Улсын Их Хурлын Нийгмийн бодлогын байнгын хороо өнөөдөр /2020.08.26/ хуралдлаа. Хуралдаанаар Монгол Улсын Шадар сайд Я.Содбаатар “Ковид-19 цар тахлаас урьдчилан сэргийлэх талаар Засгийн газраас авч хэрэгжүүлж байгаа арга хэмжээ болон гадаад байгаа иргэдийг татан авах” ерөнхий нөхцөл байдлын талаар мэдээлэл хийлээ.

Уг мэдээлэлтэй холбогдуулан УИХ-ын гишүүд Улсын онцгой комиссын дарга, Монгол Улсын Шадар сайд Я.Содбаатар болон Улсын онцгой комиссын гишүүдээс асуулт асуулаа.

УИХ-ын гишүүн С.Одонтуяа:

“Сүүлийн үед иргэн болон Улсын онцгой комиссоор дамжуулж ирсэн иргэдийн өргөдөлтэй танилцаж 20 гаруй албан бичиг холбогдох яам, УОК-д хүргүүлсэн. Н.Энхтайван сайдаас асууя. Цаг агаар хүйтэрч байна. байгаа улсаасаа ирж чадахгүй, орох оронгүй болсон гэсэн гомдол нилээд ирсэн байна. Энэ асуудал дээр ЭСЯ-д ямар арга хэмжээ авахаар байна вэ? Нэг хүн бүрчлэн байр авах боломжгүй учраас иргэдээ байршуулах түр байрыг бий болгох боломж бий юу?

Хилийн чанадад байгаа иргэдэд санхүүгийн дэмжлэг үзүүлэх журам байдаг. Энэ дагуу иргэд өргөдөл гаргаж болно гэсэн. 2018 онд батлагдсан журам. Одоо энэ журмаар өргөдөл өгөөд хуралдаж шийдвэр гаргаад мөнгө авах боломжгүй цаг үе байна. Энэ журмыг цар тахлын үед түр журам болгон өөрчилж, яаралтай шийдэх боломжтой юу?

Онцгой комисс сайн ажиллаж байна гэдэг нь авлига авахаас зайлах үндэслэл биш. Бид АТГ-т бичиг өгсөн. Ингэснээр цочроо өгсөн. Сүүлийн үед ирж байгаа өргөдөл багассан. Зөв зүйтэй ажил гэж үзэж байна.

Ууганбаяр хурандаад талархал илэрхийлье. Хэлсэн асуудал бүрт олон нөхцөл байдалд л ханддаг. Тухай бүрт шуурхай арга хэмжээ авч байгаад баярлалаа. Та шуурхай удирдлагын алба болон хамт ажиллагсаддаа миний талархалыг дамжуулаарай.

Цахим орчинд гарч байгаа зүйлд бид эмзэглэх хэрэггүй. Бид үүгээр олон нийтийн дунд ямар мэдээлэл яваад байгаа мэдэх боломжтой. Харин ч гаргасан алдаа дээрээ дүгнэлт хийх ёстой шүү. Манай Иргэдийн онцгой комисс бол Улсын онцгой комиссын ажилд оролцохгүй гэдгээ анхнаасаа хэлсэн. Харин иргэдийн гомдол мэдээлэлд хариу өгөх, мэдээллээр хангахаар ажиллаж байгаа.”

С.Одонтуяа: Хилийн чанадад байгаа иргэдэд санхүүгийн дэмжлэг үзүүлэх журамаа эргэн харж, шуурхай шийдвэр гаргах шаардлагатай байна