнэхээр нас барлаа. Вангаг сулласан ч түүнийг хавчин гадуурхсаар байсан юм. Болгарын тусгай албад Вангаг македон нутгаас гаралтай, Югославын уугуул гэдгийг мартаагүй, иймээс түүнийг үе үе өрнөд хөршийн туршуул гэж сэжиглэж байв. Учир нь тухайн үед Титовын Югослав улс ба Болгарын харилцаа ихэд асуудалтай байсан. Гэвч тэд хичнээн хайсан ч ямар ч баримт олоогүй юм.
1970-аад онд Болгарын тусгай албад Вангагийн эсрэг баримтууд цуглуулж, нэг удаа бүр түүний гэрт нэгжлэг хийжээ. Энэ үеэр 90 000 лев олдсон нь социалист орны хувьд асар их мөнгө байлаа. Вангаг шоронд суулгаагүй ч түүнийг мөрдөж мөшгисөөр байсан. Зарим нь Вангелия Гуштероваг “боловсролгүй, бүдүүлэг эмэгтэй" гэж матаас бичиж байлаа. Түүнчлэн "Стършел" хэмээх шог сонин байнга л Вангаг гоочилж, “шулам, луйварчин, дүр исгэгч” гэх зэргээр хоч нэр зүүдэг болжээ. Гэхдээ Болгарын өндөр албан тушаалтнуудын дунд Вангаг өмгөөлөгчид байсан юм. Нэг түшмэл маш чухал бичиг баримтуудтай цүнхээ алга болгожээ. Цагдаа, тусгай албад хичнээн хайсан ч олсонгүй. Харин Ванга хаана байгааг хэлсэн учраас түүнийг “ардын засагт хэрэгтэй хүн” гэсэн тодорхойлолтоор шагнажээ.

Товчоор өгүүлэхэд социалист Болгар улс Вангад янз бүрээр хандаж байсан. Нэг талаас коммунист үзэл сурталчид “шулам”-тай тэмцэхийг шаардаж байсан бол нөгөө талаас орон нутгийн элитүүд зөнчийг ашиглан мөнгө хийж болохыг ойлгожээ.

Тусгай албад үйлчлүүлэгчдийг хяналтдаа авав. Тэгээд Вангад үзүүлэхээр ирсэн болгарчуудаас 10 лев, гадаадынхнаас 50 доллар авдаг болжээ. Болгарын төрийн сан хөмрөгт Ванга “шулам” 9 сая левийн ашиг оруулсныг эдийн засагчид тооцоолон гаргажээ. 1967 онд Болгарын төрийн эрхэнд Тодор Живков гарсны дараа Вангаг “төрийн ажилтан” хэмээн огт байхгүй албан тушаалд бүртгэж авав. Энэ нь генсекийн охин Людмила Живковагийн ач тус байсан гэдэг. Людмила ард түмний хайртай хүн байсан бөгөөд тэр Вангад ч таалагддаг байв. Хэдий тийм ч энэ нь “намын хаан суудлыг залгамжлагч”-ийн талаар аймшигт зөгнөл хэлэхэд саад болоогүй юм. 1979 оны эхээр Ванга “Людмила Живкова авто машины ослоор өнгөрнө” гэж мэдэгдлээ. Тусгай албад уг ослоос сэргийлэх гэж оролдсон ч бүтсэнгүй. Людмила Живковаг осолд өртсөний дараа хамгийн шилдэг эмч нар түүнийг бараг л нөгөө ертөнцөөс татаж гаргажээ. Гэвч 2 жилийн дараа ослын уршиг дахиан сэдэрч, Болгарын удирдагчийн охин нас барав.

1987 онд Болгарыг бүхнийг чадагч Живков захирч байх үед Ванга өөрчлөлт айсуй талаар ам нээлээ. Тэрээр “Ойрын жилүүдэд Лениний сургаалийг үл дагадаг том эрдэмтэн засгийн эрхэнд гарна гэжээ. Энэ удаа ч Ванга алдсангүй, 1992 онд тэрслүү гүн ухаантан Желю Желев Болгарын Ерөнхийлөгч боллоо. Болгар улс социалист лагериас гарч, Европын холбоо, НАТО-гийн талыг барих болжээ.

Ванга даян дэлхийн улстөрийн үйл явдлуудыг зөгнөсөөр, тэдгээр нь ч биелсээр байлаа. Тухайлбал Зөвлөлтийн цэргүүд Чехословакт нэвтэрнэ, АНУ-ын Ерөнхийлөгч Джон Кеннеди алагдана, Энэтхэгийн Ерөнхий сайд Индира болон Раджива Гандийн амийг хорооно, Никарагуагийн дарангуйлагч Анастасио Сомос унана. Мөн ЗХУ сүйрнэ гэх жишээний. Тэр заримдаа алдаж байсан. Жишээлбэл Ванга 1973 онд ЗХУ-ын арми нэг сарын дотор Чили улс руу халдана гэсэн ч биелээгүй.

Ванга 1979 онд “Оросын давуу талыг Америк ч хүлээн зөвшөөрнө. Энэ явдал 60 жилийн дараа болно. Үүний өмнө Хятад, Энэтхэг, Орос гурван улс ойртон дотносно. Болгар хэрэв Оросын хэсэг болвол тэдэнтэй хамт байх болно. Учир нь Оросгүйгээр Болгарт ирээдүй байхгүй” гэж хэлжээ.
Ер нь Вангагийн нийт зөгнөлийн 68 хувь биелсэн гэсэн баримт бий. Ихэр цамхгийн сүйрэл, байгалийн олон гамшиг, цунами, алан хядах ажиллагаа, шашин хоорондын мөргөлдөөн, агуу хоёр гүрний удирдагчид гар барина /Горбачев, Рейган зэрэг улстөрийн зөгнөлүүд бүгд биелсэн. Ванга эмээ 55 жилийн турш нэг сая гаруй үйлчлүүлэгч хүлээн авсан юм байна.
Зөнч Вангагийн сүүлчийн амьсгалыг харж, эцсийн үгийг нь сонссон лам Ангел Ковачев түүний талаар олон шинэ мэдээ дуулгасан. “Ванга 2010 оныг 2012 онд эрин солигдохын өмнөх бэлтгэл үе гэж үздэг байсан. Тэр 2010 оноос хойш хоёр жилийн дотор хүн төрөлхтөн нэг ёсондоо шалгалт өгнө гэж надад ярьсан юм. Хэрэв бид тэр шалгалтыг давж чадвал амьд үлдэнэ, бүдэрвэл өнгөрөө” хэмээн ламтан дурсч байна.

Вангагийн шинээр олдсон зарим зөгнөлийг хүргэе. Уг зөгнөлийг Нийгмийн прогнозын төвийн ажилтан А.Беляков тайлбарлажээ.

Ирээдүйн зөгнөлүүд

Зөгнөл: Хүмүүс улаан өнгийн мөнгө хэрэглэдэг болно. Надад 100, 5, 0 гэсэн тоо харагдаж байна
Тайлбар: 2010 оны сүүлээр доллар сулрах магадлалтай. Иймээс ирээдүйд юань, рубль л олон улсын валют болох байх. Жишээлбэл 100 юань, 5000 рублийн дэвсгэртүүд улаан өнгөтэй.

Зөгнөл: Өмнө нэгдсэн байсан зүйл дахин задарч бутарна. Энэ үйл явц Оросын дэргэд болно. Мөн далайн чанадад ч адил явдал болох юм.
Тайлбар: Грекийн хямралын үеэр шинжээчид Евро бүс задарч магадгүй талаар ярих болсон. Далайн чанадын хувьд өгүүлэхэд АНУ-ын Ерөнхийлөгч Барак Обамаг зарим нь “Америкийн Горбачев” гэдэг. Түүний үед АНУ бутарч, дор хаяж 6 улс болон задрах юм байх.

Зөгнөл: Хүчирхэг луу дэлхий дээр савраа тавина. Гурван аварга ойртож дотосно.
Тайлбар: Луу бол мэдээж, Хятад. Өнөөдөр энэ улс дэлхийн лидерүүдийн нэг билээ. “Forbes” сэтгүүл “Хятад улс энэ жил хэт том гүрний статустай болох магадлалтай” гэсэн таамаглал дэвшүүлжээ. Харин Орос улс “Хятадын хөзрөөр тоглож”, тус орны эдийн засгийн зүтгүүр болж хувирах магадлалтай. Гурван аварга гэдэг нь Энэтхэг, Хятад, Орос улсууд аж.

Зөгнөл: ХХI зууны эхний 15 жилд багтан, ЗХУ ахин сэргэн мандана.
Тайлбар: ЗХУ сэргэн мандана гэдэг нь Европын холбоо шиг улс орнуудын холбоо байгуулагдахыг хэлж байгаа байх. Ер нь ОХУ, Белорусс, Казахстан гэсэн гурван улс нэгдсэн валюттай болж, Европын холбоо шиг нэгдэхээр төлөвлөж байгаа билээ.

Зөгнөл: 2010 онд ирээдүйгээ залруулахад 2 жил л үлдэнэ. Бурхны 10 сургаалийг дагаж биелүүлэх хэрэгтэй. Хэрэв биелүүлбэл худал хуурмаг бүхэн дэлхийгээс устан арилж, дайн дажин дуусна. Харин хүн төрөлхтөн өөрчлөгдөж чадахгүй бол нар шингэж, зөвхөн хэсэгхэн нь харанхуйд амьд үлдэнэ.
Тайлбар: Мэдээж, 2012 оноос бүгд л айж эмээж байгаа. Майячуудын хуанли төгсөхийн зэрэгцээ асар том астроид тэнгэрээс унана гэж зөгнөсөн. Тэрчлэн эртний Энэтхэгийн сурвалж бичгээс үзэхэд Тавдугаар нарны эрин төгсч, дэлхийд аймшигтай сүйрлүүд ар араасаа нүүрлэнэ гэжээ. Ванга иймээс л бүх хүн төрөлхтөн гадаад аюулын эсрэг сөрөн зогс хэмээн зөвлөсөн байх.

Вангагийн улстөрийн агуу зөгнөлүүд